Maysa a Kayo a Mangpasardeng Kenka iti Dalanmo
BABAEN TI MANNURAT TI AGRIINGKAYO! IDIAY ECUADOR
IDI ngalay ti Disiembre, di pay natuduan dagiti tanap iti igid ti baybay ti Ecuador. Kasla nagangon ti karuotan gapu iti tapok iti katurturodan. Naulep ti tangatang isu a nakuyem ti aldaw bayat nga agdaldaliasat ti maysa a grupo iti kalsada a nagpalaud nga agturong iti Taaw Pacifico. Pagammuan ta mulmulenglengandan ti maysa a kayo iti igid ti kalsada. Kellaat a simmardeng ti lugan. Ania a kayo ti nakitada?
Ti agsabsabong a kayo ti guayacan! Nasinga ti apag-kanito a kinaulimek idi adda nagkuna: “Nagpintasen! Nakakitakayo kadin iti kasta a natayengteng a kolor? Adun ti nakitak a kayo nga agsabsabong iti de rosa, eskarlata, nalabaga, wenno kolor de kahel, ngem daytoy ti katayengtengan kadakuada amin!”
Idi naapresiardan ti bimmalitok a kinapintasna, intuloydan ti nagbiahe. Ngem dida ammo a pangrugian pay laeng daydi. Dida pay nakaadayo iti kalsada, adda manen sabali nga agsabsabong a kayo ti guayacan ken kalpasanna adda manen sabali. Kasla kellaat a naabbungotan dagiti turod iti bimmalitok a silnag ti init! Panawen gayam idi ti tinawen a panagsabong ti kayo a guayacan—tiempo a tumayengteng dagiti saan a namaris a kabakiran.
Nupay kasta, ti kinapintas daytoy nga agsabong a kayo ket saan laeng a masarakan iti maymaysa a pagilian. Kinapudnona, agbiag daytoy a kayo iti adu a paset ti Abagatan ken Sentral nga America. Maawagan met dayta babaen kadagiti nagan nga araguanay, guayacan amarillo, golden trumpet, ken ti trumpet tree, a tuktukoyenna ti kasla trumpeta a pannakasukog dagiti sabongna. Tabebuia chrysantha ti nasientipikuan a naganna.
Mangpataud met ti guayacan kadagiti pino ti binggasna ken nangato ti kalidadna a tabla a maar-aramid a muebles iti adun a tawen. Gapu ta manmanon daytoy a kayo, nasken a mangipaulog ti dadduma a pagilian kadagiti linteg a mangsalaknib iti dayta. Naaramid daytoy tapno masigurado a sagrapen nga agpadpada dagiti umili ken dagiti sangaili ti nagpaiduma a kinapintasna no agsabsabong, uray iti sumagmamano laeng nga aldaw ken maminsan laeng iti makatawen.
Di pagduaduaan a ti guayacan ket maysa a nabiag a sagut ti katan-okan kadagiti amin nga artist—ti Naindaklan a Namarsua kadatayo ken arkitekto daytoy nakaskasdaaw a daga a pagnanaedantayo.