Panamagbalin a Nabunga iti Langalang a Daga
BABAEN TI MANNURAT TI AGRIINGKAYO! IDIAY INDIA
Kasano a mapagbalintayo a nabungbunga dagiti langalang a lugar ti Ladakh, iti makin-amianan a distrito ti India? Sangkapanunot idi ti retiradon a civil engineer a ni Tsewang Norphel dayta a saludsod. Imbes nga Abril a di matutudo ken kasapulan dagiti mannalon ti padanum kadagiti talonda, mangrugi nga agayus ti narunaw a yelo nga aggapu kadagiti natural a glacier nga adda iti ngatuen ti Himalaya Mountains no bulan ti Hunio. Nakapanunot ni Norphel iti nainsiriban a solusion: Agaramid iti artipisial a glacier iti nababbaba a disso, a pangrugian ti pannakarunaw ti yelo iti nasapsapa a paset ti tawen.
Sigun iti magasin ti damdamag idiay India a The Week, binalbaliwan ni Norphel ken ti kakaduana ti pagayusan ti maysa a waig iti bantay tapno maiturong dayta iti inaramid ti tattao a 200 a metro a kanal nga addaan iti 70 a pagayusan. Manipud kadagitoy, sibabannayat ken kontrolado ti panagayus ti danum iti bakras ti bantay ken tumangken sakbay a makadanon kadagiti manglapped a pader a naibangon iti makimbaba a paset ti bakras. In-inut a mapataud ti artipisial a glacier, a mangkalub inton agangay kadagiti pader. Tangay masalinongan ti bantay, marunaw laeng ti glacier no Abril a nabara ti temperatura. Dayta ti mangsuplay iti kasapulan unay a padanum iti dayta a panawen.
Nagballigi kadi ti kapanunotan a panangaramid iti artipisial a glacier? Kinapudnona, napaneknekan a praktikal unay ti napanunot ni Norphel, isu a sangapulo a kakasta a glacier ti naaramid idiay Ladakh, ken madaman ti pannakaiplano ti ad-adu pay. Ag-34 a milion a litro ti danum ti mapataud ti maysa a kasta a glacier, a naaramid iti kangato nga 4,500 a pie. Mano ngay ti nagastos? “Agarup dua a bulan ti kabayag ti pannakaaramid ti artipisial a glacier ken makagastos iti Rs 80,000 [$1,860], a kaaduanna ket pangsueldo kadagiti obrero,” kuna ti magasin a The Week.
Talaga a makagunggona ti pannakaammo ti tao, no mausar a siuumiso. Panunotem laengen ti maaramidanto ti sangatauan iti sidong ti panangiwanwan ti nailangitan a Pagarian ti Dios! Ikari ti Biblia: “Ti let-ang ken ti awanan danum a rehion agragsakdanto, ket ti desierto a tanap agrag-onto ken agsabong a kas iti safron . . . . Iti let-ang pimsuakton ti dandanum, ken ti naapres nga ayus iti desierto a tanap.” (Isaias 35:1, 6) Anian a makaparagsakto ti makipaset iti pannakapapintas ti dagatayo!
[Picture Credit Lines iti panid 31]
Mountain High Maps® Copyright © 1997 Digital Wisdom, Inc.
Arvind Jain, The Week Magazine