Manipud Kadagiti Agbasbasa

Liwliwa Kadagiti Masakit Pagyamanan iti serye a “Liwliwa Kadagiti Masakit.” (Enero 22, 2001) Uppat a tawenen ti napalabas nanipud idi naaksidenteak. Namin-adun a napanunotko a nasaysayaat la koman no natayak. Gapu iti dayta, nagadun ti nalipatak ken adun nga aldaw nga agsagsagabaak. Naparegtaak idi nabasak daytoy a serye.

T. M., Japan

Nanipud idi agtawenak iti 15, ib-ibturakon ti naut-ot a rheumatoid arthritis. Ti impormasion ti nakatulong kaniak a nakaamiris a masapul a sursuruek ti ad-adda nga agtalek ken Jehova, tangay isut’ “salindeg iti aldaw ti rigat.”​—Nahum 1:7.

Y.F.R., Colombia

Maysaak nga ebanghelisador iti amin a tiempo. Di unay nagbayag kalpasan nga immakarak nga agserbi iti baro a lugar, naammuak nga addaanak iti diabetes. Nagsayaat ti panangdeskribiryo iti agkakanat a marikna ti tao nga addaan nakaro a sakit! Nakatulong kaniak dagiti artikulo a mangusig manen iti kasasaadko iti natimtimbeng a wagas ken mangaramid kadagiti panagbalbaliw iti biagko.

L. A., Italia

Saankami a masakit, ngem dakkel ti naitulong kadakami dagiti prinsipio iti artikulo tapno matamingmi ti agdama a problemami. Kas iti masansan a mapasamak, ti magasin ket maysa a sungbat ti espesipiko a kararag.

R. P. ken L. P., Sri Lanka

Sumagmamano a lawasen ti napalabas, imbagada nga adda makadangran a tumor iti dalemko. Mabalin a mailadawanyo ti epektona kaniak tangay nakasalsalun-atak sakbay dayta. Ita, innalak ti ruar nga Enero 22 ket nagustuak a binasa dagiti artikulo. Dineskribirda amin a panagduadua, kapanunotan, ken rikriknak ngem intandudoda met ti positibo a panangmatmat.

J. E., España

Pudno a Kapadasan iti Biag Nagsuratak gapu iti makatukay a kapadasan da Bill ken Rose Meiners a, “Panangsumra iti Pannakaupay Babaen ti Panangikeddeng Kadagiti Kalat.” (Enero 22, 2001) Makaparegta a maammuan a nasurok a limapulo a tawenen nga agib-ibturda. Mangtukay iti kaunggan ti puso dagitoy a pakasaritaan ti biag. Kayatko a maammuan koma da Bill ken Rose nga ikarkararagak ida.

V. G., Italia

Kadakami a nasalun-at, makaparegta unay daytoy a pakasaritaan ti maysa a lalaki a makidangdangadang iti sakitna iti nasuroken a 50 a tawen. Dayta ti nakatulong kaniak a mangapresiar a kas nasalun-at a babai, masapul nga ipategko ti salun-atko ken usarek a naan-anay ti biagko.

P. V., Czech Republic

Addaanak iti ina a masakit iti dandani 20 a tawenen. Malmaldaang ken pampanunotenna no apay a saan a mabang-aran uray iti apagapaman la koma. Binasak kenkuana daytoy nga artikulo, ngem nagunggonaanak met. Ita maawatakon no apay a masansan a maldaang.

G.O.A., Nigeria

Nakaturtured da Bill ken Rose, agraman ti adu pay a sabsabali a mangib-ibtur iti nakaro a sakit! Patiek a dakami nga awanan iti nakaro a sakit nga ibturan ket makasursuro iti ulidanda. Bill ken Rose, itultuloyyo ti kinaturedyo! Ulidankayo kadakami!

I. S., Alemania

Pannaki-date Dagiti Tin-edyer Agtawenak iti 15, ket nagustuak ti artikulo nga “Agimtuod Dagiti Agtutubo . . . Kasano Ngay no Pagarupen ti Dadakkelko nga Ubingak Pay Unay a Maki-date?” (Enero 22, 2001) Damdamagen dagiti ubbing idiay eskuelaan no maysaak a tomboy gapu ta saanak a maki-date. Gagangay nga ibagak kadakuada nga iparit kaniak dagiti dadakkelko ti maki-date, ngem kanayon idi a kayatko nga adda koma nasaysayaat a maisungbatko kadakuada. Idi nabasak daytoy nga artikulo, ammokon no kasano a sungbatan dagiti saludsodda. Pagyamanan unay iti panangisakityo kadakami a tin-edyer.

C. G., Estados Unidos