Ti Panangmatmat ti Biblia
Ni Jehova Kadi ti Dios ti Tribu Dagiti Judio?
ITI adu a pagilian kadagitoy a panawen, nainaig unay ti nagan a Jehova iti moderno-aldaw nga organisasion dagiti Saksi ni Jehova. Nupay kasta, daytoy a nagan ket makita kadagiti patarus iti sumagmamano a Biblia nga us-usaren dagiti relihion malaksid kadagiti Saksi ni Jehova. Kinapudnona, rinibribu a tawenen a maus-usar ti nagan a Jehova kas irepresentar ti Tetragrammaton.
No dadduma, maawagan ni Jehova a “ti Dios ti Israel.” (1 Cronicas 17:24) Dagitoy a sasao ti makagapu a patien ti dadduma a ni Jehova ket maysa laeng a lokal a dios ti tribu a nalabit inadaptar dagiti Hebreo manipud iti dadduma a kultura wenno inimbentoda a mismo. “Idi unana, naibilang [ni Jehova] nga agresibo unay a dios ti tribu dagiti Israelita,” kuna ni Karen Armstrong, ti nagsurat iti libro a A History of God. “Idi agangay, dagiti mammadto ti Israel . . . , idi agarup maikapito ken maikanem a siglo K.K.P., pinagbalinda daytoy a dios ti tribu a simbolo ti di madeskribir ti tattao a katan-okan a persona.”
Pinanggep ti adu a narelihiosuan a historiador nga ammuen no nagtaud ti nagan a Jehova kadagiti Canaanita wenno Egipcio. Ikalintegan ti dadduma a daytat’ “daan a nagan ti tribu” ken saanna a tuktukoyen ti Dios a maisursuro iti “Baro a Kasuratan.” Agpayso kadi dayta? Ania ti ipalgak ti naannad a panagbasa iti Biblia?
Ni Jehova—Ti Dios ti Amin a Tattao
Bigbigen ti Biblia ti nasinged a pannakilangen ni Jehova iti nasion ti Israel. Ngem saan a dayta ti rason tapno isut’ ibilang a basta dios ti tribu. Inyimtuod ti Kristiano nga apostol a ni Pablo: “Isu aya ti Dios dagiti Judio laeng? Saan aya a kadagiti met tattao iti nasnasion?” Ania ti nalawag a sungbat ni Pablo? “Wen, kadagiti tattao iti nasnasion met.” (Roma 3:29) Siasino ti Dios a dinakamat ni Pablo? Bueno iti isu met la a suratna kadagiti taga Roma, namin-19 a daras a mabasa ti nagan a Jehova. Kinuna ti apostol, a nangadaw iti kinuna ti Hebreo a mammadto idi ugma a ni Joel, a saan laeng a dagiti Judio no di ket “tunggal maysa nga umawag iti nagan ni Jehova maisalakanto.”—Roma 10:13; Joel 2:32.
Saan a pinili dagiti Israelita ni Jehova kas ti Diosda; imbes ketdi, ni Jehova ti nangpili kadakuada tapno maibanag ti panggepna—nga isu ti pannakaisagana ti dalan ti Mesias. Maysa pay, agpannuray kadagiti umili ti pagtungpalan ti dios ti tribu. No maparmek ti tribu, maabak met ti diosda. Saan a kastoy ti mapasamak ken Jehova.
Ti tulag ni Jehova ken ni Abraham—a natungpal adu a siglo sakbay ti panawen Kristiano—inkarina dagiti bendision kadagiti tattao iti amin a nasion, a pakakitaan iti pannakaseknan ti Dios iti intero a sangatauan. (Genesis 12:1-3; Aramid 10:34, 35; 11:18) Impakita ti Israelita a ni Ari David, a ni Jehova ti makinkukua saan laeng nga iti daga ti Israel: “Kukua ni Jehova ti daga ken ti linaonna, ti nabunga a daga ken dagidiay agnanaed iti dayta.”—Salmo 24:1.
Idi indedikar ti anak ni David a ni Solomon ti templo a pagdaydayawan ken Jehova idi agangay, impakitana nga adda pamay-an a makaadani ken ni Jehova dagiti napakumbaba a tattao iti aniaman a nasion. Iti mangidedikar a kararagna, kinuna ni Solomon: “Kasta met iti ganggannaet, a saan a paset ti ilim nga Israel ken pudno nga umay manipud adayo a daga . . . ket agkararag a sisasango iti daytoy a balay, sika umimdengka koma manipud langlangit, ti naipasdek a disso a pagnanaedam, ket aramidemto ti maitunos iti isuamin nga umawagan kenka ti ganggannaet; tapno amin dagiti ili ti daga maammuanda ti naganmo tapno agbutengda kenka a kas met laeng ti panagbuteng ti ilim nga Israel.”—1 Ar-ari 8:41-43.
Nailaksid ti Israel
Maipapan iti relasion ti Israel ken Jehova, insurat ni Propesor C. J. Labuschagne: “Iti intero a pakasaritaan ti Israel, namin-adu a napasaranna a makapagtignay ti Dios ti ‘nasion’ iti wagas a mangipakita a dina anamongan ti nasion, ken no dadduma busorenna pay dayta.” Idi inlaksid ti Israel ti Mesias idi umuna a siglo, inlaksid ni Jehova dayta a nasion.
Nupay kasta, intultuloy latta nga inusar dagiti Kristiano ti nagan a Jehova. Bayat a rumangrang-ay ti kongregasion Kristiano, nagbalin a miembrona dagiti tattao iti amin a nasion. Iti panangidaulona iti maysa a Nakristianuan nga asamblea idiay Jerusalem, nasao ti Judio nga adalan a ni Santiago a ti Dios “inturongna ti asikasona kadagiti [saan a Judio a] nasion tapno mangala kadakuada iti ili a maipaay iti naganna.” Kas ebidensia a natungpalen daytoy, nagadaw ni Santiago iti maysa a padto iti libro nga Amos a pakakitaan iti nagan a Jehova.—Aramid 15:2, 12-18; Amos 9:11, 12.
Maseknan ken Paraburanna ti Amin
Tapno lalo a mapasingkedan ti kinasapasap ti kina-Dios ni Jehova, kastoy ti insurat ni Pablo: “Awan ti pagdumaan ti Judio ken Griego, ta adda ti isu met laeng nga Apo iti isuamin, a nabaknang kadagidiay amin nga umaw-awag kenkuana.” (Roma 10:12) Wen, mabalin nga umawat iti parabur ni Jehova ti intero a natulnog a sangatauan.
Kadagiti amin a matalek ken natulnog nga annakna a tattao—aniaman ti nasionalidad wenno pulida—adda nadayag a masakbayan nga ikarkari ni Jehova. Deskribiren ti Saona ti kakasta a tattao kas “dagiti matarigagayan a banag dagiti amin a nasion.” (Haggeo 2:7) Maam-ammo dagitoy a tattao ni Jehova ket isut’ masursuroda nga ayaten. Kastoy ti kuna ti maudi a libro iti Biblia maipapan kadakuada: “Amin dagiti nasion umaydanto ket agdaydayawda iti sanguanam [Jehova], agsipud ta naiparangarang dagiti nalinteg a bilinmo.”—Apocalipsis 15:4.
[Ladawan iti panid 20]
Ni Moises a mangig-iggem iti Sangapulo a Bilin