Dagiti Saksi ni Jehova iti Misionero a Tay-ak
MASANSAN a maisalsaludsod kadagiti misionero dagiti Saksi ni Jehova iti Asia ken dadduma pay: “Apay nga awanankayo kadagiti klase ti Ingles kas kadagiti dadduma a misionero?” “Adda kadi dagiti eskuelaanyo a mabalinko a pangibaonan kadagiti annakko wenno ospital a maipaay kadagiti masakit?” Ti sungbat, siempre, ket awan. Ngem apay nga awan? Kinapudnona, ania ti ranta dagiti Saksi? Ket aniat’ naaramidanda a maipaay kadagiti tattao kadagitoy a pagilian?
Panaggiddiat kadagiti Punto de Vista
Saanen a mailibak a dagiti misionero ti Kakristianuan ti nakapagaramid kadagiti adu a kumberte babaen kadagiti sosial a serbisio nga ipapaayda. Ngem gapu ta dagita nga ar-aramid ti kangrunaan a naiturong a mangpennek kadagiti material a pakasapulan dagiti tattao imbes a kadagiti naespirituan, dagitoy a misionero saanda a naballigi iti panagaramid kadagiti pudpudno nga adalan ni Jesu-Kristo. (Mateo 7:22, 23; 28:19, 20) Kangrunaanna pay, saanda a pulos a nakaitudo ti aniaman a permanente a solusion kadagiti sosial a parparikut a padpadasenda a parmeken.
Dagiti Saksi ni Jehova, iti kasumbabangirna, ket maseknanda iti napatpateg a bilin ti panangikasaba ti naimbag a damag ti Pagarian ti Dios. (Mateo 24:14) Daytoy ket saan a gapu ta dida pagaammo wenno saanda a maseknan kadagiti natauan a panagsagaba ken kinaulpit a makitkitada. Imbes ketdi, gapu ta mabigbigda a ti kakaisuna laeng a remedio kadagitoy a serioso a problema ket adda, saan a kadagiti natauan nga im-ima, no di ket iti Pagarian ti Dios.—Salmo 146:3-10.
Daytat’ apagpag-isu nga inkaskasaba ni Jesus ken dagiti adalanna idi umuna a siglo. “Kadagiti sabsabali nga il-ili masapul met nga ipakaammok ti naimbag a damag ti pagarian ti Dios,” kuna ni Jesus, “ta daytoy ti panggep a nakaibaonak.” (Lucas 4:43) Intudo ken inkasaba ni Jesus ti Pagarian ti Dios kas ti kakaisuna a naan-anay a remedio, ta ammona a dagiti sangalubongan a parikut ket nalawada unay a maipaay iti tao a mangparmek a bukbukodna. Nupay adu dagiti namilagruan a panangagas nga inaramid ni Jesus, ingunamgunamna kadagiti adalanna nga “itultuloyyo, ngarud, a biruken nga umuna ti pagarian ken ti kinalinteg [ti Dios], ket amin dagitoy dadduma a bambanag mainayondanto kadakayo.”—Mateo 6:33.
Kamaudiananna, idi imbaon ni Jesus dagiti adalanna, umuna nga imbagana kadakuada: “Ket no mapankayo, mangaskasabakayo, a kunkunayo, ‘Ti pagarian ti langit asidegen.’” Kalpasanna innayonna: “Paimbagenyo dagiti masaksakit, pagungarenyo dagiti natay, dalusanyo dagiti agkukutel, paruarenyo dagiti sairo.” (Mateo 10:7, 8) Dayta ti nangikeddeng ti maipangpangruna a maipaay kadagiti moderno-aldaw nga ad-adalan ni Jesu-Kristo. Isuda met, ti masapul a mangikaskasaba ti naimbag a damag ti Pagarian kas ti kangrunaan a panggepda, a nangnangruna ken nangatngato ngem ti panagaramidda kadagiti humanitariano nga ar-aramid. Daytat’ pagregreggetan nga ar-aramiden dagiti misionero dagiti Saksi ni Jehova.
Panangpunno kadagiti Naespirituan a Pagkasapulan dagiti Tattao
Kas maysa a grupo dagiti Kristiano, makiramraman dagiti Saksi ni Jehova iti reprep a boluntario a programa ti panangipaay ti edukasion iti Biblia kadagiti tattao. Kas manangibumbunannag ti naimbag a damag, interesadoda a mangtulong kadagiti dadduma a makagunggona manipud iti kinasirib ken pammagbaga ti Biblia, agpadpada itan ken iti masanguanan. (Salmo 68:11) Apay a kasta daytoy?
Bigbigen dagiti Saksi a no matulongan dagiti tattao a makatarus ken mangsurot iti pammalakad ti Biblia, nasaysayaat ti pannakakabalda a mangsango kadagiti parikut ken rigrigat ti panagbiag. Iti sabali a bangir, magun-odanda met ti moral a kinabileg a kasapulan tapno parmeken dagiti makaadipen ken makadangran ti bagi a bisio kas ti panagsigarilio, nalabes a panagin-inum, panangabuso ti droga, nakapuy a kinadalus, panagsugal, ken seksual a kinalulok. Iti kasumbabangirna, ti kinapudno ti Biblia tulonganna ida a mangbalbaliw ti is-isipda, a mangiyeg kadakuada iti maysa a panggep ti panagbiag ken realistiko a namnama nga agpaay iti masanguanan.
Gapuna, babaen iti panangipaayna ti kangangatuan a langa ti edukasion—daydiay agaon iti Sao ti Dios, ti Biblia—mangar-aramid dagiti Saksi ni Jehova ti direkta a kontribusion a mangitag-ay iti moral ken pisikal a salun-at ti komunidad a pagtataenganda ken pangaskasabaanda. Masansan daytoy ti madmadlaw dagiti dadduma a nakapaliiwen kadakuada nga addaan panggep. Kas pangarigan, ni Dr. Bryan Wilson iti Oxford University, a nangpaliiw iti trabaho dagiti Saksi ni Jehova idiay Africa, kunana iti maysa a surat iti London Times:
“Nakagaggaget nga agtrabaho dagiti Saksi ni Jehova ket masansan nga ad-adda a nakapaspasnek ken manangtulong ngem kadagiti gagangay a padada nga umili. Isudat’ sursuruan dagiti papanguloda nga agbayad nga insigida kadagiti buisda, nga adaywanda dagiti kinaranggas, ket lisianda ti aniaman a panangpasakit. Naurnosda, nasingpet ken nalimbong-panagpampanunotda. Dagitoy nga ipatpateg dakkel ti pategda iti ekonomiko ken sosial a panangparang-ay iti Makinlaud a kagimongan, ket saan nga aglablabes ti panangikuna a dagiti Saksi ni Jehova maysada kadagiti kalintegan ken kagagetan kadagiti umili dagiti pagpagilian nga Africano.”
Kadagiti umas-asping a sasao, maysa pay a managpaliiw idiay Sud America kunana daytoy iti maysa nga editorial ti periodiko:
“Dagiti Saksi ni Jehova nakagaggagetda, nasingpetda, managbutengda iti Dios a tattao. Konserbatiboda ken managayatda iti tradision ket ti relihionda naibatay kadagiti sursuro ti Biblia.”
Gapuna nupay saan nga ipagpaganetget dagiti Saksi ni Jehova ti gagangay a madakdakawat kas ti sosial nga ebanghelio siaaktiboda a tumultulong kadagiti paginteresan ti komunidad babaen ti panangtulong kadagiti dadduma a mangitunos iti panagbiagda kadagiti nangato a pagalagadan ti Biblia. (Roma 12:1, 2) Kangrunaanna pay, tultulonganda met dagiti tattao iti uray sadino a kumita iti labes dagiti kinaulpit ken kinaawan ti panagpapada iti daytoy napardas ti pannakadaddadaelnan a sistema dagiti bambanag nga agturong iti baro a sistema nga ar-aramiden ti Dios, a dandanin umay.—Apocalipsis 21:5.
[Dagiti ladawan iti panid 8, 9]
Solusion kadagiti Sosial a Parparikut Babaen ti Pagarian ti Dios
Basaenyo kadagiti mismo a Bibliayo dagiti sumaganad a kasuratan ket maliwliwakayo koma babaen ti pannakakitayo no kasano a dagiti karkari ti Dios ikkatennanto dagiti agdama a parikut ken sosial a pakarigatan kadagiti sumaganad a bambanag:
Salun-at Isaias 33:24; 35:5, 6; Apocalipsis 21:4
Edukasion Isaias 11:9; Habacuc 2:14
Panggedan Isaias 65:21-23
Taraon Salmo 67:6; 72:16; Isaias 25:6
Kinahustisia Isaias 11:3-5; 32:1, 2