Usarem a Nainsiriban Dagiti Agas

BABAEN TI MANNURAT TI AGRIINGKAYO! IDIAY SOUTH AFRICA

NO MANGIRESETA ti doktormo iti agas, sigurado a nasayaat ti panggepna, nga ibasarna ti resetana iti dayagnosis, medikal a pannakaammo, ken kapadasanna. Nupay kasta, saan koma a namnamaen ti pasiente nga aklonen ti doktor nga isu ti naan-anay a manungsungbat iti kinasalun-at ti pasiente. Ti pasiente latta ti manungsungbat iti aniaman a tomarenna.

No agtomarka iti naireseta nga agas, amirisem dagiti sumaganad a praktikal a pagannurotan manipud iti maysa a doktor:

● Adda pagdaksan ti amin nga agas. Adda kalintegam a mangammo no ania ti naireseta nga agas ken no ania dagiti posible a pagdaksanna. No saan nga ibaga daytoy ti doktor, dika bumdeng nga agsaludsod. Iti kaaduan a kasasaad, ad-adu dagiti pagimbagan ngem kadagiti pagdaksan. Ngem masapul nga ammom dagitoy tapno nainsiriban ti panagdesisionmo.

● Nagduduma ti epekto ti agas iti nadumaduma a tattao. Saan a maipakpakauna ti doktormo ti eksakto a panangapektar kaniam ti naireseta nga agas. No madanaganka kadagiti di ninamnama a pagdaksanna, agkonsultaka iti doktormo.

● Ammuem no kasano kapaut a tomarem ti agas. Ammuem met no makaadikto dayta.

● Agannadka no kaano ti panangikeddengmo a mangisardeng iti panagtomarmo, nalabit gapu ta sumaysayaaten ti panagriknam. Mabalin a kumaro ti kasasaadmo no nasapa unay nga isardengmo ti agtomar iti agasmo. Agkonsultaka ngarud nga umuna iti doktormo.

● Kanayon nga agpaiwanwanka iti doktor no agtomarka iti naireseta nga agas.