Maysa a Pasdek a Nalukatan iti Publiko a Nangpikapik iti Adu a Puso
BABAEN TI MANNURAT TI AGRIINGKAYO! IDIAY ALEMANIA
“NAKAPIMPINTAS! Talaga a makaay-ayo!” “Pagyamanan iti kinamanagpadagusyo ken kadagiti nagpipintas nga eksibit. Talaga a nagin-awaankami.” Ania ti nangtignay iti nagadu a sangaili tapno agyamanda iti kastoy? Ti pasdek a nalukatan iti publiko iti ngudo ti lawas. Dayta a pasdek isu ti sanga nga opisina dagiti Saksi ni Jehova idiay Alemania. Iti tallo nga aldaw, nanipud Biernes, Mayo 24, agingga iti Domingo, Mayo 26, 2002, naawis dagiti sangaili iti pasilidad idiay Selters-Taunus tapno makikaduada iti nasurok a 1,000 nga agserserbi kas boluntario iti sanga a mangselebrar iti maikasangagasut a tawen ti pannakaipasdek ti sanga nga opisina ti Alemania.
Adu a kongregasion dagiti Saksi ni Jehova iti kaparanget ti sanga nga opisina ti sigagagar a nakipaset iti espesial a kampania ti panangawis. Dua a lawas sakbay daytoy naisangsangayan nga okasion, nasurok a 100,000 nga imbitasion ti naiwaras kadagiti tattao wenno naibati iti balbalayda. Napasarunsonan daytoy a kampania babaen iti adu a pakaammo ken atiddog nga artikulo kadagiti periodiko ken brodkas iti radio. Adda met dagiti personal nga imbitasion a naited kadagiti opisial ken negosiante a mangsupsuplay iti bambanag a kasapulan ti sanga. Ti awis ket pinatgan ti nasurok a 7,000—a kaaduan kadagitoy ket saan a Saksi.
Nagpasiar dagiti sangaili iti pagimprentaan, pagdaitan iti libro, departamento a mangtamtaming iti pannakaitulod ti literatura, talyer, ken paglabaan, agraman ti sumagmamano a paset ti pasdek ti administrasion. Dagiti eksibit ti nangipakaammo kadagiti tattao maipapan iti natibker a takder dagiti Saksi ni Jehova iti Alemania kadagiti prinsipio ti Biblia iti sidong ti rehimen dagiti Nazi ken Komunista. Ket nayunay-unay ti pannakausar ti Jehova a nagan ti Dios iti nasurok a 700 a banag nga adda iti maysa nga eksibit maipapan iti Biblia. Saan a madakamat ti amin nga ebkas ti panagyaman a nangngegan, ngem adtoy nga ilanadmi ti sumagmamano kadagita a komento.
“Nainggayyeman unay ti amin nga adda ditoy. Nakadaldalus ken nakaur-urnos dagiti bambanag. Maibagay ti amin—dagiti tattao nga agnanaed ditoy ken ti aglawlaw. Sapay koma ta matuladmi ti kinainggayyemanyo kadakami.”—Lakay ken baketen nga agassawa.
“Pagyamanan iti naimas a taraon ken iti nainggayyeman a panangasikasoyo a naimbag kadakami. Nagustuanmi unay dayta, ket kayatmi ti umayto manen. Talaga a nakaim-imbag dagiti tattao ditoy!”—Insurat ti maysa a grupo a naggapu iti kolehio a pagadalan iti teknolohia ti sarming iti libro a nagpirmaan dagiti sangaili.
“Pagyamanan unay iti nabara a panangpasangbayyo kadakami kadagiti pasilidadyo. Makapainteres unay ti panagpasiarmi. Dayawenmi dagiti mangimatmaton iti paglabaan ken dry cleaning, ta ita pay laeng a nakapasiarkami iti kasta a nakaur-urnos ken nakadaldalimanek a pasilidad.”—E-mail manipud iti pannakabagi ti kompania nga agar-aramid iti sabon ken alikamen iti panaglaba.
Kastoy ti impadamag ni Eva a maysa kadagiti nangipasiar: “Iti tunggal panangipasiarko, kanayon nga adda nangibaga maipapan kadagiti pagnanaedan a siled: ‘Nakasaganakamin a mangala kadagiti maletami. Kayatmi ti umakar ditoy!’”
Bayat a kitkitaen a naimbag ti maysa a babai a naka-electric wheelchair ti maysa a drowing dagiti pasilidad, adda boluntario a nangdamag no adda maitulongna kenkuana. “Awan met ketdi!” kinuna ti babai. Imbagana a lima nga orasen nga adda iti pasdek ket kinapudnona, saanen a makatugaw a naimbag. Gagangay a naidalit ket talaga a nakaron ti ut-ot a marikriknana. Nupay kasta, inlawlawagna: “Mabalinko ti agidda idiay balay, ngem maminsan la a malukatan daytoy a pasdek iti publiko!” Kinunana pay: “Makapainteres unay ti amin isu a kayatko a siertuen a mapasiarko ti amin!”
Napagsaludsodan ti ubing a ni Georg, nga agarup lima ti tawenna, no ania ti nagustuanna unay. Gapu ta naayatan kadagiti pagimprentaan, kinunana: “Dagiti narolio a papel! Ikabilda dagitoy iti maysa a pungto, sa rummuar iti sabali a pungto kas periodiko. Nakaskasdaaw!”
Nasdaaw ti maysa a Saksi. Ni lakayna a saan a Saksi ken namnaminsan pay laeng a timmabuno iti Nakristianuan a gimong ket immanamong a kumuyog iti aldaw ti Sabado nga agpasiar iti pasdek a nalukatan iti publiko. Iti Domingo, idi simmangpet ni baketna a naggapu iti gimong, nakarubbuat ken nakasaganan a rummuar. “Ania ti ar-aramidem?” dinamag ni baketna. “Bueno, kurang ti orasko a nagpasiar idi kalman,” kinunana. “Isu nga inton nakarubbuatkan, mapanta idiay Selters. Kayatko a pasiaren a naimbag.”
Iti eksibit maipapan iti Biblia, maysa a nakadisente a baket ti mababain a nangdamag no mabalinna nga usaren ti telepono ta adda kayatna nga awagan a dagus. Ni lakayna gayam ket maysa a dumadait iti libro, a paglainganna ti agretubar kadagiti daan a libro. Isuda nga agassawa ket kanayon a makitaripnong kadagiti naayat nga agbasa, a maysa kadagitoy ket pastor dagiti Protestante ken naessem nga agkolekta iti Biblia. Isu ti kayatna nga awagan a dagus. Gapu ta awan idiay balayda, nangibati iti mensahe iti answering machine: “Siguraduem a makaumayka ditoy ita nga aldaw no mabalin. Masiertok nga awan pay a pulos ti nakitam a kas iti daytoy. Saanka koma nga agpaikapis!”
Adda agassawa a nagpasiar a kadua ti anakda. Naggapuda iti kabangibang nga ili ti Limburg. Awan pay a pulos ti nadamagda maipapan kadagiti Saksi ni Jehova agingga a naawatda ti imbitasion iti pagtaenganda. Inkeddeng ti agassawa nga umayda pasiaren dagitoy dadakkel a pasilidad iti Selters. Sinabat ida da Marlon ken Leila a boluntario iti sanga nga opisina ti Alemania. Inlawlawagda ti ad-adu pay maipapan kadagiti Saksi ni Jehova ken ti biag iti sanga nga opisina. Nasdaaw unay ti pamilia isu a kiniddaw ti agassawa nga adda sumarungkar kadakuada tapno regular nga iyadalanna ida iti Biblia.
“Talaga a nagsayaat ken nakaay-ayat ti umay ditoy. Ti laeng pagimprentaan ti nakitak, ngem nagpintas. Talaga a nagimbag ken nainggayyemankayo, ket dayta ti nagustuak.”—Stefanie (12 ti tawenna), naisurat iti libro a nagpirmaan dagiti sangaili.
Kinuna ti maysa a babai manipud iti kabangibang nga ili: “Adda kayatko nga ibaga kadakayo. Maysaak a Muslim, ngem kanayon idi a kayatko a makita ti kasasaad ditoy. Nakasingsingpet ken nainggayyemankayo amin. Iparpariknayo kadakami [a ganggannaet] a mapasangbaykami ditoy Alemania. Ipakpakitayo a maseknankayo kadagiti tattao. Nakaskasdaaw dayta! Inton bigat, umayakto manen a kaduak ni lakayko.” Iti libro a nagpirmaan dagiti sangaili, insuratna: “Nagpintas! Panagriknak ket addaak iti Paraiso.”
Nangngeg ti drayber ti maysa kadagiti nagluganan dagiti nagpasiar manipud paradaan agingga kadagiti ruangan ti kinuna ti maysa a pasahero iti padana a pasahero: “Mannakigayyemda unay! Agasem ta awan man la idi ti pamalatpatak iti mapatpataud ditoy. Ita laeng a naammuak ti ar-aramiden dagiti tattao ditoy. Kitaem ti nagsayaat a kababalinda. Nagdakkel la ketdi ti naaramidan ti narelihiosuan a pannakapadakkel ken pannakaisuroda.”
Dua nga oras sakbay a nagserra, adda lalaki a nagsublisubli a nagna iti makinsango nga arubayan ti pasdek ti administrasion. Nauneg unay ti pampanunotenna sa agwingwingiwing ken agkarataliaw iti pasdek. Kalpasanna, inasitganna ti maysa a boluntario iti sanga sana kinuna: “Nabatad a maar-aramid ti amin gapu iti ayat. Saanak a maysa kadagiti Saksi ni Jehova, ngem sapay koma ta bendisionannakayo ni Jehova.”
Ket insurat ti maysa a Saksi: “Babaen daytoy nga ababa a surat, kayatko nga iyebkas kadakayo ti naimpusuan a panagyamanko. Nagreggetkayo iti kasta unay tapno agbalin a makaay-ayo dagiti aldaw a nalukatan daytoy a pasdek iti publiko. . . . Amin dagitoy ti mangiparipirip iti tiempo inton agbiagen a sangsangkamaysa ti intero a sangatauan! . . . Sigurado a nangted iti pakaidayawan ti Diostayo a ni Jehova dagiti aldaw a pannakailukat daytoy a pasdek iti publiko.”—Sandra.
[Ladawan iti panid 23]
Lugan a nangipasiar kadagiti lallakay, babbaket, addaan iti pisikal a depekto, wenno nabannog
[Ladawan iti panid 23]
Pabuya maipapan kadagiti pamay-an ti panangasaba idi un-unana
[Ladawan iti panid 23]
Sumangbaykayo iti pagtaenganmi a nalukatan iti publiko
[Ladawan iti panid 24]
Maysa a boluntario a mangilawlawag iti teknolohia kadagiti simple a sasao
[Ladawan iti panid 24]
Eksibit maipapan iti Biblia