No Kasano a Makomendaran ti Trabaho Idiay Moscow
IDI 1998, naisaklang iti korte ti munisipio ti Golovinsky a distrito ti Moscow ti demanda sibil a mangkidkiddaw iti pannakaiparit ti aktibidad dagiti Saksi ni Jehova. Mabalin nga ibagayo a karkarna dayta tangay dagiti Saksi ket nabiit pay a pinadayawan dagiti lokal nga opisial ti Golovinsky District Administration.
Apay a dagiti Saksi ket pinadayawan dagiti opisial idiay Moscow idinto ta maigiddato iti dayta, panggep ti sumagmamano a tattao a paritan ida iti siudad? Ti apagbiit a panangrepaso iti aktibidad dagiti Saksi sadiay ti mangipaay kadagiti sungbat.
Dagiti Saksi Idiay Moscow
Idi ngalay ti dekada 1950, ti Moscow ti maysa kadagiti sumagmamano a kabesera iti lubong nga awan man la ti Saksi ni Jehova nga agnanaed sadiay. Apay? Ngamin, rinibu a Saksi idiay Moscow ti naideporta, a kas iti napasamak iti rinibu pay nga agnanaed iti nadumaduma a paset ti Union Soviet. Nakaideportaanda? Kaaduan ti naipan kadagiti kampo a pagtrabahuan dagiti tagabo idiay Siberia.
Iti panaglabas ti adu a tawen, adda sumagmamano a taga Moscow a nangrugi a nagadal iti Biblia babaen ti tulong ti adu a publikasion dagiti Saksi, nga idi a tiempo ket naiparit idiay Russia. Idi ngalay ti dekada 1970, dagidi a sumagmamano a nagbalinen a Saksi ket agtataripnongda nga agadal iti Biblia iti apartment ni Murat Shakirov idiay Moscow. Idi dekada 1980, tinulongan dagiti miembro daytoy bassit a grupo ti adu a sabsabali pay tapno aginteresda met a makipagadal iti Biblia.
Idi nagbalin a legal ti aktibidad dagiti Saksi ni Jehova iti Union Soviet idi Marso 1991, addan dakkel a kongregasion dagiti Saksi a siwayawaya nga agtigtignay idiay Moscow. Rinibu a tattao ti nagagaran a mangammo no apay a naidadanes dagiti Saksi. Ket kayatda a maammuan no ania a talaga ti isursuro ti Biblia. Isu nga idi naangay ti maysa a kombension idiay Kiev, Ukraine, idi Agosto 1991, nasurok a 2,000 a taga Moscow ti nagdaliasat iti agarup 890 a kilometro tapno tumabunoda. Adu kadagitoy ti karaman kadagiti 1,843 a nabautisaran sadiay.
Idi naangay ti dakkel nga internasional a kombension dagiti Saksi ni Jehova idi 1993 iti Locomotive Stadium ti Moscow, 23,743 a tattao manipud iti nasurok a 30 a pagilian ti timmabuno. Idi arinunos dayta a tawen, nagbalinen a 21 ti bilang dagiti kongregasion idiay siudad ti Moscow. Ita, walo a tawen kalpasanna, addan 104 a kongregasion iti dayta met la a lugar.
Idi Hunio ken Hulio daytoy a tawen, 18,292 a tattao ti timmabuno iti uppat a kombension distrito dagiti Saksi ni Jehova idiay Moscow, ket 546 ti nabautisaran. Ti nakaskasdaaw nga iyaadu dagiti makipagad-adal iti Biblia kadagiti Saksi ti makagapu a padpadasen dagiti panguluen ti Russian Orthodox Church nga impluensiaan dagiti opisial ti Moscow tapno paritanda ti aktibidad dagiti Saksi.
Idi rugrugi ti 1998, naisaklang iti korte idiay Golovinsky ti kaso a mangikagkagumaan a mangiparit kadagiti Saksi. Kamaudiananna, inkeddeng ti hues idi Pebrero 23, 2001, nga inosente dagiti Saksi kadagiti nakaidarumanda. Nupay kasta, idi a ti kaso ket inyapelar dagiti abogado ti nagdarum iti nangatngato a korte ti Moscow, naisubli dayta tapno usigen manen ti korte nga immuna a nangtaming iti dayta.
Ngem agpapan pay kadagiti panggep ti sumagmamano a tattao a mangiparit kadagiti Saksi, apay a dagiti Saksi ket pinadayawan dagiti opisial ti Golovinsky District Administration iti siudad ti Moscow?
Gapu iti Baro a Paggigimongan
Idi Disiembre 1998, gimmatang dagiti Saksi iti dakkel, dua ti kadsaaranna a pasdek a kaabay ti Mikhalkovsky Park. Maus-usar idi dayta a sentro ti kultura. Nabayag metten a rinugian dagiti Saksi a tarimaanen daytoy dakkel a pasilidad. Ramanen dayta ti lima a Kingdom Hall, wenno paggigimongan, para iti 22 a kongregasion dagiti Saksi ni Jehova.
Itay napalabas nga Abril 15, kiniddaw ti maysa nga administrador ti distrito ti Golovinsky a dalusan dagiti Saksi ti Mikhalkovsky Park idi Abril 21. Idiay Russia, gagangay nga agtitinnulong dagiti residente ken grupo ti komunidad a mangdalus kadagiti parke ken haywey. Idi Abril 17, nagmimiting dagiti Saksi tapno iplano ti trabahoda. Iti dayta a miting, naikeddeng nga agarup 700 a trabahador ti kasapulan.
Panangibanag iti Trabaho
Idi Abril 18, impakaammo dagiti Saksi kadagiti opisial iti distrito ti Golovinsky no mano a karaid ken dadduma pay nga alikamen ti kasapulan. Di namati dagiti opisial nga agarup 700 a trabahador ti mayat nga agdalus. Ngem idi alas 9:30 iti agsapa ti Abril 21 nga agsangpeten iti parke dagiti empleado ti administrasion, ginasut a Saksi ti madaman nga agdaldalus, ngem 200 laeng nga alikamen a panghardin ti us-usarenda. Idi agangay, 200 pay a kanayonan a karaid ti naisangpet tapno mausar. Dagidiay awanan iti alikamen ti nangusar laengen kadagiti imada tapno agala iti basura sada inkabil dagitoy kadagiti plastik a supot. Nangitugot pay ketdi dagiti Saksi kadagiti botas ken bilog tapno madalusanda ti dakkel a libtong.
Nasdaaw dagiti pannakabagi ti administrasion iti pannakairingpas ti trabaho. Kinunada a nagtrabaho dagiti tattao a kunam la no ti pagnanaedanda a mismo ti daldalusanda, ta sipapasnek ken siraragsak a nagtrabahoda. No dagupen, agarup sangaribu a Saksi ni Jehova ti timmulong a nangdalus iti Mikhalkovsky Park, ket nasurok a 250 a tonelada a basura ti naikkat. Kinuna dagiti agnanaed iti aglawlaw a kalpasan ti nabayagen a tiempo, ita pay la a nakitada a nakadaldalus ti parke.
Kas nadakamaten, nasdaaw dagiti opisial iti naaramidan isu a nagyamanda unay. Kastoy ti insurat ti maysa nga opisial iti distrito ti Golovinsky: “Agyaman ti Golovinsky District Administration iti North Administrative Region ti Moscow iti narelihiosuan a komunidad dagiti Saksi ni Jehova iti pannakipasetda a nangdalus iti Mikhalkovsky Park.” Umasping iti dayta ti kinuna ti maysa a katulongan nga opisial: “Daytoy nadayaw ken napateg a trabaho ket pagnumaran ken pakaragsakan ti amin nga agpasiar iti parke.”
Nupay maragsakan dagiti Saksi ni Jehova a mangpapintas kadagiti lugar iti aglawlaw dagiti pagnanaedanda—ken makipasetda kadagita a proyekto a nadeskribir ditoy—ti kangrunaan a trabahoda ita isut’ panangiranud kadagiti tattao iti naimbag a damag ti Pagarian ti Dios, ti gobierno a mangyeg iti Paraiso a kasasaad iti intero a daga. (Mateo 24:14) Bayat nga agdaldalusda iti Mikhalkovsky Park, nangngeg a kinuna ti dadduma a nasayaat ti ar-aramidenda kas panagsanay iti aramidendanto a panangpapintas iti intero a daga kalpasan ti Armagedon.—Apocalipsis 16:14, 16.
Kinapudnona, segseggaan ti amin a managayat iti Biblia ti tiempo inton agbalinen ti intero a daga a kasla parke ti kinapintasna a kas iti panggep ti Dios a pagbalinanna idi pinarsuana ti immuna a natauan a pagassawaan.—Genesis 1:28; 2:8, 9, 15; Apocalipsis 21:3, 4.
[Ladawan iti panid 15]
Panagkikita manen dagiti naggigimong idi iti apartment ni Murat Shakirov idi ngalay ti dekada 1970
[Dagiti ladawan iti panid 16]
Naangay ti uppat a kombension idiay Moscow ita a tawen a tinabunuan ti agdagup iti 18,292
[Dagiti ladawan iti panid 17]
Daytoy dati a sentro ti kultura ket natarimaan tapno agbalin a lima a Kingdom Hall
[Dagiti ladawan iti panid 18]
Nasurok a 250 a tonelada a basura ti naikkat