Manipud Kadagiti Agbasbasa
Dagiti Nars Maysaak a nars iti dandanin tallo a tawen. Talaga a saan a nalaka ti direkta a panangtaming iti sakit ken panagsagaba. Anian a makaparegta a mabasa iti serye a “Dagiti Nars—Kasanotayo Ngata no Awanda?” (Nobiembre 8, 2000) nga adda dagiti mangapresiar iti trabahomi! Ad-adda pay a makaparegta ti kari ti Biblia nga asidegen a saanton a kasapulan ti serbisio dagiti nars.—Isaias 33:24.
J.S.B., Brazil
Tartarawidwidanmi ken ni lakayko ti maysa nga ahensia nga agay-aywan kadagiti pasiente a di naidalit iti ospital, isu a naparegtakami unay iti daytoy a serye. Tinulongannakami a mangpasayaat iti kababalinmi iti propesionmi ken kadagiti pasientemi. Nagsayaat ti artikuloyo!
S. S., Alemania
Kanayon idi a pagarupek a saan unay a napateg ti akem dagiti nars. Ngem dagitoy nga artikulo ti nangipaamiris kaniak a makatulong dagiti nars a mangliwliwa iti kaaduan a pannakaaburido, ket masansan a makaipaayda iti pannakaawat ken panangandingay a di maipaay dagiti makumikom a doktor. Nangipatulodak iti kopia daytoy a magasin iti sumagmamano kadagiti dati a kaklasek iti kurso a kinanars.
F. G., Italia
Pagyamanan kadagitoy mannakipagrikna nga artikulo. Ti kinanars ti nakatulong kaniak nga agmataengan iti adu a pamay-an. Dayta ti maysa kadagiti nakatignayak a mangutob iti panggep ti biag ken agadal iti Biblia. Daytoy a ruar ti Agriingkayo! ti kangrunaan pay laeng a naawatko nga ebkas ti apresasion. Maparegtaakto a kanayon iti dayta!
J. D., Czech Republic
Agyamanak iti daytoy a serye. Adu a tawenen a maysaak a rehistrado a nars. Maasianak kadagiti pasiente nga uray la a makasangitak no ikkak idan iti agas a maipatedted iti matada. Siguradok a magustuan dagiti nars iti intero a lubong daytoy nga Agriingkayo!
L.A.R., Estados Unidos
Dagiti Ngipen ti Maladaga Kas paset ti trabahok iti klinika ti dentista, suruak dagiti inna no kasano nga aywanan dagiti ngipen ti maladagada. Dakkel ti naitulong ti artikulo a “Panangsalaknib Kadagiti Delikado a Ngipen” (Nobiembre 22, 2000) agsipud ta inlawlawagna ti risgo ti panangpaalsem ken panangdangran dagiti bakteria. Amin nga inna nga agkonsulta kaniak ket makaawat itan iti kopia, isu a nagsayaat dagiti resultana!
T.C.S., Brazil
Dagiti Alusiisen a Saka Kabasbasak ti artikuloyo nga “Alusiisen Kadi Dagiti Sakam?” (Nobiembre 22, 2000) Ag-18 a tawenen nga agsagsagabaak iti daytoy, ket impagarupko idi a sisiak ti agsagsagaba. Agkarasangitak idi gapu iti pannakaupay ken kurang a turog, ket addaanak iti amin a klase ti agas. Siempre, ti naan-anay a solusion ket ti Pagarian ni Jehova.
S. T., Scotland
Idi binasak daytoy nga artikulo, nasdaawak gapu ta eksakto a dineskribirna dagiti sintomasko. Nupay ti kasasaadko ket saan pay a nadayagnos kas Restless Legs Syndrome, maliwliwaak itan a makaammo a kasta met laeng ti ib-ibturan ti dadduma. Madaman a sursuruek no kasano nga ad-adda a maibturak ti kasasaadko ngem iti napalabas. Gapu ta ammokon no kasano a tamingen dagiti di makaay-ayo a kasasaad, nalaklakan nga amang ti panangdaerko iti dayta.
A. K., Japan
Agtawenak iti 43 ket kaskasdi a mariingak no rabii gapu ta mariknak nga adda agkarkarayam kadagiti gurong ken takiagko. Sakbay a binasak daytoy nga artikulo, impagarupko a sisiak laeng idi ti agsagsagaba iti kastoy. Diak impagarup nga adda met gayam dadduma pay nga agsagsagaba a kas kaniak. Agyamanak unay iti panangimaldityo kadagiti artikulo a kas iti daytoy a mangilawlawag iti sabsabali maipapan kadagitoy karkarna a kasasaad.
D. L., Canada