Manipud Kadagiti Agbasbasa

Liwliwa Kadagiti Masakit Agtawenak iti 22, ket agsagsagabaak iti makapakapuy a kanser iti kaaduan a tawenen ti biagko. Nagustuak ti serye ti akkub a “Liwliwa Kadagiti Masakit.” (Enero 22, 2001) Anian a makaliwliwa a maammuan a maawatan ni Jehova ti kasta unay a pannakaupay ken panagpungtot a marikriknak! Makipagriknaak kada William ken Rose Meiners ken iti panangtamingda iti kasasaadda. Ammo ni Jehova no kasano a pabilgen dagiti agay-ayat kenkuana!

A.C.C., Chile

Dagiti Pagiddep Pagyamanan iti artikulo nga “Uram! Ania a Pagiddep ti Rumbeng nga Usaren?” (Enero 22, 2001) Pangngaasiyo ta mangipatulodkayo iti 130 a kopia daytoy a ruar nga iwarasmi iti tunggal empleadomi tapno adda iyawidda kadagiti pamiliada.

D. F., Estados Unidos

Pagyamanan iti gagetyo a nangputar iti daytoy nga artikulo. Awanen ti sabali a 32 ti panidna a magasin a mangsaklaw iti kasta a kaadu ken kinanadumaduma dagiti makatulong nga impormasion. Nupay kasta, kayatko nga ipatuldo a no dakamatenyo ti “dry powder” extinguisher, ammok a “dry chemical” extinguisher ti kayatyo a sawen. Mausar laeng dagiti dry powder extinguisher, nga addaan duyaw a bituen a nasuratan iti letra D, kadagiti uram a maigapu iti metal (kas iti sodium ken magnesium), idinto ta kadagiti ABC wenno BC nga uram (A-papel ken kayo, B-sumged a likido kas iti lana ken pintura, C-alikamen a de koriente) ti pakausaran dagiti dry chemical extinguisher.

J. H., Estados Unidos

Pagyamanan iti panangilawlawagyo. Iti dadduma a pagilian, ti termino a “dry powder extinguisher” iramanna ti pagaammo ti Estados Unidos a dry chemical extinguisher. Yantangay internasional a magasin ti “Agriingkayo!”, di maliklikan a pasaray agsasabali dagiti mausar a termino.​—ED.

Ubing Pay Unay a Maki-date? Talaga a nagustuak ti artikulo nga “Agimtuod Dagiti Agtutubo . . . Kasano Ngay no Pagarupen ti Dadakkelko nga Ubingak Pay Unay a Maki-date?” (Enero 22, 2001) Agtawenak iti 17, ket makunak a saanak pay a nakasagana a makiasawa ken agpamilia. Daytoy ti nakatulong kaniak nga agpanunot a naimbag sakbay a rugiak ti maki-date ken usarek met ti pannakaawat inton ikeddengko ti maki-date ken makiasawa.

A.M.H., Estados Unidos

Tangay 15 anyosak, nagadut’ mangpilit kaniak a maki-date idiay pageskuelaak a haiskul. Makaparegta a maammuan a supsuportarannak ti Biblia ken dagiti padak a Kristiano. Daytoy ti makatulong kaniak nga agtalinaed a natibker iti takderko!

L. M., Canada

Maawatak ti kasasaad ti dua nga agtutubo nga agtungtungtong iti telepono agsipud ta dayta ti makitkitak a pagtungpalak. Masapul nga isardengko ti pannakilangenko iti diak kasekso agsipud ta saanak pay a nakasagana a maki-date. Dagiti artikulo a kas iti daytoy ti mangparagsak kaniak nga agtalinaed iti desisionko nga aguray.

M.R.C., Estados Unidos

Agtawenak iti 14. Daytoy nga artikulo ti talaga a nakatulong kaniak a mangtarus no kasano kapeggad ti maki-date iti kastoy nga edadko, tangay saanak pay a nakasagana a makiasawa. Tinulongannak ti artikulo a nasken a parang-ayek itan ti relasionko ken Jehova imbes a makiayan-ayatak.

A. P., Canada

Daytoy nga artikulo ket kasla naisurat para kaniak. Impagarupko idi nga estrikto unay ti dadakkelko ken dida maawatan dagiti riknak. Maawatak itan nga ikagkagumaanda ti tumulong ken mangsalaknib kaniak. Segseggaak dagiti masakbayan a ruar ti “Agimtuod Dagiti Agtutubo”!

H. E., Romania