Panagboluntario a Manayon Dagiti Pagimbaganna

KANAYON a nagaramid ni Jesu-Kristo iti naimbag para kadagiti agkasapulan. Kas pagarigan, pinakanna dagiti mabisin ken inagasanna dagiti masakit. (Mateo 14:14-21) Ngem, ania a trabaho ti impangpangrunana? Dayta ti sungbatan ti napasamak idi karugrugi ti ministerio ni Jesus. Nailanad dayta iti umuna a kapitulo ti Ebanghelio ni Marcos.

Idi adda ni Jesus idiay Capernaum, iti asideg ti Baybay ti Galilea, napan iti balay ni Simon, wenno Pedro. Sadiay a “ti katugangan-a-babai ni Simon siiidda nga aggurigor,” isu nga inagasan ni Jesus. (Marcos 1:29-31) Kalpasanna, maysa a bunggoy agraman ti adu a tattao a “masakit iti nadumaduma a sakit” naguurnongda iti ridaw ti balay ni Pedro, ket inagasan met ni Jesus ida. (Marcos 1:32-34) Kalpasanna, dimteng ti rabii, ket napanen naturog ti amin.

Kabigatanna, “bayat a nasipnget pay laeng,” siuulimek a bimmangon ni Jesus ket pimmanaw iti balay sa “napan iti disso a langalang.” Sadiay a “nangrugi a nagkararag.” Idi agangay, nariing met dagiti adalan, timman-awda iti balay, ket nakitada ti dakkel a bunggoy dagiti tattao nga agur-uray iti ridaw. Ngem ania itan ti aramidenda? Awan ni Jesus! Dagus a sinapul ni Simon ken ti kakaduana ket nasarakanda, sada kinuna kenkuana: “Isuamin sapsapulendaka.” (Marcos1:35-37; Lucas 4:42) Kasla ibagbagada ken Jesus: ‘Ania ti ar-aramidem ditoy? Idi rabii nakabalballigi ti panangagasmo kadagiti masakit. Ita, adda manen ti sabali a dakkel a bunggoy nga agur-uray kenka!’

Ngem paliiwem ti reaksion ni Jesus: “Mapantayo iti sabali pay a lugar, kadagiti pimmurok nga ili iti kabangibang, tapno mangasabaak met sadiay.” Adda ipasimudaag daytoy a sungbat. Saanen a nagsubli ni Jesus iti balay ni Pedro tapno agasanna ti dadduma a tao. Impakitana no apay idi kinunana: “Agsipud ta naibaonak maigapu iti daytoy [kayatna a sawen, ti panangasaba].” (Marcos 1:38, 39; Lucas 4:43) Ania ti ibagbaga idi ni Jesus kadagiti adalanna? Napateg kenkuana ti panagaramid iti naimbag, ngem ti panangasaba ken ti panangisuro iti sao ti Dios ti kangrunaan a mision ni Jesus.​—Marcos 1:14.

Tangay idagdagadag ti Biblia kadagiti Kristiano a ‘sisisinged a surotenda dagiti addang [ni Jesus],’ nabatad ti pannakaiwanwan dagiti pudno a Kristiano iti kaaldawantayo, no ania a trabaho a panagboluntario ti maipangpangruna. (1 Pedro 2:21) Kas ken Jesus, tulonganda dagiti tattao nga agkasapulan​—kas impakita ti immuna nga artikulo. Kas panangtuladda met ken Jesus, ti panangisuro iti mensahe ti Biblia maipapan iti naimbag a damag ti Pagarian ti Dios ti kangrunaan nga ipangpangrunada.a (Mateo 5:14-16; 24:14; 28:19, 20) Apay ngata a ti panangisuro kadagiti tattao maipapan iti mensahe ti Biblia ti rumbeng a maipangpangruna ngem iti sabali a napateg a kita ti trabaho a panagboluntario?

No Apay ken no Kasano a Makagunggona ti Panangisuro iti Biblia

Ipatuldo ti maysa a proverbio iti Asia ti sungbat. Kastoy ti kunana: “No agplanoka para iti makatawen, agmulaka kadagiti bin-i. No agplanoka para iti sangapulo a tawen, agmulaka kadagiti kayo. No agplanoka para iti sangagasut a tawen, isurom dagiti tattao.” Kinapudnona, tapno maipaay dagiti manayon a solusion, kasapulan unay ti panangisuro agsipud ta parang-ayenna ti abilidad ti maysa a tao a mangaramid kadagiti pangngeddeng a mangpasayaat iti panagbiagna. Dayta ti makagapu nga iti kaaldawantayo, nasurok nga innem a milion a paset-tiempo ken amin-tiempo a boluntario ti mangus-usar iti tiempo, panangikagumaan, ken kinabaknangda a mangipaay iti libre a panagadal ti Biblia iti publiko. Daytoy a nasuboken iti adu a panawen a programa ti panagboluntario nga ar-aramiden dagiti Saksi ni Jehova ket nasayaat ti epektona iti adu a komunidad iti intero a lubong. Kasano?

Bayat a matulongan dagiti tattao a makaawat ken mangsurot kadagiti praktikal a balakad ti Biblia, makabalanda a naimbag a mangsaranget kadagiti parikut iti biag. Mapabilegda a mangisardeng kadagiti makadangran nga ugali. Ipaganetget ni Nelson, a taga Brazil, ti sabali pay a gunggona iti panagadal ti Biblia: “Nanipud idi rinugiak ti nakipagadal ti Biblia kadagiti Saksi ni Jehova, naaddaanak ti rag-o agsipud ta addaanen iti panggep ti biagko.” (Eclesiastes 12:13) Kasta met laeng ti rikna ti ginasgasut a sabsabali pay​—agtutubo ken nataengan​—a nabiit pay a nangrugi nga agadal ti Biblia. Malaksid pay iti panangtulong kadagiti estudiante a maaddaan ti makapnek a panggep iti biag, adda ipaay ti mensahe ti Pagarian ti Dios a makaparagsak a namnama iti masanguanan​—namnama a mamagbalin a napateg ti panagbiag, uray pay kadagiti karirikutan a kasasaad. (1 Timoteo 4:8)​—Kitaem ti kahon nga “No Ania Dagiti Pagimbagan nga Ipaay ti Pagarian ti Dios.”

Babaen ti panangyadal iti Biblia, mangar-aramid dagiti Saksi ni Jehova iti boluntario a panagserbi nga addaan kadagiti manayon a pagimbagan. Kasano kapaut? Kastoy ti kuna ti Sao ti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Agasem, makipaspasetka iti programa a manayon dagiti pagimbaganna​—kalpasanna dayta a kita ti panagboluntario ti pudno a makagunggona iti sabsabali! Saan aya a kayatmo a maammuan ti ad-adu pay maipapan iti dayta a kita ti programa? No kasta, makiumanka kadagiti Saksi ni Jehova iti lugarmo. No awatem daytoy nga imbitasion, saanmonto a pagbabawyan dayta.

[Footnote]

[Blurb iti panid 11]

“No agplanoka para iti makatawen, agmulaka kadagiti bin-i. No agplanoka para iti sangapulo a tawen, agmulaka kadagiti kayo. No agplanoka para iti sangagasut a tawen, isurom dagiti tattao”

[Kahon/Dagiti ladawan iti panid 10]

Tumultulong ken Mangipapaay iti Namnama

Ti 43-anyos a Pranses a nars a ni Nadine, nga espesialista kadagiti sakit iti tropiko, ket maysa kadagiti boluntario a nakipagtrabahon idiay Makintengnga nga Africa. “Damdamagen dagiti tattao kaniak no apay nga ar-aramidek daytoy,” kinunana iti nabiit pay nga interbiu. “Mamatiak iti Dios, ay-ayatek dagiti tattao, ken kayatko nga ipaay ti tiempok a tumulong kadagiti sabsabali. Ket kas maysa kadagiti Saksi ni Jehova, matignayak a mangipaay iti remedio ken namnama kadagiti agsagsagaba.” Nupay agbolboluntario idiay Africa, bingaybingayen ni Nadine ti tiempona tapno mangsaranay ken makipaset iti trabaho a panangisuro iti Biblia nga ar-aramiden dagiti Saksi sadiay.

[Dagiti Ladawan]

Ni Nadine idiay Africa

[Kahon iti panid 12]

No Ania Dagiti Pagimbagan nga Ipaay ti Pagarian ti Dios

Pangngaasim ta basaem dagitoy a teksto iti Bibliam, ket kitaem no ania ti inkari ti Dios a mangpennek kadagiti kasapulan ti tao kadagiti sumaganad a kasasaad:

Salun-at Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:4; Isaias 33:24; 35:5, 6.

Panangisuro “Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:9; Habakuk 2:14.

Trabaho “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. . . . Saandanto nga agbannog iti awan kapapay-anna.”​—Isaias 65:21-23.

Taraon “Ti met laeng daga sigurado nga ipaaynanto ti bungana; Ti Dios, a Diostayo, bendisionannatayto.”​—Salmo 67:6; 72:16; Isaias 25:6.

Kasasaad ti Kagimongan “Ni Jehova tinukkolna ti pagbaut dagidiay nadangkes . . . Ti intero a daga naginana, awananen iti pannakasinga.”​—Isaias 14:5, 7.

Kinahustisia “Adtoy! Maysa nga ari ti agturayto maipaay iti mismo a kinalinteg; ket no maipapan iti piprinsipe, agturaydanto kas piprinsipe maipaay iti mismo a kinahustisia.”​—Isaias 11:3-5; 32:1, 2.