Manipud Kadagiti Agbasbasa
Dagiti Mantsa Nagdakkel ti naitulong ti artikulo a “Dagiti Mantsa iti Imatangmo?” (Hunio 8, 2000) iti biagko. Naawatko ti magasin tallo laeng nga aldaw sakbay a medio naisina ti retina ti kannawan a matak. Nagpadoktorak a dagus gapu kadagiti sintoma a nadeskribir iti artikulo. Nausar ti panangagas babaen ti laser tapno matarimaan ti nadadael, ket iti kasta saan a nadadael ti panagkitak. Pagyamanan kadagita a nagsayaat ti pannakasukimatda ken praktikal nga artikulo.
C. V., South Africa
Propaganda Kabasbasak ti ruar a Hunio 22, 2000, ket agyamanak kadakayo gapu iti serye a “Rumbeng Aya a Patiem ti Amin a Mangngegmo?” Iti lugar a pagnanaedak, nagbalin nga uso ti panangumsi kadagiti Romany (Gypsy). Pagaangawan dagiti tattao ti maipagarup a panagtakawda. Gapu kadagiti artikulo, naamirisko a dakes dagita nga angaw, isu nga inkeddengko a saanakon a makipaset.
K. M., Czech Republic
Panagyan iti Sabali a Pagilian Pagyamanan iti artikulo nga “Agimtuod Dagiti Agtutubo . . . Rumbeng Aya nga Agyanak iti Sabali a Pagilian?” (Hunio 22, 2000) Sangkabasak idi daytoy a serye, ngem masansan a pagarupek nga aglablabes ti sumagmamano kadagiti peggad a dinakamatyo. Itay napan a tawen, nageskuelaak iti maysa nga unibersidad iti sabali a pagilian a nangibaon met iti estudianteda iti pagiliak. Nupay makapainteres daydi a kapadasan, saanak a nagunggonaan iti naespirituan.
M. P., Italia
Para kaniak, daytoy nga artikulo ken ti artikulo nga “Agimtuod Dagiti Agtutubo . . . Kasano nga Agballigi ti Panagnaedko iti Sabali a Pagilian?” (Hulio 22, 2000) ket ‘taraon iti umiso a tiempo.’ (Mateo 24:45) Inkeddengkon nga agyanak iti makatawen iti sabali a pagilian tapno agadal iti sabali a lenguahe. Isu a talaga nga agyamanak gapu kadagiti singasing ken praktikal a suhestion.
I. Z., Switzerland
Easter Island Ilawlawag ti artikulo a “Napateg a Leksion Manipud iti Nagbassit nga Isla” (Hunio 22, 2000) dagiti pagdanagan ti adu a tattao a maseknan iti aglawlaw. Ngem madlawko a manmano dagidiay mangipangpangag kadagiti sarsarangtentayo a peggad. Makasangitak no panunotek no kasano kadakes ti panangtarawidwid ti tattao iti daytoy a daga.
K. M., Japan
Daylight Saving Time No maipapan iti artikulo a “DST—Naisingasing nga Ideya Sakbay a Naakseptar?” (Hulio 8, 2000), talaga kadi a makomendaran ti DST? Ti Namarsua kadatayo ti nangpataud kadagiti paniempo. Siasino ti addaan iti kalintegan a mangbalbaliw iti dayta? Abnormal a banag ti makunkuna a daylight saving time!
I. L., Alemania
Saan nga indayaw wenno kinondenar ti artikulomi ti DST. Impadamagmi laeng ti makapainteres a pakasaritaanna. Ti Dios ket saan a nangted kadagiti espesipiko nga instruksion no kasano ti rumbeng a panangpattapatta iti oras. Naaramid ngarud dagiti agdama a sistema ti panangikeddeng iti oras sigun iti kayat dagiti tattao ken saan nga inyurnos ti Dios. Saan a balbaliwan ti DST dagiti paniempo. Gapu kadagitoy a kinapudno, nabatad nga awan ti masalungasing nga aniaman a nadiosan a prinsipio no balbaliwantayo ti oras kadagiti relotayo mamindua iti kada tawen.—ED.
Umisemka Pagyamanan iti panangipablaakyo iti nagpateg nga artikulo nga “Umisemka—Pagimbagam Dayta!” (Hulio 8, 2000) Naan-anay nga umanamongak iti insalaysayna. Pinalagipannak a kanayon nga agpanunotak iti positibo tapno agbalin a napaypayso ti isemko. Wen, ti panagisem ket makatulong kadatayo a makigayyem iti sabsabali. Makatulong met a mangikkat iti nerbios.
P. C., China