Ti Panangmatmat ti Biblia

Fêng Shui​—Maitutop Aya Kadagiti Kristiano?

ITI Asia, mapili dagiti disso a pagitaneman a maitunos iti dayta. Madisenio ken maarkosan dagiti pasdek a maitunos iti dayta. Maibasar iti dayta ti pannakagatang ken pannakailako dagiti sanikua. Kadagiti Tsino, pagaammo dayta a fêng shui, maysa a porma ti panagbuyon babaen kadagiti linia wenno signo. Nupay adun a siglo a nalatak ti fêng shui iti Asia, iti kallabes a tawtawen, nagsaknapen dayta kadagiti Makinlaud a pagilian. Daytat’ us-usaren ti sumagmamano nga arkitekto iti panagdisenioda kadagiti agkakangato a pasdek, opisina, ken balbalay. Daytat’ us-usaren ti sumagmamano nga agtagtagibalay iti panangarkos kadagiti pagtaenganda. Pinullo a libro ken Web site iti Internet ti mangitandudo ken mangisuro iti dayta.

Apay a lumatlatak? Sigun iti maysa a manangitandudo, makaipaay ti fêng shui iti “nasayaat a panagbiag, kinasalun-at, nasaysayaat a panagasawa wenno panagasmang, ad-adu a kinabaknang, ken natalna a panagpampanunot ti maysa a tao.” Nupay kasla makaay-ayo amin dayta, ania ngamin aya daytoy nga aramid, ket kasano ti rumbeng a panangmatmat dagiti Kristiano iti dayta?

Ania Dayta?

Ti Tsino a sasao a fêng shui literal a kayatda a sawen, “angin-danum.” Nangrugi ti fêng shui idi napataud ti adu a pilosopia iti Daya rinibu a tawenen ti napalabas. Karaman kadagitoy ti panamati iti maaw-awagan a kinabalanse ti yin ken yang (sipnget ken lawag, napudot ken nalamiis, negatibo ken positibo). Ti konsepto ti yin ken yang isut’ namagsugpon iti kapanunotan a chʼi, a literal nga “angin” wenno “anges” ti kaipapananna. Ti yin, yang, ken chʼi, agraman dagiti maaw-awagan a lima nga elemento a kayo, daga, danum, apuy, ken metal, ti mangbukel kadagiti napateg a paset ti teoria ti fêng shui. Patien dagiti deboto iti fêng shui nga agtartaray dagiti nabileg a linia ti enerhia iti tunggal buya ti aglawlaw. Ti kalat isut’ panangisuro iti disso a pagpadaan dagiti enerhia, wenno chʼi, iti daga ken langit. Maaramid daytoy babaen ti panangbalbaliw iti buya ti aglawlaw wenno babaen ti panangtarimaan iti uneg ti pasdek iti partikular a disso. Maipagarup a ti panangpataud iti daytoy a kinabalanse ti mangyeg iti nasayaat a gasat kadagiti agtartrabaho wenno agnanaed sadiay.

Kadawyanna, agkonsulta dagiti eksperto iti fêng shui iti maysa a kompas a pagpadles.a Maisaad daytoy bassit a magnetiko a kompas iti tengnga ti astrolohikal a tsart. Aglaon ti kompas kadagiti sirkulo nga adda iti uneg dagiti sirkulo a nabingay kadagiti linia. Ti kompas a pagpadles ket addaan iti adu nga impormasion maipapan iti bambanag a kas kadagiti konstelasion, paniempo, ken panawen dagiti siklo a nainaig iti init. No maamiris ti maysa a disso wenno pasdek, mailista ti adu nga impormasion nga ipalnaad ti kompas. Paliiwen ti eksperto iti fêng shui no sadino ti pagsasapalan ti dagum ti kompas kadagiti punto iti makinruar a linia ken sirkulo, ket manipud iti daytoy, ikeddengna no ania ti kasapulan a “pangagas” iti maysa a disso.

Mabalin a karaman iti panangikeddeng no kasano nga agbalin a balanse ti maysa a disso isut’ panangusig iti kasasaad ti asideg a daga, dagiti pagayusan ti danum, kanal, ken uray ti pakaikabilan dagiti tawa ken ridaw iti maysa a pasdek. Kas pagarigan, idiay Canada, adda sarming nga isab-it ti tindero iti ngato ti makinlikud a ridaw ti tiendaanna tapno “makorehir” ti posision dagiti ridaw ti puestona. Umasping iti dayta, nalabit isingasing ti maysa nga eksperto iti panagbuyon a mayakar dagiti mula wenno muebles, masukatan ti maysa a retrato, manayonan kadagiti maibitin nga arkos nga aguni no masagid wenno maanginan, wenno maikabil ti maysa nga aquarium tapno agbalin a balanse ti pasdek wenno siled.

Ti Nakristianuan a Panangmatmat

Naisangsangayan ta dagiti libro iti fêng shui ket klasipikaren ti kaaduan a libraria a karaman kadagiti sinurat maipapan iti astrolohia ken panagpalad. Kinapudnona, deskribiren ti Webster’s Ninth New Collegiate Dictionary ti panagbuyon kas “panagipadles babaen kadagiti numero wenno linia wenno geograpikal nga estruktura.” (Kuami dagiti italiko.) No kasta, patien ti kaaduan a ti fêng shui ken ti dadduma pay a kita ti panagbuyon ket karaman iti adu a kita ti panagpalad. Mainaig dagitoy iti panagpadles ken espiritistiko nga aramid, a saanen a baro iti sangatauan.

Idi pimmanaw met laengen dagiti Israelita idiay Egipto ket simrekda iti daga ti Canaan idi maika-15 a siglo K.K.P., nagraira ti amin a kita ti panagpadles kadagita a lugar. Babaen ken Moises, imbaga ti Dios ti nailanad iti Deuteronomio 18:14: “Dagitoy a nasion nga ikkatam iti sanikua umim-imdengda idi kadagidiay agsalsalamangka ken kadagidiay agpadles; ngem no maipapan kenka, saannaka nga inikkan ni Jehova a Diosmo iti aniaman a kas itoy.” Idiay kadaanan a Babilonia ti nagtaudan ti adu a kita ti panagpadles idiay Egipto ken Canaan. Idi riniribuk ni Jehova ti pagsasao dagiti umili ti Babilonia, naiwarasda iti dadduma pay a lugar. Intugotda dagiti aramid a nainaig iti panagpadles ken espiritismo dagiti taga Babilonia.​—Genesis 11:1-9.

Siiinget ken maulit-ulit a pinakdaaran ni Jehova a Dios ti Israel a dina ar-aramiden ti panagpadles ti dadduma a nasion babaen ti panagkunana: “Awan koma ti masarakan kenka nga asinoman . . . a mangaramat iti panagpadles, maysa a managsalamangka wenno asinoman nga agsapul kadagiti partaan . . . Ta isuamin nga agar-aramid kadagitoy a banag ket nakarimrimon ken Jehova, ket maigapu kadagitoy a nakarimrimon a banag pagtalawen ida ni Jehova a Diosmo iti sanguanam.” (Deuteronomio 18:9-12; Levitico 19:26, 31) Di bumurong a mapapatay idi dagiti nakipaset iti panagpadles.​—Exodo 22:18; Levitico 20:27.

Apay a naan-anay a makondenar ti panagpadles? Saritaen ti Aramid 16:16-19 ti maipapan iti maysa a babai nga addaan “sairo iti panagpadles.” Wen, ti panagpadles ket nainaig unay iti demonismo. Ti panagaramid iti aniaman a kita ti panagpadles ket mabalin ngarud a pannakiuman ti maysa a tao ken ni Satanas ken kadagiti demoniona! Agtungpal dayta iti naespirituan a pannakadadael.​—2 Corinto 4:4.

Ti dadduma nga estilo ti panangarkos ken panangurnos iti buya ti aglawlaw, iti man Daya wenno Laud, ket mabalin a datin a naimpluensiaan iti palso a narelihiosuan nga aramid a kas iti fêng shui. Ngem masansan nga interamente nga awanen ti narelihiosuan a kinapateg dagita nga estilo. Kaskasdi a nalawag a pananglabsing iti linteg ti Dios ti panangusar iti fêng shui tapno maipakpakauna ti masakbayan babaen ti panagpadles wenno tapno sumangbay ti naimbag a gasat wenno kinasalun-at. Ti panangaramid iti kasta ket pananglabsing iti nabatad a pammilin ti Biblia a saanmo a sagiden ti aniaman a “di nadalus.”​—2 Corinto 6:14-18.

[Footnote]

[Ladawan iti panid 23]

Kompas a pagpadles

[Credit Line]

Panid 2 ken 23: Hong Kong Tourism Board