Adda Tumultulong iti Sadinoman
NAGSAYAAT ti pangusaran ni Baxter, maysa a 15-anyos nga estudiante iti haiskul, iti tiempona no malem ti Sabado. Sarungkaranna ti grupo dagiti lallakay ken babbaket sa agtokar ken idauluanna ti panagkakanta iti pagtaengan dagiti retirado. “Pagkatawaen, paragsaken ken pagrag-oenna dagiti agtataeng sadiay,” kuna ti maestro ni Baxter. Kasta met la ti ar-aramiden ti 78 ti tawenna a ni Lucille. Agiwaras iti taraon kadagiti agkasapulan ken sumarungkar kadagiti malmalday a pasiente idiay ospital. Kastoy ti kuna ti gayyem ni Lucille maipapan kenkuana: “Sidadaan a tumulong no adda agkasapulan ti tulong.”
Depinasion ti Panagboluntario
Ti kastoy a panagbiag—‘Sidadaan a tumulong no adda agkasapulan ti tulong’—ket ar-aramiden ti minilion a tattao iti intero a lubong. Tumultulongda kadagiti pagibangonan ken kadagiti opisina, paktoria, balay a pagtaraknan, hospisio, kampo dagiti nagbakuit, pagnaedan dagiti awanan pagtaengan, departamento dagiti bombero, opisina a mamalbalakad kadagiti marigatan, pagtaraknan kadagiti animal, ken dadduma pay. Addada iti dandani amin a lugar! Us-usarenda dagiti paglainganda iti nadumaduma a trabaho kas iti pannakigamal ken panangurnong kadagiti pondo ken kasta met ti panangaywan kadagiti nabaybay-an a maladaga ken panangliwliwa kadagiti masakit a din maimbagan. Boluntarioda—tattao nga agar-aramid iti naimbag kadagiti agkasapulan.
Ti panagboluntario ket nadeskribir a kas “natungpal a natan-ok a plano.” Ramanenna ti pannakikumit iti maysa a panggep, panagsakripisio a di matangdanan, ken panangisakit iti sabsabali. “Ti panagboluntario,” kuna ti dua a nabayagen a boluntario, ket “panangipaay iti bagimi: tiempo, saka, ima, panunot, abilidad, kinasigo a mangrisut iti problema ken ti propesional a pannakaammomi a tumulong iti sabsabali.” Makapainteres ta makagunggona met kadagiti boluntario a mismo ti kasta a panangipaay.—Kitaem ti kahon a “Magunggonaan Met Dagiti Boluntario.”
Umad-aduda—Umad-adu ti Kasapulan
Idiay Estados Unidos, adda napattapatta a 100 a milion nga agboluntario—ket umad-aduda. Ni Kathleen Behrens a direktor ehekutibo ti organisasion dagiti boluntario iti New York Cares, nabiit pay nga imbagana iti Agriingkayo!: “Agtultuloy ti nakaparpartak nga idadakkel ti organisasionmi. Itay laeng napan a tawen, nasurok a 5,000 a baro a boluntario ti nakipaset iti programami.” Kasta met laeng ti iyaadu ti grupo dagiti boluntario iti Europa. Kas pagarigan, idiay Francia, immadun iti 6 a porsiento iti kada tawen ti bilang dagiti boluntario idi napalabas a dua a dekada. Nupay kasta, immadu ketdi ti kasapulan a boluntario. Maisupadi ketdi, kuna ti United Nations Volunteers (maysa nga ahensia ti UN) a no usigen ti kasasaad iti intero a lubong, “ad-adu ti masapul a boluntario iti kaaldawantayo ngem iti napalabas.” Kuna ti maysa a superbisor ti museo: “Kasapulan unay dagiti boluntario tapno matarawidwidan ti museo.”
Ngem, maisupadi ti kinapudno. Nupay “ipatpateg unay” dagiti direktor, manedyer, ken coordinator dagiti boluntario a makipagtrabaho kadakuada, di maipatpateg ti kaaduan a trabaho dagiti boluntario. Tapno mabalbaliwan dayta a kasasaad, inkeddeng ti United Nations ti tawen 2001 a tiempo tapno maipangpangruna dagiti boluntario. Deskribiren ti kahon nga “Internasional a Tawen Dagiti Boluntario” ti dadduma kadagiti kalat a namnamaen ti UN a maragpat.
Kabayatanna, maar-aramiden ti panagbalbaliw iti trabaho a panagboluntario a mangkarit nga agpadpada kadagiti boluntario ken dagiti mangiturturong iti trabahoda. Nupay kasta, kaskasdi a nagadu pay nga indibidual iti intero a lubong ti situtulok nga agbolboluntario tapno magunggonaan ti sabsabali. Ania ti mangtignay kadakuada a mangaramid iti kasta? Ania ti maar-aramidanda? Ken kasano a maapektaranda ti biagmo?
[Kahon/Ladawan iti panid 4]
Magunggonaan Met Dagiti Boluntario
“Ad-adu, napatpateg ken naragragsak a gunggona ti masagsagrapko iti panangikagumaak a tumulong iti sabsabali ngem iti kanayon panangasikasok iti negosiok,” kuna ni Michael, maysa a paset tiempo a boluntario. Saan la a ni Michael ti makarikna iti kasta. Kastoy ti kuna ni Sharon Capeling-Alakija, maysa nga executive coordinator iti United Nations Volunteers: “Iti intero a lubong, pagaammo unay dagiti tattao nga agboluntario . . . a magunggonaanda unay iti dayta a kapadasan.” Patalgedan ni Dr. Douglas M. Lawson, maysa nga eksperto iti panagboluntario, a natakuatan dagiti managsukisok a “masansan a sumalun-at ken sumayaat ti ugali ti maysa a tao bayat ti sumagmamano la nga oras a panagboluntariona isu a nabirngasan daytoy a ‘Ragsak ti Tumultulong.’” Ket saan la nga apagkanito a rikna ti “ragsak ti tumultulong.” Nasurok a 30 a tawen nga inadal dagiti managsukisok iti Cornell University idiay Estados Unidos ti maysa a grupo ti tattao ket natakuatanda a “naragragsak ken nasalsalun-at dagiti nagboluntario ngem dagidiay di nagboluntario.” Makapainteres ta kastoy ti kuna ti Biblia: “Ad-adu ti kinaragsak iti panangted ngem iti panangawat.”—Aramid 20:35; Proverbio 11:25.
[Kahon/Ladawan iti panid 5]
Internasional a Tawen Dagiti Boluntario
Idi Nobiembre 20, 1997, improklamar ti General Assembly ti United Nations ti tawen 2001 nga “International Year of Volunteers,” (IYV 2001). Sigun iti UN, adda uppat a raragpaten iti daytoy a tawen.
Ad-adda a pannakabigbig Naparegta dagiti gobierno a bigbigenda ti kinapateg dagiti boluntario babaen ti panangadal ken panangirekordda kadagiti nagapuananda ken panangipaay iti gunggona kadagiti naisangsangayan nga inaramid dagiti boluntario.
Ad-adu a linteg a mangitandudo iti panagboluntario Kas pagarigan, maidagadag kadagiti pagilian nga iparegtada ti panagboluntario, babaen ti panangakseptar iti panagboluntario kas sandi ti panagserbi iti militar wenno di panagbayad iti sumagmamano a buis.
Panagririnnanud iti impormasion ken serbisio Naawis ti media a mangipablaak kadagiti nagsayaat a nagapuanan ti panagboluntario. Kas resultana, mabalin a tuladen ti kasta a proyekto, “a din ikagumaan manen ti lokal a komunidad ti mangaramid iti bukodda a programa ken proyekto.”
Publisidad Maparegta dagiti organisasion ti boluntario a mangyurnos kadagiti eksibision a mangipakaammo iti publiko kadagiti magunggona ti kagimongan iti panagboluntario.
Namnamaen ti UN a ti IYV 2001 ket agbanagto iti ad-adu a panagkalikagum iti serbisio dagiti boluntario, iyaadu dagiti agboluntario, ken ad-adu a pondo ken pasilidad dagiti organisasion ti boluntario tapno mataming ti umad-adu a pakasapulan ti kagimongan. Addan 123 a gobierno a nangisponsor kadagiti raragpaten daytoy a resolusion ti UN.