Mapagtalkan a Giya iti Masakbayan

GAPU kadi ta di mapagtalkan ti numerology ken ti dadduma a kita ti panagpadles, kaipapananna nga awanen ti pamay-antayo a mangammo iti masakbayantayo? Saan!

Dagiti numero a saan a makita dida maibaga iti sangatauan no ania ti ipagteng ti masakbayan. Ngem daytat’ naibagan ti “sibibiag a Dios,” a makaammo ‘iti punganay inggana iti pagnguduan.’ Aramidenna daytoy iti naisurat a Saona a ti Biblia. (1 Timoteo 4:10; Isaias 46:10) Daytoy met ti sao ti sibibiag a Dios, saan a ti sao dagiti numerologist, ti ‘makailasin kadagiti panunot ken panagem ti puso’ ket iti kasta matulongannaka a mangtarus no ania ti manggutugot kenka ken no ania ti makaipaay iti pudno a panagballigim.​—Hebreo 4:12.

Ti Namarsua kadatayo nga autor ti Biblia ti kakaisuna a makaipadles a siuumiso iti masakbayan. Maaramidna daytoy agsipud ta mannakabalin amin ti Dios, ken kanayon a tungpalenna ti saona. “Sinaok a mismo dayta,” kinuna ni Jehova a Dios. “Aramidekto met.” (Isaias 46:11) Kalpasan ti panangidaulo ni Josue kadagiti Israelita iti Naikari a Daga, nabaelanna a kinuna a buyogen ti panagtalek: ‘Awan napaay a maysa a sao manipud iti amin a naimbag a sasao a sinao kadakayo ni Jehova iti balay ti Israel; pimmudnoda amin.’​—Josue 21:45; 23:14.

Aglaon ti Biblia iti adu a padto a di pay natungpal. Mairaman kadagitoy dagidiay mangipadto iti tiempo a madalusanto ti daga iti amin a kinadakes ket mapagbalin a paraiso. (Salmo 37:10, 11; Proverbio 2:21, 22) Makaay-ayo kadi kenka dayta a masakbayan? Patiem kadi a ti Namarsua kadatayo ket addaan iti sirib ken pannakabalin a mangibanag iti umiso ken nagsayaat a kasasaad ditoy a planeta? No kasta, mabalin a kayatmo nga amirisen ti kunaen ti Biblia maipapan iti masakbayan ti daga.a

Busbosem ngaruden a nainsiriban ti tiempom itan​—ket dika padpadasen nga ammuen ti masakbayam babaen ti kaipapanan dagiti numero no di ket ikagumaam a gun-oden ti umiso a pannakaammo iti Biblia ken kadagiti padtona. Nakasagana a tumulong kenka dagiti Saksi ni Jehova tapno magun-odam ti pannakaammo maipapan iti masakbayan a naipalgak iti Sao ti Dios a ti Biblia.

[Footnote]