Manipud Kadagiti Agbasbasa
Santeria Rinugianyo ti artikuloyo iti Agriingkayo! a “Ti Pangallukoy ti Santeria” (Hulio 8, 2000) babaen ti panangipasimudaag a prominente laeng idiay Cuba ti Santeria ket manipud sadiay, in-inut a naisaknap dayta iti sabali a pagilian. Ngem nadakamat met laeng ti artikulo a dagiti Africano a tagabo a naggapu idiay Nigeria ti nangisaknap iti Santeria iti intero nga isla ti Caribbean. Saan a taga Cuba ti nangisurat iti daytoy nga artikulo no di ket taga Mexico. Saan a husto daytoy nga artikulo, ket dadaelenna ti kredibilidadyo.
V. R., Estados Unidos
Awan panggepmi a mangipasimudaag a ti Santeria ket “prominente laeng idiay Cuba.” Iti kasumbangirna, impakitami a ti Santeria ket maal-alagad iti dadduma a paset ti lubong, agraman idiay Mexico ken iti Estados Unidos. No maipapan iti panagsaknap ti Santeria, kuna ti “Encyclopædia Britannica” a ti Santeria ket maysa a “narelihiosuan a kulto a nagtaud idiay Cuba ken nagsaknap kadagiti kabangibangna nga isla . . . Timmaud dayta manipud kadagiti tradision dagiti umili a Yoruba (ti moderno a Nigeria ken Benin).”—ED.
Endometriosis Pagyamanan unay iti artikulo a “Ti Panangibturko iti Endometriosis.” (Hulio 22, 2000) Nadayagnos met nga addaanak iti endometriosis isu a marigatanak unay. Saan a pulos a maawatan idi ti sumagmamano a Kristiano a kakabsatko a lallaki no apay nga agkarasakitak. Ngem kalpasan a nabasada ti artikulo, sabali itan ti panangmatmatda.
G. S., Jamaica
Ti panagbasak maipapan ken Deborah Andreopoulos ket kaasping ti panagbasak iti mismo a pakasaritaan ti biagko! Adun a tawen nga agsagsagabaak, ket daytoy nga artikulo ti sungbat dagiti kararagko. Nangipaay iti kasapulak unay a pammaregta.
J.C.F., Ireland
Dua ket kagudua a bulan ti napalabasen, nadayagnos nga addaanak iti endometriosis. Ti kangrunaan a pagyamanak ket saan la a sisiak no di ket adu a babbai ti makapaspasar iti sagsagabaek.
A. W., Guatemala
Pagyamanan iti panangdakamatyo iti epekto daytoy a sakit saan laeng nga iti pasiente no di ket uray kadagiti gagayyem ken pamiliana. Ti panangbasak iti artikuloyo ti nangiparikna kaniak a talaga a maseknan ken maawatan ni Jehova ti sagsagabaenmi.
N. A., Canada
Sumagmamano la nga aldaw ket maoperaakton, isu a naparegtaak iti kapadasan ni Deborah Andreopoulos. Ita, nasaysayaaten ti riknak a mangdaer iti problemak.
M. B., Italia
Antarctica Namin-adu a binasak ti artikulo nga “Antarctica—Ti Maudi a Beddeng.” (Hulio 22, 2000) Nagsayaat ti pinutar ti mannurat ti Agriingkayo! idiay Australia ken ti artist a nangdisenio! Impalagipna kaniak ti napalabas. Kabayatan ti International Geophysical Year ag-45 a tawenen ti napalabas, maysa a grupo dagiti sientista ti E.U. ti naibaon a mangadal iti Antarctica. Tallo a dadakkel a tomo ti nakaisuratan dagiti kapaliiwanda. Kas graphic artist nga awanan iti amo, innaladak a mangdisenio iti sinuratda. Ita, maysaakon a Saksi ni Jehova, ket addaakon iti maika-16 a tawen kas amin-tiempo nga ebanghelisador ti naimbag a damag. Adda pay laeng ti Antarctica iti aglawlawko, tangay nagadu ti retrato ken mapa ti Antarctica a naka-display iti studiok. Pagyamanan unay iti artikulo!
C. M., Estados Unidos