Manipud Kadagiti Agbasbasa

Edukasion Nagsuratak tapno iyebkas ti panagyamanko gapu iti serye nga “Adal a Mangiturong iti Nasaysayaat a Biag.” (Disiembre 22, 2000) Talaga nga impakitana no kasano nga ikagkagumaan ni Jehova, babaen ti organisasionna, a tulongan ti amin a tattao a nalinteg ti panagpuspusoda. Natukayak idi nabasak no kasano nga imbrodkas ti lokal nga estasion ti telebision ken dagiti periodiko ti pannakairuar ti Agriingkayo! iti lenguahe a Samuano. Inyilustrarna ti pannakatungpal dagiti imbaga ni Jesus iti Aramid 1:8: “Dakayto dagiti saksik . . . agingga iti kaadaywan a paset ti daga.”

J. D., Estados Unidos

Pimmanaw nga Amma Agtawenak iti 15 ket naimpusuan nga agyamanak kadakayo gapu kadagiti artikulo ti “Agimtuod Dagiti Agtutubo . . .” nga “Apay a Pinanawannakami ni Tatang?” (Nobiembre 22, 2000) ken “Kasanoak a Makadaer Ita ta Pinanawannakamin ni Tatang?” (Disiembre 22, 2000) Agkakanat dagiti riknak manipud unget agingga iti panagladingit ken panagleddaang. Impakita dagiti artikulo a saan la a sisiak ti adda iti kastoy a kasasaad ken talaga a gagangay laeng dagiti marikriknak. Pangngaasiyo ta itultuloyyo ti agsurat kadagiti kasta a nagsayaat nga artikulo.

S. L., Alemania

Sangapulo ti tawenko ket para kaniak, kasla inur-uraykon dagitoy nga artikulo iti intero a panagbiagko! Nagkaro ti panagsagabak idi pinanawannakami ni Tatang. Dimteng dagiti artikulo iti umiso a tiempo.

M. D., Alemania

Pakasaritaan iti Biag Pagyamanan iti artikulo a “Naipaayan iti Namnama a Mangpabpabileg Kaniak.” (Disiembre 22, 2000) Adda im-impenek a gura ken ni tatangko agsipud ta nanipud idi ubingak, nakitak ti panangabusona ken ni nanangko. Ammok a dakes ti gumura, ngem nagrigat a kontrolen dagiti riknak. Ngem nabasak no kasano nga inkagumaan ni Tatjana Vileyska a parmeken ti gurana iti lalaki a pimmatay ken ni nanangna. Kayatko a tuladen isuna.

A. K., Japan

Nakasangitak a nangbasa iti nakalkaldaang a kapadasan ni Tatjana Vileyska idi naulila kadagiti dadakkelna. Kanayon nga ipalagip kaniak dagita a personal a kapadasan nga adu a tattao iti intero a lubong ti sibaballigi a mangib-ibtur kadagiti nagkaro a pakarigatan ket makasarakda iti rag-o agpapan pay kadagiti sagsagabaenda.

J. R., Estados Unidos

Kabasbasak ti makapainteres unay a pakasaritaan ni Tatjana Vileyska. Ti pakasaritaanna ket maysa kadagiti diakto malipatan. Ti napasaranna sakbay a naammuanna ti kinapudno iti Biblia ngem kaskasdi a nakalasat ken naragsak pay laeng ket talaga a maysa a kita ti naespirituan a milagro.

S. S., Estados Unidos

Panangsalbar iti Panagasawa Naimpusuan nga agyamanak kadakayo iti serye ti Agriingkayo! nga Enero 8, 2001, a “Mabalinmi Kadi a Salbaren ti Panagasawami?” Makatawenen ti napalabas, addada idi problema iti relasionmi nga agassawa. Agpadpadakami a dimmakkel iti pagtaengan a kanayon nga adda panagpungtot. Isu a makaisawangkami iti sasao a talaga a makapasair iti tunggal maysa kadakami, ket saan idi a makontrol dagiti kasasaad. Nupay kasta, rinugianmin nga iyaplikar dagiti prinsipio ti Biblia, isu a nakaragragsakkami itan.

R. O., Estados Unidos

Kas maysa a panglakayen iti kongregasion, naamirisko a ti maysa kadagiti makapakarit unay a kasasaad a sarsarangtek ket isu ti panangikagumaak a tumulong kadagidiay makarikna a nasiluanda iti awanan ayat a panagasawa. Tapno makasiguradokami, nagadu ti insaganami a Nainkasuratan a pammagbaga babaen kadagiti publikasion iti adun a tawen. Nupay kasta, idi nakitak ti akkub ti magasin, naamirisko nga umdas daytan tapno maipaaymi ti direkta a tulong kadagita a pagassawaan. Naipaay dagiti artikulo ti ninamnamak!

L. R., Estados Unidos