Sangalubongan a Panagsaknap ti Gura
ADDA nakabulos a burangen—daydiay maawagan iti gura. Ket agraraira dayta iti intero a lubong.
Idiay Balkans, sagsagabaen pay la ti maysa a probinsia ti epekto ti nabiit pay a napasamak a panangtalipupos kadagiti dida kapuli. Dagiti sinigsiglon a panagbibinnusor ket nagtungpal iti adu a panangpapatay, panangrames, panangpapanaw, panangpuor ken panangsamsam kadagiti pagtaengan ken purok, panangdadael kadagiti apit ken taraken, ken bisin. Adu pay la dagiti bomba a naimula iti daga.
Idiay East Timor iti Southeast Asia, 700,000 a napabutngan a tattao ti kapilitan a nagtalaw gapu iti panagbuteng iti pammapatay, pannakakabkabil, awan pilpilienna a panangpaltog, ken ti kapilitan a pannakapapanaw. Pinanawanda ti dagada a dinadael dagiti rimmaut a di autorisado a grupo ti militar. Kinuna ti maysa kadagiti biktima: “Mariknak a kaslaak la maysa nga animal a maan-anupan.”
Idiay Moscow, rinebbek ti napigsa a bomba dagiti terorista ti maysa nga apartment. Naiwara ti 94 a bangkay dagiti inosente a tattao gapu iti panagbettak—ubbing ti dadduma kadakuada. Nasurok a 150 ti nasugatan. Kalpasan ti kasta a panagaligagaw, imtuoden dagiti tattao, ‘Siasino ti sumaruno a biktima?’
Idiay Los Angeles, California, maysa a lalaki a manggurgura ti dina kapuli ti nangpaltog iti maysa a grupo dagiti Judio nga estudiante iti kindergarten ket kalpasanna pinaltoganna ti maysa a Filipino a kartero.
Maitutop la unay a madeskribir a sangalubongan ti panagsaknap ti gura. Dandani kada aldaw, maipadamag ti mapaspasamak no ti pananggura iti puli, etniko a grupo, wenno relihion ket mapakuyogan iti kinakillo. Makitatayo a masinasina dagiti nasion, komunidad, ken pamilia. Makitatayo a makiraman dagiti pagilian iti nasaknap a panangikisap iti dida kapuli. Makitatayo ti nakaro a kinaranggas gapu laeng ta “naiduma” ti dadduma a tattao.
Tapno maikulong ti burangen a managan gura, masapul a maawatantayo dagiti pakaigapuan ti kasta a napnuan gura a kinaranggas. Naimula aya ti gura kadagiti gene ti tao? Nasursuro aya? Mabalin aya nga iwaksi ti kanayon a pananggura?
[Picture Credit Line iti panid 3]
Kemal Jufri/Sipa Press