Mangyeg Kadagiti Bendision ti Panagboluntario
1. Kasano nga impakita da David ken Nehemias ti kinamasindadaanda nga agboluntario?
1 Idi inumsi ni Goliat ti buyot ti Israel, awan kadagiti soldado ti nagboluntario a lumaban kenkuana. Ngem maysa nga agtutubo a pastor, a saan a nasanay a makigubat, ti nagboluntario a lumaban. (1 Sam. 17:32) Idi nagsubli idiay Jerusalem dagiti naidestiero a Judio ngem saanda a naibangon manen dagiti pader, maysa nga agaw-awit iti kopa ti ari iti Persia ti nagboluntario a mangpanaw iti nangato a saadna iti palasio tapno mapan idiay Jerusalem ket organisarenna ti trabaho. (Neh. 2:5) Agpada a binendisionan ni Jehova da David ken Nehemias gapu iti panagboluntarioda.—1 Sam. 17:45, 50; Neh. 6:15, 16.
2. Apay a nasken nga iparangarang dagiti Kristiano ti kinamasindadaanda nga agboluntario?
2 Saan a masindadaan nga agboluntario dagiti tattao iti lubong ita. Okupado unay dagiti tattao iti daytoy ‘maudi nga al-aldaw,’ ken adu ti ‘managayat iti bagbagida.’ (2 Tim. 3:1, 2) Nalaka la a makumikom ti maysa a tao kadagiti bukodna a pagimbagan isu a mabaybay-anna dagiti gundaway a tumulong kadagiti sabsabali no kasapulan. Ngem kas Kristiano, kayattayo a tuladen ni Jesus a nagboluntario a tumulong kadagiti sabsabali. (Juan 5:5-9; 13:12-15; 1 Ped. 2:21) Kasanotayo a maipakita ti kinamasindadaantayo nga agboluntario, ken ania dagiti bendision a masagraptayo?
3. Ania ti maitulong ti panagboluntario kadagiti gimong ti kongregasion?
3 Maigapu Kadagiti Kakabsattayo: Mairanudtayo ti “naespirituan a sagut” kadagiti sabsabali no agboluntariotayo nga agkomento kadagiti paset ti gimong nga agkasapulan iti pannakiraman ti tallaong. (Roma 1:11) Pakaidayawan ni Jehova ti panagkomento, natibtibker ti pannakaitukit ti kinapudno iti isip ken pusotayo, ken ad-adda a matagiragsaktayo dagiti gimong. (Sal. 26:12) No adda kabsat a saan a makaiparang iti pasetna iti Teokratiko nga Eskuelaan ti Panagministro, mabalintayo met ti agboluntario a mangiparang iti dayta. Daytoy ti tumulong kadatayo a mangparang-ay iti abilidadtayo a mangisuro.
4. Ania dagiti dadduma pay a pamay-an a maipakitatayo ti kinatuloktayo nga agboluntario?
4 Maipakita dagiti kakabsat a lallaki ti kinamasindadaanda nga agboluntario no ikagumaanda a ragpaten dagiti responsabilidad iti kongregasion. (Isa. 32:2; 1 Tim. 3:1) Makatulong ti amin tapno agtalinaed a naannayas ti panagandar dagiti asamblea ken kombension babaen ti panagboluntarioda kadagiti nagduduma a departamento. No agboluntariotayo a makipagtrabaho iti ministerio kadagiti agdaldaliasat a manangaywan wenno ipaayantayo ida iti taraon, agbanag daytoy iti “panagsisinnukat iti pammaregta.” (Roma 1:12) Mapasarantayo ti rag-o ken anamong ni Jehova no tulongantayo dagiti ulila, balo, masakit ken baldado, inna nga addaan kadagiti babassit nga annak, ken dadduma pay iti kongregasion.—Prov. 19:17; Ara. 20:35.
5. Ania a bambanag mainaig iti Kingdom Hall ti agkasapulan kadagiti boluntario?
5 Ti sabali pay a pamay-an ket ti panangipaaytayo iti tiempo ken pigsatayo a tumulong nga agdalus ken mangmantener iti Kingdom Hall. Maysa pay, gapu ta adu ti umaw-awat iti kinapudno, dumakdakkel ti panagkasapulan kadagiti baro a Kingdom Hall ken kadagiti boluntario a mangibangon kadagitoy. Adda agassawa a nagboluntario a tumulong iti Regional Building Committee iti lugarda nupay awan ti ammo dagitoy nga agassawa no maipapan iti panagibangon. Idi agangay, nasanay dagiti agassawa ket tumultulongda itan nga agkabite kadagiti ladrilio. Kinuna ti asawa a babai: “Ti pannakipagtrabaho kadagiti sabsabali ket nagbanag iti nakasingsinged a panaggagayyem. Kalpasan ti agmalem nabambannogkamin iti pisikal ngem nabang-arankami iti naespirituan.”
6. Apay a ti panangasaba ti kapatgan a trabaho nga agkasapulan iti panagboluntariotayo?
6 Babaen ti Panangasaba: Ti panangikasaba iti Pagarian ti kapatgan ita a trabaho nga agkasapulan iti panagboluntariotayo. No matulongan dagiti tattao a mangtarus ken mangyaplikar iti balakad ti Biblia, maaddaanda iti panggep ti biag ken mapabilegda a mangsaranget kadagiti makadangran nga aramid. Masursuroda manipud iti Biblia ti makaparagsak a namnama iti masanguanan. No isursurotayo ti maipapan iti Biblia, siraragsak nga ar-aramidentayo ti napateg a trabaho a mangyeg iti manayon a gunggona. (Juan 17:3; 1 Tim. 4:16) Nalabit ipalubos ti kasasaad a maaddaantayo iti ad-adu a tiempo a makiraman iti daytoy a trabaho babaen ti panag-auxiliary wenno panag-regular pioneer, iyaakar iti lugar a dakdakkel ti panagkasapulan, wenno panagsursuro iti sabali a pagsasao.
7. Apay a nangnangruna a napateg ita ti panagboluntario?
7 Impadto ni Ari David nga iti panawen a panagturay ti Mesias, ti ili ti Dios “situtulok nga idatonda ti bagbagida.” (Sal. 110:3, footnote ti Reference Bible) Gapu ta papartaken ni Jehova ti maudi a naespirituan a panagani, adu dagiti trabaho nga agkasapulan iti panagboluntario. (Isa. 60:22) Naikunam kadin ti: “Adtoyak! Ibaonnak”? (Isa. 6:8) Wen, maay-ayotayo ni Jehova ken masagraptayo ti adu a bendision no agboluntariotayo.