Manipud Kadagiti Agbasbasa
Chemical Sensitivity Agtawenak iti 17, ket kayatko ti agyaman kadakayo gapu iti serye nga “Inaldaw a Mausar a Kemikal—Pagsakitendaka Kadi?” (Agosto 8, 2000) Nabiit pay a nadayagnos nga addaanak iti multiple chemical sensitivity (MCS), ket makapabang-ar unay a maammuan a saan la a sisiak ti agsagsagaba kadagiti kasta a nakababain a sintoma.
S. C., Italia
Makaispal biag ti impormasion dagiti artikulo nga impablaakyo iti tema a “Pagsakitennakayo Kadi ti Polusion?” (Nobiembre 8, 1983) Daytoy a nakaro a sakit ti makagapu a saankami a makipaspaset iti napateg a pannakitimpuyog iti naespirituan a pamiliami ken kadagiti sosial nga aktibidad. Nupay kasta, dayta ket maysa a sakit a di makagutugot iti aniaman a pannakaawat wenno panangngaasi. Dineskribir dagiti kabaruan nga artikuloyo ti agpayso a rikna dagiti agsagsagaba.
M. J., Francia
Nasurok a makatawen a nagsakitak sakbay a nakasarakak iti doktor a nakatulong kaniak. Kabayatan daytoy a tiempo, naanus ken saan a manangbabalaw dagiti gagayyemko, ngem makunak a talaga a saanda idi a maawatan. Isu nga agyamanak gapu kadagitoy nga artikulo. Nagsayaat ti agbalin a paset ti maysa nga organisasion a nalawlawagan iti nagadu a banag.
S. B., Estados Unidos
Agsagsagabaak iti MCS ket ita pay laeng a nakabasaak iti kasta a kompleto, balanse unay a panangilawlawag iti dayta a sakit ken dagiti epektona. Nagustuak ti “reseta” nga ayat ken panagkatawa kas tulong iti panangdaer. Praktikal met dagiti palagip nga agbalinak a nainkalintegan kadagiti namnamaek iti tattao.
D. G., Estados Unidos
Kas maysa kadagiti Saksi ni Jehova, sangapulo a tawenen nga agserserbiak kas agdaldaliasat a ministro ken talaga nga adun ti naam-ammok nga agsagsagaba iti MCS. Nagbatad nga agpayso daytoy a sakit ken saan a mapampanunot laeng. Kas iti gagangay, saan laeng a dineskribir ti Agriingkayo! ti sakit no di ket nangted kadagiti praktikal a singasing no kasano a maipakita ti kinaanus, panagayat, ken kinaasi kadagiti agsagsagaba.
T. M., Estados Unidos
Panangarkos iti Bagi Nagsuratak tapno komentuan ti artikuloyo a “Ti Panangmatmat ti Biblia: Panangarkos iti Bagi—Nasken ti Kinanainkalintegan.” (Agosto 8, 2000) Napintas ti de kalidad a panangarkos iti bagi—maysa a pudno a gapuanan ti arte. Mabalin nga ipato ken klasipikarennak ti kagimongan babaen ti langak, ngem ammok nga iti imatang ti Dios, maipatpategak. Mangnamnamaak ken ikarkararagko a saan a dagiti tatok ti pangibasaran dagiti tattao iti kinasiasinok no di ket ti agpayso a kinataok.
K. M., Estados Unidos
Binigbig ti artikulo a personal a desision no ikeddeng man ti maysa a tao nga arkosan ti bagina wenno saan. Nupay kasta, ti maysa a pamay-an a maipakita ti maysa a tao ti kinapintas ti kinataona ket babaen ti ‘panangarkos iti bagina iti kinaemma ken kinasimbeng ti panunot.’ (1 Timoteo 2:9) Ibatad met ti Biblia a rebbengen ti maysa a Kristiano nga ikabilangan saan laeng a ti mismo a konsiensiana no di ket ti konsiensia ti “sabali a tao.” (1 Corinto 10:29)—ED.
Lenguahe Pagyamanan iti artikulo a “Dagiti Lenguahe—Rangtay ken Lapped ti Komunikasion.” (Agosto 8, 2000) Kanayon a magustuak ti nadumaduma a lenguahe, ket lima a lenguahe ti Europa ti nasursurokon. Madama nga ad-adalek ita ti Sinhala. Ngem ti pakaragsakak ket ti panagadal iti lenguahe ti mamagbalin a posible a maawatak ti dadduma a kultura ken mairanudko ti “nasin-aw a pagsasao” nga isursuro ti Biblia!—Sofonias 3:9.
C. B., Italia
Panagladingit Agyamanak kadakayo gapu iti artikulo a “Rumbeng Kadi nga Iyebkas ti Panagladingit?” (Agosto 8, 2000) Apresiarenmi unay ti tema agsipud ta natay ti baromi tallo a tawen ti napalabasen. Uray no agsangit ken agladingitkami pay laeng, dagiti artikulo a kas iti daytoy ti mangpabileg kadakami nga agtultuloy nga agibtur.
J. A. ken L. A., Estados Unidos