Manipud Kadagiti Agbasbasa

Arthritis Nagustuak unay ti serye a “Namnama Kadagiti Agsagsagaba iti Arthritis.” (Disiembre 8, 2001) Agtawenak iti 21, ken dandanin 15 a tawen nga agsagsagabaak iti nakaro nga arthritis ken dagiti epektona. Talaga a makaparegta kaniak daytoy a serye, ket pinakiredna ti pakinakemko nga agtultuloyak nga agibtur.

A. F., Francia

Agserserbiak kas amin-tiempo nga ebanghelisador. Tagipatgek daytoy a pribilehio ngem rumigrigat ti panangitungpalko iti dayta. Nadayagnos ti kasasaadko kas osteoarthritis. Inaldaw nga agpapaut-otak, ket no dadduma, agleddaangak gapu iti pannakaupayko. Pagyamanan iti kasta a naintiempuan nga artikulo ken iti panangipalagipyo a ti panamatitayo iti inkari ni Jehova a baro a lubong ti gubuayan iti pudno a liwliwa.

H.M.A., Estados Unidos

Agsagsagabaak iti rheumatoid arthritis, ket madama nga agpapaungarak iti nakaro nga iyaatake daytoy a sakit. Siuumiso a dineskribir dagitoy nga artikulo ti panagsagaba ti maysa a tao nga addaan iti kastoy a sakit. Makatulong ti panangammo ti ad-adu pay maipapan iti dayta ken no ania ti maaramidan tapno makissayan dagiti epektona.

G.F.F., Portugal

Agtawenak iti 21 ket naammuak nga addaanak iti juvenile rheumatoid arthritis idi 10 pay laeng ti tawenko. Adun a kapadasan ti nabasak kadagiti medikal a magasin, ngem awan ti maipadis kadagiti nabasak maipapan kadagiti naespirituan a kakabsatko nga agsagsagaba iti sagsagabaek. Kas ken ni Katia, a nadakamat kadagiti artikulo, diak naitultuloy ti karerak kas amin-tiempo nga ebanghelisador. Nagpateg a maammuan no kasano a dadaeran ti sabsabali ti pannakaupay ken pannakakonsiensia gapu ta basbassiten ti maaramidanda a panagserbi ken Jehova.

H. M., Estados Unidos

Makatawenen manipud idi agtawenak iti 24, a nadayagnos nga addaanak iti chronic rheumatoid arthritis. Kapilitan nga insardengko ti panagserbik kas amin-tiempo nga ebanghelisador. Nagleddaangak unay. Gapu iti nakaro nga ut-ot ken pannakabannog, kagudua laengen ti maaramidak iti dati nga ar-aramidek. Liniwliwanak daytoy nga artikulo, gapu ta naammuak a sagsagabaen ti sabsabali ti sagsagabaek met laeng nga ut-ot ken kinasaem. Nagustuak met ti praktikal nga impormasion maipapan iti panangaramidko laeng iti kabaelak. Segseggaak ti aldaw inton “kumalay-atto daydiay pilay a kas iti panagkalay-at ti kalakian nga ugsa.”​—Isaias 35:6.

T. U., Japan

Makatawenen ti napalabas, napasarak ti nakaro a panagut-ot ti sumagmamano a susuopko. Yantangay maysaak nga agkabannuag, diak pulos impagarup a mabalin nga arthritis dayta. Tinulongannak ti artikuloyo tapno agbalinak a natimbeng ken nainkalintegan iti namnamaek iti bagik.

B. P., Estados Unidos

Agtawenak iti 19, ken adda arthritis dagiti pungupunguak, lipaylipay, ken tumtumengko. Nagustuak ti subtema a “Panangraem Kadagiti Limitasionmo.” Maysaak a taga Estados Unidos nga immay ditoy Ecuador tapno agserbi kas amin-tiempo nga ebanghelisador. Ngem gapu iti kinakapuy, pannakabannog, ken ut-ot, apagbiit laengen a makapanak iti ministerio. Inkeddengko ti agawid tapno agpaagasak, ket sapay koma ta makasubliak ditoy apaman nga umimbagak.

J. S., Ecuador

Fêng Shui Pagyamanan iti artikulo a “Fêng Shui​—Maitutop Aya Kadagiti Kristiano?” (Disiembre 8, 2001) Maysaak nga interior designer ket nabiit pay a kiniddaw ti maysa a klientek nga ipakatko ti fêng shui iti aramidek a disenio. Madanaganak idi ta diak unay kabesado daytoy nga aramid. Dimteng ti artikulo iti umiso a tiempo! Inkeddengko a saanak a makipaset iti daytoy a pilosopia iti panagdisenio.

C.  V., Estados Unidos