Ti Kanta iti Ayat Dagiti Kuriat
ITI kaatiddogna a dua wenno kurang pay a dua a pulgada, nalabit manmano ti maallukoy iti maysa a kuriat. Nupay kasta, minilion a tattao iti intero a lubong ti maallukoy iti kanta daytoy a kuriat. Kasano ti panagkanta daytoy bassit a parsua, ken ania ti panggepna?
Makapainteres ta iti dandani 2,400 a klase ti kuriat, dagiti laeng kalakian ti agkanta. Imbes a ti karabukobda ti pagkantada, pagkanta dagiti kalakian a kuriat dagiti payakda. Ilawlawag ti maysa nga ensiklopedia a pasinggiten dagiti kalakian a kuriat ti unida babaen ti panangrisiris iti paset ti maysa kadagiti makinsango a payakda iti naintar nga agarup 50 agingga iti 250 a tadol ti kabatogda a makinsango a payak. Ti kapigsa ti panagunida ket agpannuray iti bilang dagiti tadol a masagid iti kada segundo. Dagiti panagpigerger ti mangikallangogan iti naisangsangayan a kanta ti kuriat.
Ngem sigurado a saan nga agkanta ti kalakian a kuriat tapno liwliwaenna laeng dagiti dumdumngeg a tattao! Talaga a saan! Ti agbalinto nga asawana ti nangirantaan daytoy a musiko iti kantana. Ilawlawag ti libro nga Exploring the Secrets of Nature: “Gapu iti panagbirokna iti asawa, adda tallo a nadumaduma a kantaen ti nasigo a makikomunikar a kalakian a kuriat: maysa ti mangipakaammo iti kaaddana, maysa ti agarem ken maysa ti mangbugaw kadagiti karibalna.” Agtultuloy ti dadduma a kuriat nga agkanta tapno ipakaammoda ti kaaddada agingga a mangipakita ti kabaian a kuriat iti interes. No mangngegna ti kanta babaen kadagiti “lapayag” nga adda iti kamaunana, saan a kontento ti kabaian a makiinnarem iti adayo. No umadanin ti kabaian iti agkankanta, rugianen ti kalakian a kantaen ti agtultuloy a kanta ti panagarem. Daytoy a panangtapat ti pakaallukoyan ti kabaian iti agar-arem kenkuana, isu nga agnaigen ti dua a kuriat.
Iti Makindaya nga Asia, agtartaraken ti dadduma a tao kadagiti kalakian a kuriat ta magustuanda ti panagkanta dagitoy. Kaykayat ti dadduma a denggen ti kasta a musika iti gagangay a pagtaengan dagiti kuriat. Iti aniaman a kasasaad, ti kanta ti bassit a kuriat allukoyenna dagiti umimdeng a tattao iti intero a lubong ken idayawna ti Nangdisenio kenkuana.