Arthritis—Ti Makabaldado a Sakit
“DIKA MAILADAWAN TI UT-OT AGINGGA A DIKA MAPADASAN. PAGARUPEK A MABANG-ARANKA LAENG NO NATAYKAN.”—SETSUKO, JAPAN.
“GAPU TA ADDAANAKON ITI KASTOY A SAKIT SIPUD PAY IDI AGTAWENAK ITI 16, MARIKNAK A TINAKAWNA TI KINAUBINGKO.”—DARREN, GRAN BRITANIA.
“NAPUKAWKO TI DUA A TAWEN ITI BIAGKO GAPU ITI PANNAKAIDALITKO.”—KATIA, ITALIA.
“APAMAN A NANGRUGI TI PANAGUT-OT TI AMIN A SUSUOPKO, NAUT-OTEN TI INTERO A BIAGKO.”—JOYCE, SOUTH AFRICA.
DAGITOY ti nakalkaldaang nga ebkas dagiti biktima iti sakit a maawagan arthritis. Ti arthritis ti pakaigapuan ti tinawen a panagpadoktor ti minilion nga agsagsagaba ta kayatda ti mabang-aran iti pataudenna nga ut-ot, di pannakagunay, ken pannakadisporma.
Idiay laeng Estados Unidos, apektaran ti arthritis ti nasurok nga 42 a milion a tattao, baldaduenna ti 1 iti kada 6 nga agsagsagaba. Kinapudnona, iti dayta a pagilian, arthritis ti kangrunaan a pakaigapuan ti pannakabaldado. Ti epekto daytoy a sakit iti ekonomia ket “dandani katupag ti saan unay a nakaro a panagbaba ti ekonomia,” kuna ti National Centers for Disease Control and Prevention, tangay mabusbos dagiti Americano ti nasurok nga 64 a bilion a doliar iti kada tawen iti panagpaagas ken mapukaw a magapuanan. Sigun iti World Health Organization, ipakita dagiti surbey a pakairamanan ti adu a napanglaw a pagilian a kas iti Brazil, Chile, China, India, Indonesia, Malaysia, Mexico, Pakistan, Pilipinas, ken Thailand, a ti makapadanag nga arthritis ken dadduma pay a sakit a rayuma kadagita a pagilian ket dandani “kapada dagidiay adda kadagiti industrialisado a pagilian.”
Saan nga agpayso a sakit laeng ti lallakay ken babbaket ti arthritis. Agpayso nga ad-adda a maapektaran ti tattao bayat a lumaklakay wenno bumakbaketda. Ngem ti kadawyan nga apektaran ti gagangay unay a kita, ti rheumatoid arthritis, ket dagiti agedad iti nagbaetan ti 25 ken 50. Idiay Estados Unidos, dandani 3 iti kada 5 nga addaan arthritis ti ub-ubing pay ngem 65. Umasping iti dayta, idiay Gran Britania, awan pay 45 ti edad ti 1.2 a milion kadagiti 8 a milion nga agsagsagaba. Ubbing ti nasurok a 14,500.
Kada tawen, nakaparpartak ti iyaadu dagiti agsagsagaba iti arthritis. Idiay Canada, umadunto iti maysa a milion ti bilang dagiti addaan iti arthritis iti sumaganad a dekada. Nupay ad-adu ti agsagsagaba iti arthritis idiay Europa ngem idiay Africa ken Asia, umad-adu metten ti addaan iti kastoy a sakit kadagitoy a kontinente. Ti ngarud iyaadu dagiti addaan iti arthritis ti nangtignay iti World Health Organization a mangiwaragawag iti tawen 2000-2010 a Bone and Joint Decade. Bayat daytoy a tiempo, agtitinnulong dagiti doktor ken propesional a mangay-aywan iti salun-at iti intero a lubong a mangikagumaan a mangpasayaat iti kalidad ti biag dagiti agsagsagaba kadagiti sakit a mangapektar iti piskel ken tultulang a kas iti arthritis.
Ania ti naammuanen maipapan iti daytoy naut-ot a sakit? Siasino dagiti agpeggad a makapataud iti dayta? Kasano a maibturan dagiti agsagsagaba ti arthritis ti makabaldado nga epektona? Addanto kadi agasna iti masanguanan? Dagitoy ti salaysayen ti sumaganad nga artikulomi.
[Picture Credit Line iti panid 3]
X ray: Nausar gapu iti naasi a pammalubos ti Arthritis Research Campaign, United Kingdom (www.arc.org.uk)