Ti Nagdakkel a Kayo ti Tule

BABAEN TI MANNURAT TI AGRIINGKAYO! IDIAY MEXICO

DAGITI redwood iti California ti katatayagan a kayo iti lubong, yantangay tumayagda iti 110 a metro wenno nasurok pay. Nupay kasta, nagpaiduma ti sirkumperensia ti sipres iti Mexico, a kabagian ti sequoia. Ti kalatakan a kita daytoy a kayo ket adda iti ili ti Santa María del Tule, a walo a milia iti daya ti siudad ti Oaxaca, Mexico. Napanaganan dayta a kayo ti Tule. Ti puonna ket 46 a metro. Tapno mailadawanmo ti kadakkelna, masapul a siuunnat dagiti ima ti di kumurang a 30 a tattao a mangpalawlaw iti suray ti puon, ket nasurok a 500 ti mabalin nga aglinong iti dayta!

Mapattapatta a nasuroken a 2,000 a tawen ti kayo ti Tule. Iti pannakaarbasna idi 1996, naikkat ti sangapulo a tonelada a natayen a paset ti kayo. El Gigante (ti Higante) ti pangawag dagiti umili iti dayta a kayo. Ditoy Mexico, maawagan ahuehuete daytoy a kita, nga iti lenguahe a Nahuatl, “lakay iti danum” ti kaipapananna, yantangay kaaduanna, agbiag dayta iti asideg ti danum wenno kadagiti naaluguog a disso.