“Umaykayo Kaniak, . . . ket Pagin-awaenkayto”

“Aramidentayo Koma ti Naimbag Kadagiti Amin”

TI PANANGIKASABA ken panangisuro iti naimbag a damag ti Pagarian ti Dios ti kangrunaan a trabaho idi ni Jesus. (Marcos 1:14; Lucas 8:1) Dagiti pasurot ni Kristo tinarigagayanda ti tumulad kenkuana, isu a minatmatanda a kangrunaan a trabahoda ti panangisuro iti mensahe ti Biblia maipapan iti Pagarian ti Dios. (Lucas 6:40) Pudno a makaparagsak kadagiti Saksi ni Jehova a maammuan no kasano a ti mensahe ti Pagarian ket mangyeg iti manayon a bang-ar kadagidiay mangawat iti dayta​—kas iti napasamak idi adda ni Jesus ditoy daga.​—Mateo 11:28-30.

Malaksid iti panangisurona iti Sao ti Dios, nangibanag ni Jesus iti dadduma pay a naimbag nga aramid, kas iti panangpaimbag kadagiti masakit ken panangtaraon kadagiti mabisin. (Mateo 14:14-21) Umasping iti dayta, ti trabaho dagiti Saksi ni Jehova a panangisuro iti Biblia ket nabuyogan kadagiti aramid a tumulong kadagiti tattao nga agkasapulan. Kinapudnona, ti Kasuratan kabalanna dagiti Kristiano “iti tunggal naimbag nga aramid” ken gutugotenna ida a mangaramid “ti naimbag kadagiti amin.”​—2 Timoteo 3:16, 17; Galacia 6:10.

“Sinaranaydakami Dagiti Kakabsatmi”

Idi Setiembre 1999, napasamak ti makadidigra a ginggined idiay Taiwan. Sumagmamano a bulan kalpasanna, napasamak dagiti bagyo ken dadakkel a panagreggaay a nagbalin kas maysa kadagiti kakaruan a natural a didigra iti pakasaritaan ti Venezuela. Itay laeng nabiit, naglak-am iti nakaro a panaglayus ti pagilian ti Mozambique. Kadagitoy amin a tallo a kasasaad, alisto a simmangbay dagiti Saksi ni Jehova kadagitoy a lugar tapno mangitulod iti taraon, danum, agas, badbado, tolda, ken paglutuan para kadagiti biktima. Dagiti boluntario nga adda pannakaammoda iti panangagas nangipasdekda iti temporario a klinika tapno mataming dagiti nasugatan, ken dagiti boluntario iti panangbangon kadagiti patakder inyaramidanda iti baro a balay dagiti napukawan iti pagtaengan.

Natukay ti rikna dagiti biktima gapu iti naintiempuan a tulong a naawatda. “Sinaranaydakami dagiti kakabsatmi iti tiempo a disperadokami unay,” kuna ni Malyori, a narba ti pagtaenganna gapu iti panagreggaay idiay Venezuela. Kalpasan a nangibangon dagiti boluntario iti baro a pagtaengan para iti pamiliana, kinuna ni Malyori: “Napalalo ti panagyamanmi ken Jehova gapu iti amin a naaramidanna kadakami!” Ken idi a dagiti biktima ti layus idiay Mozambique naawatda dagiti tulbek iti kaibangbangon a pagtaenganda, kadarato a kinanta ti intero a grupo ti kanta ti Pagarian a “Ni Jehova ti Kamangtayo.”a

Ti panangtulong kadagiti agkasapulan ket makapabang-ar uray kadagiti boluntario. “Pakaragsakak ti agserbi kadagitoy a kakabsat a nagsagaba iti kasta unay,” kinuna ni Marcelo, a nagserbi kas nars iti maysa a kampo dagiti nagbakuit idiay Mozambique. Ni Huang, maysa a boluntario idiay Taiwan, kinunana: “Dakkel a rag-o ti tumulong a mangitulod iti taraon ken tolda kadagiti kakabsat nga agkasapulan. Makapabileg iti pammati.”

Nabunga a Programa ti Panagboluntario

Nabang-aran met iti naespirituan ti pinulpullo a ribu a balud iti sangalubongan gapu iti panagboluntario. Kasano? Kadagiti naglabas a tawen, nangipaay dagiti Saksi ni Jehova iti literatura ti Biblia kadagiti nasurok a 30,000 a balud iti agarup 4,000 a pagbaludan idiay laeng Estados Unidos. Kanayonanna, no posible, personal a bisitaen dagiti Saksi dagiti balud tapno iyadalanda iti Biblia ken mangidauloda kadagiti Nakristianuan a gimong. Magunggonaan kadi dagiti balud?

Dadduma a balud nga agad-adal iti Biblia ket nangrugi nga iranudda kadagiti padada a balud ti makapabang-ar a sursuro iti Sao ti Dios. Kas resultana, iti adu a pagbaludan iti intero a lubong, addan dagiti grupo dagiti balud a sangsangkamaysa nga agdaydayaw ken Jehova. “Umad-adu ti grupomi,” impakaammo ti maysa a balud idiay Oregon, E.U.A., idi 2001. “Addaankami iti 7 nga agibumbunannag iti Pagarian, a mangikonkondukta iti 38 a panagadal iti Biblia. Nasurok a 25 ti tumabtabuno iti palawag publiko ken Panagadal iti Pagwanawanan, ken 39 ti timmabuno iti Memorial [iti ipapatay ni Kristo]. Asidegen a mabautisaran ti tallo pay a lalaki!”

Dagiti Gunggona ken Rag-o

Napaliiw dagiti opisial ti pagbaludan a nasayaat daytoy a programa a panagboluntario. Ti nangruna a magustuan dagiti opisial isu ti agpaut a pagimbagan daytoy a programa a panagboluntario. Maysa a report ti nagkuna: “Iti sangapulo a tawen a pannakaipatungpal daytoy a programa, awan uray maysa ti nagsubli iti pagbaludan kadagiti naruk-atan a balud a nabautisaran iti pagbaludan kas Saksi ni Jehova​—no idilig iti kagudua wenno nasursurok pay a balud manipud iti sabali a grupo a nagsubli iti pagbaludan.” Gapu ta natukay ti riknana iti nagapuanan dagiti boluntario a Saksi, maysa a kapelian ti pagbaludan idiay Idaho ti nagkuna iti suratna iti sangalubongan a hedkuarter dagiti Saksi ni Jehova: “Nupay diak umanamong kadagiti patpatienyo, magustuak ti organisasionyo.”

Pudno met a makagunggona kadagiti boluntario ti panangtulong kadagiti balud. Kalpasan nga indauluanna ti panaggigimong iti maysa a grupo dagiti balud a nagkansion iti kanta ti Pagarian iti umuna a gundaway, maysa a boluntario ti nagsurat: “Makaparegta a maimatangan ti 28 a lallaki a nagkaykaysa a nagkanta iti panangidaydayaw ken Jehova. Ken natbag ti panagkantada! Anian a pribilehio ti kaaddak iti kasta nga okasion!” Maysa a boluntario a bimmisita kadagiti balud idiay Arizona ti nagkuna: “Anian a bendision idi makiramankami iti daytoy naisangsangayan a trabaho!”

Dagiti boluntario a Saksi iti sangalubongan umanamongda unay ken Jesus, a nagkuna: “Ad-adu ti kinaragsak iti panangted ngem iti panangawat.” (Aramid 20:35) Pinatalgedanda met a pudno a makapabang-ar ti panangsurot iti pammagbaga ti Biblia nga agaramid iti naimbag iti isuamin.​—Proverbio 11:25.

[Footnote]

[Ladawan iti panid 8]

Venezuela

[Ladawan iti panid 8]

Taiwan

[Ladawan iti panid 8]

Mozambique