Maibangbangon Pay Laeng Dagiti Nangangato a Pasdek iti Asia

“Adda innem a nagngangato a pasdek a madama a maipalplano a maibangon a nangatngato ngem iti dati a maipagpannakkel nga 419 a metro ti kangatona a World Trade Center,” kuna ti The Wall Street Journal. “Adda amin dagitoy iti Asia.” Kuna pay ti Journal a sadiay “agtultuloy ti 20 a tawen a panagessem kadagiti nangato a pasdek.”

Dagiti nangangato a pasdek ket makitanton iti nagtugmokan ti langit ken daga kadagiti siudad ti China, Korea, ken Taiwan. “Naigamer unay iti panunot ti tao ti tarigagayna a makadanon iti tangatang,” kuna ni Cesar Pelli, nga arkitekto ti agdama a kangatuan a pasdek iti lubong nga isu ti dua a pasdek a Petronas Towers idiay Kuala Lumpur, Malaysia. “Nanipud idi naibangon ti Torre iti Babel, addan daytoy a tarigagay a mangibangon iti nangayed a pagilasinan a dumanon agingga iti tangatang.”

Dagitoy ket lalo a palpalagdaen dagiti inheniero. Mairaman kadagitoy dagiti saan a nadidingan a “kadsaaran a pagkamangan” iti kada 10 agingga iti 12 a kadsaaran, natibtibker nga espasio para kadagiti elebeytor, agdan, wenno tubo ti danum, biga a manglikmut iti pasdek a mangikamang iti espasio iti kadaklan, ken ad-adu pay nga agdan a pagruaran no adda uram, a lumawlawa agingga iti makimbaba a kadsaaran ti pasdek tapno ad-adu a tattao ti makalasat.

Iti agdama, adda agarup dua a dosena a mabalin a pagnaedan a pasdek iti lubong a nasurok a 300 a metro ti kangatoda, ket nasurok a kagudua kadagitoy ti adda iti Asia. “Ngem umanamong dagiti eksperto a nagbassit ti praktikal a pakasapulan iti aniaman a pasdek a nasurok nga 60 ti kadsaaranna,” kuna ti Journal.

[Ladawan iti panid 18]

Iti kangatona a 452 a metro, ti Petronas Towers ti kangatuan a pasdek iti lubong

[Tsart/Dagiti Ladawan iti panid 18]

(Para iti aktual a pannakaurnosna, kitaem ti publikasion)

Mairaman dagiti arkos a torre iti katayag ti pasdek ngem saan a nairaman dagiti antena ti pasdek.

143 a metro 2500 K.K.P. Piramid idiay Khafre, Giza, Egipto

300 a metro 1889 Eiffel Tower, Paris, Francia

348 a metro 1997 T & C Tower, Kaohsiung, Taiwan

369 a metro 1989 Bank of China, Hong Kong, China

442 a metro 1974 Sears Tower, Chicago, Estados Unidos

452 a metro 1997 Petronas Towers, Kuala Lumpur, Malaysia

460 a metro (Naiplano a maibangon inton 2007)Shanghai World Financial Center, Shanghai, China

508 a metro (Malpas inton 2003) Taipei Financial Center, Taipei, Taiwan

[Credit Line]

Amin a panangiladawan: Impaay ti SkyscraperPage.com