Insurance a Kasapulan ti Amin
AGNANAEDKA man iti lugar a gagangay sadiay wenno awan ti insurance, adda klase ti insurance a mabalin ken rumbeng a gun-oden ti amin. Tangay ti “insurance” mabalin a tukoyenna ti “maysa a pamay-an a magarantiaan ti pannakasalaknib wenno kinatalged,” kasano a magun-odam a mismo ti kasta a kita ti insurance?
Maaramidmo dayta babaen ti panangyaplikar kadagiti praktikal nga addang a mangkissay kadagiti maipasango kenka a peligro. Kuna ti Biblia a dumteng iti amin “ti panawen ken gasat [di mapakpakadaan a pasamak, NW].” (Eclesiastes 9:11) Ngem no saanmo nga isarsarak ti bagim iti peligro, mabalin a maksayan ti posibilidad nga agsagaba wenno mapukawanka.
Panunotem ti Masakbayan
Maysa a pannalaknib ti panangipakitam iti praktikal a kinasirib. Bayat ti panawen ti relatibo a kinawadwad ti ekonomia, mabalin nga agsalimetmetka tapno adda usarem inton panawen ti gawat wenno tiempo ti pakasapulan. Idi unana a panawen, ti managbuteng iti Dios a lalaki a ni Jose pinagbalinna a nalatak ti bagina kas “managis-isip ken masirib” babaen ti panangurnongna iti taraon para iti intero a pagilian ti Egipto bayat ti tiempo ti kinawadwad. Idi nagsagaba ti pagilian gapu iti bisin, saan laeng a dagiti Egipcio ti naipaayan gapu kadagiti tignay ni Jose no di ket uray pay ti mismo a pamiliana.—Genesis 41:33-36.
Maysa met a pannalaknib ti kalkalainganna a panagusartayo kadagiti bambanag. Makasalimetmettayo iti kuarta ken maksayan ti rigat no ditay kanayon a gumatang kadagiti kabaruan nga alikamen, moda, wenno paglinglingayan—wagas ti biag a bassit laeng wenno awan pay ketdi ti maipaayna a pudno a kinatalgedtayo. Kinapudnona, kas naibagan, no ad-adu ti material a sanikua ti maysa a tao, ad-adu met ti posibilidad a matakawan wenno mapukawan.—Lucas 12:15.
Sipapanunotka Koma iti Kinatalged
Maksayantayo ti adu a peligro iti biag no sipapanunottayo iti kinatalged. Mano koman ti naliklikan nga aksidente iti lugan no amin ket naannad ken kalkalainganna ti kapartak ti panagmanehoda? Panunotem met no mano koman a biag ti mabalin a nasalbar no awan ti nagmaneho a nabannog unay wenno nakainum. Addada met dadduma pay a peligro iti panagmaneho a mabalintay a kontrolen.
Kas pagarigan, iparit ti linteg iti sumagmamano a pagilian ti panagusar iti cellular a telepono bayat ti panagmaneho. Kinuna ti maysa a panagadal a ti panagusar iti dayta ket mamimpat a daras a degdeganna ti peligro nga adda mapasamak nga aksidente. Kapada dayta ti dakkel unay a posibilidad a maaksidenteka no agmanehoka a nalaokan ti daram iti 0.1 a porsiento ti alkohol, nga iti adu a lugar ket ibilangen ti linteg a nabartek unay ti maysa a tao isu a di rumbeng nga agmaneho.
Ti kanayon a panagusar iti seat belt kissayanna met ti peligro ti ipapatay dagiti tsuper ken pasahero. Ngem dika koma ipapan a no adda dagiti mangsalaknib nga alikamen kas iti seat belt ken air bag ket mabalinen nga isarsarakmo ti bagim. Ipakita dagiti panagsukisok a ti kasta a kapanunotan ket agresulta iti ad-adu nga aksidente.
Nasayaat met nga insurance ti panagbalin a sipapanunot iti kinatalged iti pagtaengan ken iti pagtrabahuan. Ti kadi pagnanaedam ken pagtartrabahuam ket nadalimanek ken natalged? Kitaem ti aglawlawmo. Iti pagnaan, adda aya aniaman a mabalin a pakaitibkolan ti siasinoman? Adda aya natadem a bambanag wenno napudot nga alikamen—paglutuan, heater, plantsa—a mabalin a pakasugatan wenno pakasinitan dagiti tattao sadiay? Adda aya naurnong a papel wenno nalaka a sumged a bambanag? Nasiglatka koma a kumita kadagiti mabalin a pakadangranan dagiti ubbing. Kas pagarigan, saan kadi a magaw-at ti babassit nga ubbing dagiti arak ken amin a makasabidong a produkto a pagdalus?
Saluadam ti Salun-atmo
No nainkalintegan ti panangsaluadmo iti salun-atmo, maliklikam ti peligro nga agsakitka. No kasta, ti pannakaammo ket mabalin nga agserbi kas maysa a klase ti insurance. Ammuem dagiti mamagpeggad iti salun-atmo, ket agtignayka a dagus no adda rumsua a sakit. Napatpateg pay no ammuem no kasano a saluadam ti salun-atyo a sangapamiliaan. Laglagipem ti kadaanan a pagsasao: “Naim-imbag ti agsakbay ngem ti magabay.”
Nabayagen a mangipapaay ti Agriingkayo! kadagiti impormasion a mangparparegta kadagiti tattao nga agbiag a maitunos kadagiti prinsipio ti Biblia tapno maliklikanda dagiti ugali ken estilo ti panagbiag a makadangran iti salun-at. Kas pagarigan, mairaman kadagiti suheto nga inusigen ti Agriingkayo! ti kinapateg ti kinadalus, umno a taraon, umdas a turog, ken regular a panagehersisio agraman ti kinapateg ti panangkontrol iti pakaaburiduan ken pakakumikoman iti biag.
Nagpateg a Klase ti Insurance
Iti daytoy imperpekto a lubong, praktikal unay ti maaddaan iti insurance, ngem awan ti insurance a naan-anay a makasalaknib kadatayo wenno naan-anay a makalitup kadagiti mapukawtayo. Kaskasdi, adda man insurance-da wenno awan, adda dagiti tattao nga agtalek a saanda a mabaybay-an. Apay? Agsipud ta no dumteng ti didigra, dagiti pudno a pasurot ni Jesu-Kristo—dagidiay agserserbi ken Amana a ni Jehova a Dios—aramidenda ti amin a kabaelanda a mangpalag-an iti pakadagsenan ti maysa ken maysa.—Salmo 83:18; Santiago 2:15-17; 1 Juan 3:16-18.
Maysa pay, ikari ni Jehova a mismo a dinanto pulos a baybay-an dagiti matalek nga adipenna. Insurat ti maysa a salmista ti Biblia: “No da ama ken ina baybay-andak, ni ngad Jehova pidutennakto.” (Salmo 27:10) Kas Gubuayan iti biag, kabaelan ni Jehova a pagungaren dagidiay matay, ket sigun iti Biblia, inikkanna ti Anakna a ni Jesu-Kristo iti pannakabalin a mangpagungar kadagiti natay. (Salmo 36:9; Juan 6:40, 44) Ngem ipamatmat ti Sao ti Dios a saan a mapagungar ti amin. (Juan 17:12) Kasano ngarud a masiguradotayo a malagipnatayo ti Dios inton panagungar?
Iti nalatak a Sermonna idiay Bantay, iti kinapudnona, nadakamat ni Jesus ti maipapan iti mapagtalkan unay a klase ti insurance. Kinunana: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw. Ta no sadino ti ayan ti gamengmo, addanto met sadiay ti pusom.”—Mateo 6:19-21.
Masansan a panunoten dagiti tattao ti agurnong iti pondo a namnamaenda a mangipasigurado a nanamnam-ay ti panagbiagda inton lumakay wenno bumaketdan. Nupay kasta, impabigbig ni Jesus ti agpaypayso a natalged a klase ti insurance. Di magatadan ti pategna, ken pulos a di mapukaw! Inlawlawagna: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.
Babaen ti pananggun-od iti umiso a pannakaammo iti Dios ken iti Anakna ken panangyaplikar iti nasursurotayo iti panagbiagtayo, makaaramidtayo iti naimbag a pakasarsaritaantayo iti Dios. (Hebreo 6:10) Impaganetget da apostol Pedro ken Juan, babaen ti panangibasarda ti pammatida iti pannursuro ti Apoda a ni Jesu-Kristo, nga agpatingganto ti agdama a sistema ti turay ti tao. Nupay kasta, inlawlawag ni Juan: “Ti agaramid iti pagayatan ti Dios agtalinaed iti agnanayon.”—1 Juan 2:17; Mateo 24:3, 14; 2 Pedro 3:7, 13.
Makapagtalektayo a no agserbitayo iti Dios ket mataytayo, pagungarennatayonto wenno, no agbiagtayo agingga iti tiempo ti panungpalan daytoy a sistema ti bambanag, ispalennatayto a sibibiag a sumrek iti nalinteg a baro a lubongna. Kinapudnona, ti kari ti Dios ket ‘punasennanto ti amin a lua kadagiti matatayo’ ken pagbalinenna a “baro ti amin a bambanag.” (Apocalipsis 21:4, 5) Talaga a ti panagserbi iti Dios ken panagtalek kadagiti karina ti kasayaatan kadagiti amin nga insurance. Ket mabalin dayta a gun-oden ti isuamin a tattao.
[Dagiti ladawan iti panid 8, 9]
Maysa a klase ti insurance ti panagbalin a sipapanunot iti kinatalged ken salun-at
[Ladawan iti panid 10]
Ti panangammo iti Dios ken panangaramid iti pagayatanna ti kasayaatan nga insurance nga agpaay iti masakbayan