Manipud Kadagiti Agbasbasa
Kinakuttong Makapainteres unay kaniak ti artikulo nga “Agimtuod Dagiti Agtutubo . . . Apay a Nakakutkuttongak?” (Setiembre 22, 2000) Maysaak a babai nga agtawen iti 32, ngem nakakutkuttongak latta isu a mabainak unay gapu iti itsurak. Sangkasurondak ket panaganandak iti Palito ken Karantiway. Gapu iti daytoy, masansan a maldaangak. Nagustuak ti kinunayo nga agsapulkami kadagiti tattao a mangipateg iti kinataomi. Saan koma a tagibassiten dagiti Kristiano ti dadduma gapu iti kasasaad ti bagida.
W. L., Estados Unidos
Genetic Engineering Itay rabii, binasak ti serye a “Makapataudto Ngata ti Siensia iti Perpekto a Kagimongan?” (Setiembre 22, 2000) Intugotko dayta iti panggedak, a nagresulta iti nagsayaat a saritaanmi ken ni amok a maysa a doktor. Dagiti ilustrasion ket talaga a makagutugot iti panagpanunot ken panangapresiar. Pagyamanan iti panawen, panagregget, ken panagpanunot a sibabatad a naipakat iti tunggal ilustrasion.
N. M., Estados Unidos
Pagyamanan iti panangilawlawagyo iti komplikado unay a suheto iti wagas a maawatan ti amin. No ikeddeng dagiti sientista no siasino ti mabalin nga agputot ken aganak ken no siasino ti “di maitutop,” am-amirisenda ngata dagiti kababalin a kas iti ayat, asi, ken panangapresiar kadagiti naespirituan a banag? No nalalaing ken nasalsalun-at ti maysa a tao, dina kaipapanan nga isut’ naim-imbag. Nupay kasta, adda saludsodek. Apay a maawagan a sakit ti kinakannigid?
J. C., Estados Unidos
Ti mayim-imtuod ket naadaw iti libro a “The Biotech Century.” Ti sao a “sakit” ket addaan kadagiti marka a pagkotar, wenno quotation mark, a mangipakita a makapasagibar ti panangusar ti autor iti dayta. Itampok dayta ti sumagmamano kadagiti karit a nainaig iti nasayaat a kababalin a patauden ti genetic engineering. Adda peligro a babaen ti pannakabalin a mangbalbaliw iti genetic code ti tao, nalabit addanto ti sumagmamano a di nainkalintegan a mangibaga a di matarigagayan ti kolor ti kudil wenno kinakannigid ti maysa a tao.—ED.
Nupay diak paborito nga asignatura ti siensia, dagiti artikulo tinignayda ti pusok. Nainaig ti eugenics kadagiti imperpekto a kalikagumanda ti kinaperpekto. No maragpatdanto man ti pampanunotenda, mabalin a maibilangto a “nanumo” dagiti masakit ken baldado. Saan ngaruden a maipakitaan iti asi dagita a tattao. Maisupadi iti dayta, ikari ti Dios a pagbalinenna a perpekto ti tao inton Milenio. (Apocalipsis 20:4, 5) Ngem aramidennanto dayta a dina biangan ti wayawayatayo nga agpili.
S. O., Japan
Ti Uniberso Pagyamanan unay iti serye a “Ti Uniberso—Nairana Aya a Rimsua?” (Oktubre 8, 2000) Addaak iti umuna a tawenko kas estudiante ti biolohia, ket kasla libro no basaek dagiti artikulo—ngem naisurat nga addaan iti tema maipapan iti masirib a Namarsua imbes nga iti teoria ti ebolusion. Anian a makapabang-ar a mabasa daytoy nga impormasion iti umiso ken nainkalintegan a pamay-an!
K. L., Estados Unidos
Pakasaritaan ti Biag Naparegtaak unay iti artikulo a “Ti Kangrunaan a Pakaseknak—Panagtalinaed a Nasungdo” (Oktubre 8, 2000) a pakasaritaan ni Alexei Davidjuk. Inlawlawag ni Alexei a ti tao a nagtalkanna iti adu a tawen ti nangliput kadagiti naespirituan a kakabsatna. Kasta met la ti napasamak kaniak sumagmamano a tawenen ti napalabas idi nga imparit ti gobierno ti Nakristianuan a trabahomi. Dagiti detalye ti trabahomi ket inted ti dua a “panglakayen” iti sekreta. Gapu iti dayta, naaresto ken napalutpotkami. Natayen ti maysa kadagitoy a maaw-awagan kakabsat. Ti maysa ket nailaksid iti kongregasion. Nupay kasta, nabiit pay a naisubli. Anian a yamanko ta mabalinen a kablaawak daytoy a kabsat a diak mariknan ti aniaman a gura! Daytat’ maaramid laeng babaen ti espiritu ni Jehova.
D. G., Alemania