No Kasano a Makatulong ti Biblia Kadagiti Addaan iti Diabetes
NAKAPATPATEG ti panagteppel ken positibo a panangmatmat iti kinasalun-at ken nasayaat a kasasaad dagiti agdiabetes. Ngem tapno masukay dagita a kualidad, kasapulan dagiti agdiabetes ti naynay a panangandingay. No kasta, rumbeng a di sulisogen dagiti miembro ti pamilia ken gagayyem ti maysa nga agdiabetes a mangan iti di makapasalun-at, nalabit babaen ti panangikunada iti, ‘Saan a dakes no maminsan laeng.’ “Nagsayaat ti panangandingay ni baketko,” kuna ni Harry, nga addaan iti sakit ti puso ken Type 2 a diabetes. “Saan nga agidasar iti diak makan. Ngem di maawatan ti dadduma, isu a dida ammo a pasaray nagrigat dayta.”
No kanayon a makilangenka iti agdiabetes, laglagipem ti sumaganad a dua a nagsayaat a prinsipio iti Biblia: “Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao,” ken “Ti ayat . . . saanna a sapulen dagiti bukodna a pagimbagan.”—1 Corinto 10:24; 13:4, 5.
Amin a maseknan iti kinasalun-atda—addaanda man iti diabetes wenno awan—rumbeng a mangan ken uminumda laeng iti kalkalainganna. Makatulong ti Biblia iti daytoy a banag, ta ipatuldona a nasken nga agteppel ti tunggal maysa kadatayo. Inkeddengmo kadin a sukayem daytoy a kualidad iti biagmo? (Galacia 5:22, 23) Mabalin a magun-odan dagiti kanayonan a tulong kadagiti pagwadan iti Biblia, kas ken Kristiano nga apostol Pablo. “Adda permanente idi a siit iti lasagna,” kuna ti maysa nga agdiabetes, “ngem simamatalek ken naan-anay latta a nagserbi iti Dios. Maaramidak met dayta!”
Wen, inakseptar ni Pablo ti dinan mabalbaliwan isu a nagballigi kas maysa a misionero. (2 Corinto 12:7-9) Nayanak a bulsek ti 18 ti tawenna a ni Dustin ken agdiabetes nanipud pay idi 12 ti tawenna. Insuratna: “Ammok nga awan ti tao iti daytoy a lubong a perpekton ti panagbiagna. Segseggaak ti baro a lubong ti Dios inton saanakon nga agdiabetes. Para kaniak, temporario laeng dayta. Mabalin a napapaut ngem iti panateng ken trangkaso, ngem awanen inton agangay.”
Idi imbaga ni Dustin dayta, pampanunotenna ti namnama a naibasar iti Biblia a perpekto a kinasalun-at iti paraiso a daga nga iturayan ti Pagarian ti Dios. (Apocalipsis 21:3, 4) Ikari ti Sao ti Dios nga iti sidong ti nadiosan a panangituray, “awanton ti agtaeng nga agkuna: ‘Masakitak.’” (Isaias 33:24; Mateo 6:9, 10) Kayatmo kadi a maammuan ti ad-adu pay maipapan iti daytoy namnama a naibasar iti Biblia? Makiumanka kadagiti Saksi ni Jehova iti lugarmo, wenno agsuratka kadagiti nangipablaak iti daytoy a magasin iti maitutop nga address a nailista iti panid 5.
[Ladawan iti panid 12]
Napateg ti panagteppel ken positibo a panangmatmat