Pammati ken ti Masakbayanyo
“Ti pammati isu ti sigurado a panangsegga kadagiti bambanag a namnamaen.”—HEBREO 11:1.
1. Ania a kita ti masakbayan ti kayat ti kaaduan a tattao?
INTERESADOKAYO kadi iti masanguanan? Interesado ti kaaduan a tattao. Namnamaenda ti natalna a masanguanan, nga awan ti buteng, makapnek a kasasaad ti panagbiag, nabunga ken makaay-ayo a trabaho, nasayaat a salun-at ken napaut a biag. Di pagduaduaan a dagitoy ti kinalkalikaguman ti tunggal kaputotan iti historia. Ket iti daytoy lubong a napno iti riribuk, ad-adda a matarigagayan ita ti kakasta a kasasaad.
2. Kasano a minatmatan ti maysa nga estadista ti masanguanan?
2 Bayat nga umad-adani ti sangatauan iti maika-21 a siglo, adda kadi pamay-an tapno maammuantayo ti kasasaad iti masanguanan? Ti maysa a pamay-an ket inyebkas ni Patrick Henry, maysa nga Americano nga estadista nasurok a 200 a tawenen ti napalabas. Kinunana: “Awan ti ammok a pamay-an a pangukom iti masanguanan no di ti napalabas.” Sigun iti daytoy a panangmatmat, mabalin nga ammuen ti masakbayan ti sangatauan babaen ti inaramid ti tao iti napalabas. Adu ti umanamong iti dayta a kapanunotan.
Ania ti Kasasaad iti Napalabas?
3. Ania ti ipakita ti historia maipapan iti manamnama a kasasaad iti masanguanan?
3 No ti masanguanan ket umarngi iti napalabas, makaparegta kadi dayta kadakayo? Simmayaat kadi ti masanguanan para kadagiti immun-una a kaputotan iti unos dagiti naglabas a panawen? Saan. Iti baet ti ninamnama dagiti tattao iti rinibun a tawen ken namaterialan nga idudur-as iti dadduma a lugar, napno ti historia iti panangirurumen, krimen, kinaranggas, gubat, ken kinapanglaw. Napasaran daytoy a lubong ti nagsasagadsad a kalamidad, nga inyeg kangrunaanna ti nakapuy a panangituray ti tao. Siuumiso a kuna ti Biblia: “Ti tao inturayanna ti tao a maipaay iti pagdaksanna.”—Eclesiastes 8:9, NW.
4, 5. (a) Apay a napnuan namnama dagiti tattao idi rugrugi ti maika-20 a siglo? (b) Ania ti napasamak kadagiti ninamnamada iti masanguanan?
4 Kinapudnona, maulit-ulit laeng ti dakes a pakasaritaan ti sangatauan—ngem nasaksaknap ken nakarkaro pay. Daytoy maika-20 a siglo ti mangpaneknek iti dayta. Nakasursuro kadi ti sangatauan kadagiti biddut iti napalabas ken naliklikanna kadi dagitoy? Bueno, idi rugrugi daytoy a siglo, adu ti nangnamnama iti nasaysayaat a masanguanan gapu ta adda idi medio napaut a tiempo ti talna ken gapu iti irarang-ay ti industria, siensia, ken edukasion. Idi rugrugi ti dekada 1900, kinuna ti maysa a propesor ti unibersidad a namatida nga imposible a mapasamak pay ti gubat gapu ta “sibilisado unayen dagiti tattao.” Kinuna ti maysa a dati a primero ministro ti Britania maipapan iti kapanunotan dagiti tattao iti daydi a tiempo: “Sumayaat a sumayaat amin a banag. Daytoy ti lubong a napuotak.” Ngem kalpasanna kinunana: “Pagammuan, di napakpakadaan, iti maysa nga agsapa idi 1914 nagpatingga ti amin.”
5 Nupay nangnamnamada iti nasaysayaat a masanguanan iti daydi a tiempo, karugrugi pay laeng ti baro a siglo idi a ti lubong ket linakub ti kadadaksan a didigra a gapuanan ti tao—ti Gubat Sangalubongan I. Kas ehemplo iti kasasaad idi, usigenyo ti napasamak idi 1916 iti maysa a dangadang idi a rinaut dagiti buyot ti Britania ti armada ti Alemania iti asideg ti Somme River idiay Francia. Iti sumagmamano laeng nga oras, 20,000 a tropa ti Britania ti napapatay, ket adu ti napasag iti dasig ti Alemania. Ti uppat a tawen a panagpipinnatay kinettelna ti biag ti agarup sangapulo a milion a soldado ken adu a sibilian. Bimmassit idi ti populasion ti Francia gapu ta nakaad-adu ti napapatay. Narpuog ti ekonomia, a nagtungpal iti Panagsuek ti Ekonomia (Great Depression) idi dekada 1930. Di pakasdaawan a kinuna ti sumagmamano nga iti daydi aldaw a nangrugi ti Gubat Sangalubongan I, daydi met ti aldaw a nagmauyong ti lubong!
6. Simmayaat kadi ti biag kalpasan ti Gubat Sangalubongan I?
6 Daytoy kadi ti masanguanan a ninamnama daydi a kaputotan? Saan, adayo a kasta. Nakeltay dagiti ninamnamada; awan met ti nasaysayaat a nagturongan amin dagita. Kalpasan laeng ti 21 a tawen manipud idi Gubat Sangalubongan I, wenno idi 1939, nangrugi ti nakarkaro a didigra nga aramid ti tao—ti Gubat Sangalubongan II. Inkisapna ti biag ti agarup 50 milion a lallaki, babbai, ken ubbing. Dagiti reprep a panagbomba rinumrumekda dagiti siudad. Idi Gubat Sangalubongan I, rinibu a soldado ti napapatay iti maysa a dangadang iti sumagmamano laeng nga oras, idinto ta idi Gubat Sangalubongan II, nasurok a 100,000 a tattao ti inkisap ti dua laeng a bomba atomika iti sumagmamano la a segundo. Ti ibilang ti adu a nakarkaro pay ket ti sistematiko a pannakapapatay dagiti minilion kadagiti kampo konsentrasion dagiti Nazi.
7. Ania ti pudno a kasasaad iti daytoy a siglo?
7 Kuna ti sumagmamano a reperensia a no iramantay ti panaggugubat dagiti nasion, panagdadangadang dagiti umili, ken ti panangpapatay dagiti gobierno kadagiti mismo nga umilida, agarup 200 milion amin ti napapatay iti daytoy a siglo. Adda pay reperensia nga agkuna a 360 milion ti napapatay. Panunotenyo ti kinakas-ang amin daytoy—ti saem, lulua, tuok, ken dagiti nadadael a biag! Kanayonanna, agpromedio iti agarup 40,000 a tattao, kaaduanna ubbing, ti matmatay iti kada aldaw gapu iti kinapanglaw. Mamitlo dayta a bilang ti mapappapatay babaen ti aborsion iti kada aldaw. Maysa pay, agarup maysa a bilion a tattao ti nakakurkurapay nga uray la awan igatangda iti taraon a kasapulanda iti agmalem a panagtrabahoda. Amin dagitoy a kasasaad ket pammaneknek iti naipadto iti Biblia nga agbibiagtayon iti “maudi nga al-aldaw” daytoy dakes a sistema ti bambanag.—2 Timoteo 3:1-5, 13; Mateo 24:3-12; Lucas 21:10, 11; Apocalipsis 6:3-8.
Saan a Marisut ti Tao
8. Apay a dagiti natauan a lider saanda a marisut dagiti problema ti lubong?
8 Bayat nga agngudngudon daytoy maika-20 a siglo, mabalintay nga inayon dagiti pasamak iti dayta iti paspasamak kadagiti naglabas a siglo. Ket ania ti ibaga ti historia? Ibagana kadatayo a dagiti natauan a lider dida pulos narisut dagiti dadakkel a problema ti lubong, a dida risrisuten dagita ita, ket didanto marisut dagita iti masanguanan. Dida maipaay ti kita ti masanguanan a kayattayo, uray pay no kasano ti kasayaat ti tarigagayda. Ket adda dagiti agtuturay nga awanan iti kasta a tarigagay; agessemda iti saad ken pannakabalin nga agpaay iti bukodda a paglaingan ken material a pakagunggonaan, a saan ket nga agpaay iti pagimbagan dagiti dadduma.
9. Apay nga adda rasontayo nga agduadua a saan a kabaelan ti siensia a solbaren dagiti parikut ti tao?
9 Ti siensia kadi ti solusion? Saan no amirisentayo ti napalabas. Dagiti sientista ti gobierno adun ti nabusbosda a kuarta, panawen, ken rigat a mangparpartuat kadagiti nakaam-amak a kemikal, biolohikal, ken dadduma pay a kita ti igam. Dagiti nasion, agraman dagidiay napanglaw, mangbusbusbosda iti nasurok a 700 a bilion a doliar kadagiti armas iti tinawen! Maysa pay, mapabasol met ti ‘nasientipikuan nga idudur-as’ iti pannakapartuat dagiti kemikal a namagbalin a narugit iti angin, daga, danum, ken taraon.
10. Apay nga uray ti edukasion dina maipanamnama ti nasaysayaat a masanguanan?
10 Manamnamatay kadi dagiti institusion ti edukasion ti lubong a tumulong a mangbangon iti nasaysayaat a masanguanan babaen ti panangisuroda kadagiti nangato a moral nga estandarte, konsiderasion kadagiti sabsabali, ken panagayat iti kaarruba? Saan. Imbes ketdi, nakasentroda kadagiti karera, iti panagpabaknang. Iparparegtada ti nakaro a panagsisinnalisal, saan ket a panagtitinnulong; saan met nga isursuro dagiti eskuelaan ti moralidad. Imbes ketdi, adu kadagitoy ti mangkonkonsintir iti panagdenna dagiti di nagkasar, a nagbanag iti iyaadu dagiti masikog a tin-edyer ken dagiti sakit nga iyallatiw ti pannakidenna.
11. Kasano a ti kasasaad iti tay-ak ti negosio ipakitana a mapagduaduaan ti masanguanan?
11 Dagiti ngata dadakkel a negosio ti lubong bigla a magutugotda a mangsaluad iti planetatayo ken ipakitada ti panagayatda kadagiti sabali babaen ti panagaramidda kadagiti produkto a pudpudno a pagimbagan ket saan laeng a panguartaan? Adayo a kasta. Isardengda ngata ti agaramid kadagiti pabuya iti telebision a napno iti kinaranggas ken imoralidad a mamagruker iti isip dagiti tattao, nangruna dagiti agtutubo? Saan a pulos a makaparegta ti napalabas, ta kaaduanna, nagbalin ti TV a pagbasuraan iti imoralidad ken kinaranggas.
12. Ania ti kasasaad ti tao maipanggep iti sakit ken ipapatay?
12 Mainayon pay, uray kasano ti kinapasnek dagiti doktor, dida maparmek ti sakit ken ipapatay. Kas pagarigan, idi ngudo ti Gubat Sangalubongan I, dida nalapdan ti panagwaras ti trangkaso Español; iti intero a lubong, 20 milion a biag ti kinettelna. Ita, agraira ti sakit ti puso, kanser, ken dadduma pay a makapapatay nga an-annayen. Di met nabaelan ti medikal a lubong a parmeken ti moderno nga angol nga AIDS. Imbes ketdi, sigun iti report ti U.N. a naipablaak idi Nobiembre 1997, mamindua a naparpartak ti panagsaknap ti virus ti AIDS ngem kadagiti napalabas a pattapatta. Minilion ti natayen iti dayta. Iti nabiit pay a tawen, sabali pay a tallo a milion a tattao ti naimpektaran.
No Kasano ti Panangmatmat Dagiti Saksi ni Jehova iti Masanguanan
13, 14. (a) Kasano ti panangmatmat dagiti Saksi ni Jehova iti masanguanan? (b) Apay a di kabaelan dagiti tattao nga iyeg ti nasaysayaat a masanguanan?
13 Nupay kasta, patien dagiti Saksi ni Jehova a naraniag, nagsayaat ti masakbayan ti sangatauan! Ngem dida ipannuray dayta nasaysayaat a masanguanan iti panangikagumaan ti tao. Imbes ketdi, agpannurayda iti Namarsua, ni Jehova a Dios. Ammona no anianto ti kasasaad iti masanguanan, ket nakaskasdaawto dayta! Ammona met a di kabaelan dagiti tattao nga iyeg ti kasta a masanguanan. Tangay pinarsua ida ti Dios, ad-adda nga ammona ti limitasionda ngem ti uray asinoman. Iti Saona, sibabatad nga ibagana kadatayo a dina pinarsua dagiti tattao nga addaan abilidad a mangituray a sibaballigi a di iwanwan ti Dios. Ti naunday a panangipalubos ti Dios iti turay ti tao a naisina kenkuana nalawag nga ipakitana ti kasta a kinaawan kabaelan. Inannugot ti maysa a mannurat: “Pinadasen ti isip ti tao amin a posible a kombinasion ti turay, ket awan nagmaayanna.”
14 Iti Jeremias 10:23, mabasatayo ti sasao ti napaltiingan a mammadto: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” Kasta met, kuna ti Salmo 146:3: “Dika agkammatalek kadagiti prinsipe, ken iti anak ti tao, a kenkuana awan ti tulong.” Kinapudnona, tangay nayanaktayo nga imperpekto, kas ipakita ti Roma 5:12, pakdaarannatay ti Sao ti Dios a ditay koma agtalek uray iti bagbagitayo. Kuna ti Jeremias 17:9: “Ti puso manangallilaw a nakarkaro ngem dagiti amin a banag.” Gapuna, kuna ti Proverbio 28:26: “Ti agkammatalek iti pusona met laeng maag; ngem uray siasino a magna a nainsiriban maispalto.”
15. Sadino ti pakasarakantayo iti sirib a mangidalan kadatayo?
15 Pakasarakantayo iti daytoy a sirib? “Ti panagbuteng ken ni Jehova isu ti punganay ti sirib; ket ti pannakaammo iti Santo isu ti pannakaawat.” (Proverbio 9:10) Ni laeng Jehova ti addaan sirib a mangidalan kadatayo kadagitoy nakaam-amak a panawen. Ket impalubosna a makagun-odtayo iti siribna babaen iti Nasantuan a Kasuratan, nga impaltiingna a mangiwanwan kadatayo.—Proverbio 2:1-9; 3:1-6; 2 Timoteo 3:16, 17.
Ti Masakbayan ti Turay ti Tao
16. Siasino ti makaikeddeng iti masanguanan?
16 No kasta, ania ti ibaga kadatayo ti Sao ti Dios maipapan iti masanguanan? Ibagana kadatayo a ti masanguanan dina uliten ti inaramid dagiti tattao iti napalabas. Isu a di umiso ti kapanunotan ni Patrick Henry. Saan a dagiti tattao, no di ket ni Jehova a Dios ti makaikeddeng iti masakbayan daytoy daga ken dagiti tattao nga agnanaed iti dayta. Matungpalto ti pagayatanna ditoy daga, saan a ti pagayatan ti asinoman a tao wenno aniaman a nasion iti daytoy a lubong. “Adu a pakinakem ti adda iti puso ti maysa a tao; ngem ti patigmaan ni Jehova, dayta agnayonto.”—Proverbio 19:21.
17, 18. Ania ti pagayatan ti Dios iti panawentayo?
17 Ania ti pagayatan ti Dios iti panawentayo? Panggepna a pagpatinggaen daytoy naranggas, imoral a sistema ti bambanag. Ti sinigsiglon a nagdakes a panagturay ti tao ket sukatanto iti turay ti Dios. Kuna ti padto a masarakan iti Daniel 2:44: “Kadagiti al-aldaw dagita nga ar-ari [iti agdama], ti Dios ti langit mamangonto iti maysa a pagarian [sadi langit] a kaanoman dinto madadael ket ti panagturayna dinto met maited iti sabali nga ili; ngem burakennanto ken ibusennanto amin dagitoy a pagpagarian, ket isu agtalinaedto iti agnanayon.” Ikkatento met ti Pagarian ti dakes nga impluensia ni Satanas a Diablo, banag a di pulos maaramid dagiti tattao. Agpatingganton nga agnanayon ti panangiturayna iti daytoy a lubong.—Roma 16:20; 2 Corinto 4:4; 1 Juan 5:19.
18 Imutektekanyo ta ti nailangitan a gobierno ikkatennanto amin a porma ti turay ti tao. Saanto a dagiti tattao ti mangituray iti daytoy daga. Idiay langit, dagiti mangbukel iti Pagarian ti Dios ti mangiturongto kadagiti amin a maaramid ditoy daga nga agpaay iti pagimbagan ti sangatauan. (Apocalipsis 5:10; 20:4-6) Ditoy daga, makitunosto dagiti matalek a tattao iti panangiturong ti Pagarian ti Dios. Isu daytoy ti turay nga insuro ni Jesus nga ikararagtayo idi kinunana: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”—Mateo 6:10.
19, 20. (a) Kasano ti panangdeskribir ti Biblia iti urnos ti Pagarian? (b) Anianto ti aramiden ti turayna maipaay iti sangatauan?
19 Insaad dagiti Saksi ni Jehova ti pammatida iti Pagarian ti Dios. Isu dayta ti “baro a langlangit” nga insurat ni apostol Pedro: “Adda baro a langlangit ken maysa a baro a daga nga ur-urayentayo sigun iti karina, ket kadagitoy nga agtaeng ti kinalinteg.” (2 Pedro 3:13) Ti “baro a daga” isu ti baro a natauan a kagimongan nga iturayanto ti baro a langlangit, ti Pagarian ti Dios. Daytoy ti urnos nga impalgak ti Dios iti maysa a sirmata ken ni apostol Juan, a nangisurat: “Nakitak ti maysa a baro a langit ken maysa a baro a daga; ta ti immuna a langit ken ti immuna a daga naglabasdan . . . Ket [ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:1, 4.
20 Imutektekanyo ta ti baro a daga nalintegto. Naikkatton ti Dios amin a dakes nga elemento, iti gubat ti Armagedon. (Apocalipsis 16:14, 16) Kastoy ti kuna ti padto iti Proverbio 2:21, 22: “Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga.” Ket ikari ti Salmo 37:9: “Dagiti agaramid iti dakes magessatdanto; ngem dagidiay nga agpannuray ken Jehova, tawidendanto ti daga.” Saan kadi a kayatyo ti agbiag iti kasta a baro a lubong?
Agtalek Kadagiti Kari ni Jehova
21. Apay a makapagtalektayo kadagiti kari ni Jehova?
21 Makapagtalekkayo kadi kadagiti kari ni Jehova? Imdenganyo ti kinunana baeten ken Isaias a mammadtona: “Laglagipenyo dagiti immuna a bambanag idi ugma: ta siak ti Dios, ket awanen ti sabali; Diosak, ket awan ti pumada kaniak; nga ipalawagko ti panungpalan manipud iti pangrugian, ken manipud idi unana a panawen ipalawagko dagiti bambanag a saan pay a maaramid; a kunaek ‘Ti patigmaanko mataginayonto, ken aramidekto amin a pagayatak.’” Kuna ti maudi a paset ti Isa 46 bersikulo 11: “Insaok, aramidekto met ti pannakatungpalna; pinanggepko, isu met ti aramidekto.” (Isaias 46:9-11) Wen, makapagtalektayo ken Jehova ken kadagiti karina a kas man la natungpalen dagita a kari. Kastoy ti kuna ti Biblia: “Ti pammati isu ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.”—Hebreo 11:1.
22. Apay a makapagtalektayo a tungpalen ni Jehova dagiti karina?
22 Dagiti napakumbaba a tattao iparparangarangda ti kasta a pammati agsipud ta ammoda a tungpalento ti Dios dagiti karina. Kas pagarigan, iti Salmo 37:29, mabasatayo: “Ti sililinteg tawidennanto ti daga, ket agtaengto kenkuana nga agnanayon.” Mabalintay kadi a patien daytoy? Wen, ta kuna ti Hebreo 6:18: ‘Di makapagulbod ti Dios.’ Kukua kadi ti Dios ti daga, tapno iti kasta maitedna dayta kadagiti napakumbaba? Kuna ti Apocalipsis 4:11: “Pinarsuam dagiti isuamin a bambanag, ket gapu iti pagayatam napaaddada ken naparsuada.” Gapuna, kuna ti Salmo 24:1: “Ti daga kukua ni Jehova ken amin nga adda kenkuana.” Pinarsua ni Jehova ti daga, kukuana dayta, ket itedna kadagidiay agtalek kenkuana. Tapno tumibker ti panagtalektayo iti daytoy, ipakita ti sumaganad nga artikulo no kasano a tinungpal ni Jehova dagiti karina kadagiti tattaona idi un-unana ken kasta met iti kaaldawantayo ken no apay a makapagtalektayo a naan-anay a kasta ti aramidenna iti masanguanan.
Dagiti Punto a Marepaso
◻ Ania ti napasamak iti ninamnama dagiti tattao iti intero a historia?
◻ Apay a ditay agpannuray kadagiti tattao maipaay iti nasaysayaat a masanguanan?
◻ Ania ti pagayatan ti Dios maipanggep iti masanguanan?
◻ Apay a makapagtalektayo a tungpalen ti Dios dagiti karina?
[Ladawan iti panid 10]
Siuumiso a kuna ti Biblia: “Saan nga agtaud iti tao . . . ti panangiturong kadagiti addangna.”—Jeremias 10:23
[Credit Line]
Bomba: Retrato a kukua ti U.S. National Archives; mabisbisin nga ubbing: WHO/OXFAM; dagiti nagbakuit: UN PHOTO 186763/J. Isaac; Mussolini ken Hitler: retrato a kukua ti U.S. National Archives