Sarsarita ken Agpaypayso Maipapan Kadagiti Lallakay ken Babbaket
Adu ti sarsarita maipapan iti kinalakay ken kinabaket. Ibutaktak ti “Ageing—Exploding the Myths,” maysa a publikasion nga impablaak ti Ageing and Health Programme ti World Health Organization, a palso ti sumagmamano kadagitoy a sarsarita. Amirisem ti sumagmamano a pagarigan.
Sarsarita: Agnanaed ti kaaduan a lallakay ken babbaket kadagiti industrialisado a pagilian.
Agpaypayso: Kinapudnona, agnanaed ti nasurok nga 60 a porsiento kadagiti 580 a milion a lallakay ken babbaket kadagiti napanglaw a pagilian. Umad-adu ti lumakay ken bumaket kadagitoy a pagilian ta simmayaat ti pannakaaywan ti salun-at ken ti sanitasion, balbalay, ken nutrision.
Sarsarita: Awan ti pagimbagan a maipaay ti lallakay ken babbaket.
Agpaypayso: Adu ti maitulong ti lallakay ken babbaket iti sabsabali a dida agpatpatangdan. Kas pagarigan, aw-awiren dagiti lola ken lolo ti napattapatta a 2 a milion nga annak idiay Estados Unidos. Adda 1.2 a milion a makipagnanaed ken padpadakkelen dagiti lolo ken lolada. Isu a makaipaay ti lallakay ken babbaket iti pagtaengan, taraon, ken edukasion ken makaisuroda iti naimbag nga ugali kadagiti appokoda bayat nga agtartrabaho dagiti dadakkelda. Kasta met, saan nga agandar ti adu a boluntario nga organisasion kadagiti industrialisado a pagilian no awan ti tulong ti lallakay ken babbaket. Isuda ti kasapulan unay nga agaywan. Iti dadduma a napanglaw a pagilian, a sadiay 30 a porsiento kadagiti nataenganen ti addaan iti AIDS, aywanan ti lallakay ken babbaket dagiti agsakit a nataenganen nga annakda, ket no matay dagitoy, padakkelenda dagiti naulila nga appokoda.
Sarsarita: Agsardeng nga agtrabaho dagiti lallakay ken babbaket gapu ta saandan a makapagtrabaho.
Agpaypayso: Masansan nga agsardengda nga agtrabaho gapu ta mapaidamanda iti edukasion wenno pannakasanay wenno gapu iti edadda (pannakaidumduma ti lallakay ken babbaket) imbes a gapu iti kinalakay wenno kinabaketda.
Sarsarita: Dagiti lallakay ken babbaket dida kayat ti agtrabaho.
Agpaypayso: Masansan a maipupuera ti lallakay ken babbaket kadagiti panggedan nupay situtulok ken kabaelanda ti agtrabaho. Nangnangruna no tiempo ti kinaawan ti panggedan, masansan a maikalkalintegan nga agsardeng koman ti lallakay ken babbaket tapno adda trabaho a magun-odan dagiti ub-ubing nga agsapsapul iti trabaho. Nupay kasta, ti nasapa a panagsardeng ti lallakay ken babbaket nga agtrabaho saan a talaga a mangipaay iti trabaho kadagiti agtutubo. Ti ub-ubing nga agsapsapul iti trabaho mabalin nga awanan iti kinasigo tapno sukatanna ti laklakay wenno bakbaket a trabahador. Makatulong dagiti trabahador a lallakay ken babbaket nga aduan iti kapadasan tapno sigurado a mataginayon ti adu a magapuanan ken di agkurang dagiti trabahador.
No panunotentayo dagitoy a kinapudno, kuna ti World Health Organization (WHO), rumbeng a matmatan koma dagiti komunidad iti lubong ti lallakay ken babbaket kas pakagunggonaan. Ngarud, kuna ni Alexandre Kalache, lider ti grupo iti Ageing and Health Programme ti WHO, a “dagiti pagilian . . . rumbeng a matmatanda ti lallakay ken babbaket a saan a parikut no di ket solusion kadagiti problema.” Ket agpaypayso dayta.