Ti Torre ti Crest
BABAEN TI MANNURAT TI AGRIINGKAYO! IDIAY FRANCIA
NADUMADUMA ti sukog ken kadakkel dagiti historiko a torre, ken adun ti nakausaranda. Naaramid ti dadduma tapno masalakniban dagiti estratehiko a disso, ket nausar ti dadduma kas pagbaludan. Nupay kasta, kaaduan ket pagpasiaran itan dagiti turista. Nausar kadagiti tallo a nadakamat a panggep ti agdindinamag a torre iti bassit nga ili ti Crest iti takdang ti Karayan Drôme idiay abagatan a daya ti Francia.
Gapu iti kinadakkel ti Torre ti Crest, makita dayta uray iti adayo. Ag-52 a metro ti kangato ti makin-amianan a daya a sikiganna, ket maysa dayta kadagiti kangangatuan a pasdek ditoy Francia. Manipud iti pantok, talaga a nangayed ti namarangmang a buya ti katurturodan iti arisadsad ti kabambantayan ti Vercor, Ardèche, ken ginget ti Rhone.
Saan nga eksakto a maammuan no kaano wenno apay a naipasdek ti torre, ngem idi damo nausar dayta kas sarikedked. Kabayatan ti Krusada dagiti Albigenses idi maika-13 a siglo, dayta a kastilio ket rinaut dagiti Katoliko a tropa ni Simon de Montfort, a tinulongan ti adu a Katoliko nga obispo. Idi agangay, nausar dayta a base iti pannakilaban kadagiti Albigenses.
Kabayatan Dagiti Gubat ti Relihion (1562-98), ti kastilio ket namin-adu a rinaut dagiti Protestante ngem dida pulos natagikua. Dandani nadadael a naan-anay ti torre idi 1633, idi narebba ti amin malaksid ti kalalagdaan ken katatalgedan a pasetna babaen ti bilin ni Ari Louis XIII. Nanipud idi, nausar daytan kas pagbaludan dagiti Huguenot agraman dagiti gagangay a kriminal ken bumusbusor iti monarkia. Nairana ti pannakaibalud dagitoy a Pranses a Protestante idi a ti Pammilin iti Nantes, a nangyeg bassit iti narelihiosuan a kinamanagpabus-oy ditoy Francia, ket in-inut a saanen a naipatungpal. Makita pay laeng kadagiti pader ti pagbaludan ti insurat ti sumagmamano kadagitoy a balud gapu iti relihion.
Maysa itan a historikal a monumento ti Torre ti Crest. Iti kada tawen, adda promedio a 30,000 nga agpasiar iti dayta. Idi 1998, nairaman dayta kadagiti okasion a nanglagip iti maika-400 nga anibersario ti Pammilin iti Nantes. Dagiti paderna ti nakalkaldaang a pammalagip iti mabalin a mapasamak no maipalubos a tumaud ti narelihiosuan a di kinamanagpabus-oy.