“Dagiti Siruhano” nga Agkinnikinni ken Narawet

Nupay nakaar-ariek no panunoten ti dadduma, maar-aramat ken lumatlatak manen ti nalaing ken managdaldalus a “siruhano”​—ti nanumo nga igges. Impadamag ti The Journal of the American Medical Association (JAMA) a sinubok dagiti doktor idiay United Kingdom no naballigi dayta kadagiti 12 a pasiente nga adda gaddil iti sakada. Innem ti naagasan iti kadawyan a pamay-an a panangagas babaen ti hydrogel, ken innem ti naikkan kadagiti igges.a

“Nadalusan ti sugat ti innem a pasiente a naikkan iti pangagas nga igges kalpasan laeng iti 3 nga aldaw,” kuna ti JAMA. Kadagidiay naagasan iti kadawyan a pamay-an, “dua laeng ti nadalusan dagiti sugatda kalpasan ti 1 a bulan a panangagas. Masapul a maagasan pay ti uppat.” Kuna ti medikal a magasin dagiti Britano a The Lancet a ti panangagas babaen ti igges “kissayanna unay ti kapaut ti panangagas no idilig kadagiti kadawyan a panangagas” ken “nasurok la a kagudua ti balor ti sapsapo a hydrogel ti magasto.”

No kas pagarigan mausar dagiti igges a pangagas iti sugat a natayen dagiti tisyuna​—mangikabil dagiti doktor kadagiti babassit a nadalus nga igges iti sugat, kuna ti JAMA. (Siempre, usaren laeng dagiti doktor dagidiay kita ti igges a di mangkaan iti nasalun-at a tisyu.) Kalpasanna maabbongan ti sugat iti nakaing-ingpis a gasa a naylon ken ti material a nalaka a mangagsep iti natay a tisyu. No nabsogen dagiti igges, maikkat dagitoy ket maibellengen, ket maikabil manen dagiti baro nga igges agingga a naan-anay a madalusan ti sugat. Kalpasan dayta, sumayaaten ti panagpabaro ti lasag gapu iti panagayus ti dara kadagiti nabati a nasalun-at a tisyu.

“Awan pay ti pasientemi a nagkedked kadagiti igges,” kinuna ti vascular surgeon a ni Michael Walker. “Dagiti katrabahuanmi ti maariek, saan a dagiti pasiente.” Malaksid iti United Kingdom, us-usaren met ti Estados Unidos ken Canada iti sumagmamano nga ospital ti panangagas babaen kadagiti igges. Kinapudnona, kinuna ti maysa a siruhano a naadaw iti The Lancet nga “ad-adu a pasiente idiay EUA ti agkidkiddaw a maagasanda babaen iti igges ngem kadagiti doktor a mayat a mangusar iti dayta.”

Naiparna laeng ti pannakadiskubre iti panangagas babaen ti igges. Kuna ti Science World a “natakuatan dagiti doktor iti paggugubatan a nabibiit nga immimbag dagiti aduan igges a sugat ti adu a soldado ngem kadagiti awanan igges. Isu a di nagbayag, nangrugin ti panangagas babaen kadagiti igges.” Ket ita, maus-usaren dayta iti ginasut nga ospital idiay Estados Unidos ken Europa.

[Footnote]

[Ladawan iti panid 22]

Naipakita ti adu nga igges nga adda iti ramay (aktual a kadakkel)

[Credit Line]

Picture copyright SMTL, http://www.smtl.co.uk/

[Dagiti ladawan iti panid 22]

Sakbayna

Kalpasanna

[Credit Line]

Rinetrato ni R. Sherman, University of California, Irvine