Dagiti Pagdaksan ti Kinalibnos Gapu iti Uso

AWAN duadua a ti panangtulad iti uso papintasennaka ken pabilgenna ti panagtalekmo iti bagim. Mabalin a lingdan ti maitutop a kawes ti dadduma a nalaad a paset ti bagim ken papintasenna pay dagiti makaay-ayo a pasetna. Apektaranna met ti panangmatmat ti sabsabali kenka.

Ngem kanayon koma a laglagipentayo nga adda pagdaksan ti kanayon a panangtulad iti uso. Mabalin a mapilit dagiti aggatang a kanayon a mangsukát kadagiti kawesda. Ngamin, kanayon nga agpataud ti industria kadagiti baro nga estilo. Saan laeng a naiparna daytoy, ta ad-adu ti maganansia dagiti agpapauso no dagus nga agpasó dagiti uso. Kas kinuna ti diseniador a ni Gabrielle Chanel, “nairanta a maawan ti uso.” No kasta, mabalin a mapilit ti di nasirib nga aggatang a gumatang kadagiti baro a kawes tapno saan laeng a maudi iti uso.

Adda met ti peggad a mabalin a maallukoy iti nasikap a panangpilit ti panaganunsio. Minilion a doliar ti busbusbosen dagiti kompania nga agpapauso tapno iyanunsio dagiti produktoda. Masansan nga ipabuyada ti awan pakadanaganna nga estilo ti panagbiag a sagsagrapen dagidiay agusar kadagiti produktoda. Mabalin a dakkel ti epekto dagitoy a mensahe. “Awanen ti dakdakes pay para kadagiti tin-edyer ngem ti dida panagsapatos iti addaan iti nalatak nga etiketa,” kuna ti maysa a maestro idiay Espania.

Ti Pangallukoy ti Uso

Ti dadduma a grupo ket agusar iti maysa nga estilo ti kawes a pamigbigan kadakuada. Mabalin nga ipamatmat ti panagkawkawesda ti panangilaksidda iti kagimongan, ti nawaya nga estilo ti panagbiag, wenno uray pay ti kinaranggas wenno panangidumduma iti puli. Nupay mabalin a di nanakman wenno karkarna ti dadduma kadagitoy nga estilo, gagangay a dayta ti pangkaaduan a kawes ti intero a grupo. Uray ti dadduma a di umanamong kadagiti prinsipio ti grupo ket mabalin a magustuanda ti estilo. Dagidiay mangtulad kadagitoy a moda mabalin a maipagarup a sumursurot ken itantandudoda dagiti kangrunaan a prinsipio ti grupo.

Agbaliwbaliw ti uso, ket dadduma ti agpaut iti sumagmamano la a bulan. Mabalin a dagita ti ipauso dagiti nalatak a musiko wenno dadduma nga agpapauso. Ngem sumagmamano a moda ti agbalinton a napaut nga uso. Kas pagarigan, naguso ti maong a pantalon kadagiti managprotesta nga agtutubo idi dekada 1950 ken 1960. Ngem itatta, dagitoy ti isuoten ti nadumaduma a grupo ken edad iti nadumaduma nga okasion.

Panagtarigagay a Maaddaan iti Kapintasan a Pammagi

Dagidiay kanayon a tumultulad iti uso mabalin a maseknanda unay iti langada. Kadawyan a natayag ken narapis dagiti modelo iti uso, ket kanayon a mabuyatayo dagiti ladawanda.a Mausar ti “napintas” a pammagi tapno mailako wenno mayanunsio ti aniaman a produkto manipud kadagiti kotse agingga kadagiti kendi. Pattapattaen ti Social Issues Research Centre iti Britania nga “ad-adu ti makitkita itan dagiti agtutubo a babbai a ladawan ti agkakapintas a babbai iti maysa nga aldaw ngem ti nakita dagiti innatayo iti intero a kinatin-edyerda.”

Mabalin a dakes ti epekto daytoy nakaad-adu a ladawan a mabuya. Kas pagarigan, idiay Estados Unidos, natakuatan ti surbey a naadaw iti Newsweek a di magustuan ti 90 a porsiento kadagiti puraw a tin-edyer ti pammagida. Ikagumaan ti dadduma kadagitoy a maaddaanda iti ‘kapintasan a pammagi.’ Ngem kuna ti Social Issues Research Centre nga awan pay 5 a porsiento kadagiti babbai ti naaddaan iti timbang ken katayag a kas iti ipabpabuya ti media. Nupay kasta, ti napalaus a tarigagayda nga agbalin a narapis ti makagapu a nalabes nga agdieta ti minilion nga agtutubo a babbai. Dayta ti makagapu a dadduma kadakuada ti naisagmaken iti anorexia nervosa.b Inamin ni Nieves Álvarez, Kastila a modelo a nagsagaba idi iti anorexia: “Ad-adda a mabutengak a lumukmeg ngem ti matay.”

Pudno a mabalin nga adu ti pakaigapuan dagiti sakit a nainaig iti pannangan a kas iti anorexia ken bulimia. Nupay kasta, kuna dagiti doktor a da Anne Guillemot ken Michel Laxenaire: “Ti aglablabes a panagtarigagay iti kinarapis ti maysa kadagiti makagapu.”

Nabatad nga adda pagimbagan ken pagdaksan ti uso. Penkenna ti tarigagay ti tao nga agparang a makaay-ayo ken maaddaan iti baro a kawes. Ngem no kanayon a tuladentayo ti uso, mabalin a dayta ti pakaigapuan ti dakes a panangipapan ti dadduma kadatayo. Ken no ipangpangrunatayo ti langatayo, mabalin a mamatitayo iti biddut a panangipapan nga agpannuray ti pategtayo iti langatayo imbes nga iti makin-uneg a kinataotayo. “Masapul nga ad-adda nga ipategtayo ti abilidad ti maysa a tao ken ti makin-uneg a kinataona, imbes a ti langana,” kuna ni Álvarez a nadakamat itay. Ngem saan a kaskarina a mapasamak ti kasta a panagbalbaliw dagiti annuroten. Kasano ngarud a maaddaantayo iti natimbeng a panangmatmat iti uso?

[Footnotes]

[Kahon/Dagiti Ladawan iti panid 8, 9]

Addanto Ngata Asinoman nga Agkawes iti Dayta?

Kada primavera ken otonio, agipabuya dagiti agpapauso idiay New York, Paris, ken Milan kadagiti uso a kawes a dinisenio dagiti kalatakan a diseniador. Malaksid iti kinangina dagitoy, adu ti di praktikal ken saan pay ketdi a nasayaat a pagkawes. “Ti nalabor, karkarna a disenio a makitayo ket talaga a saan a naaramid para iti publiko,” kuna ti Espaniol a diseniador a ni Juan Duyos. “Mabalin a naipabuya ti uso tapno maidayaw ti diseniador wenno mabigbig ti etiketa imbes a mailako dagiti kawes a naipakita. Kas pagarigan, ti adu a napipintas a baro a disenio ti kawes nga agpaay iti partikular a pasken, a manggutugot iti adu a komento ti media, mabalin a paaduenna ti malako iti nalatak nga etiketa ti bangbanglo.”

[Ladawan iti panid 7]

Nagastos ti kanayon a panangtulad iti uso

[Ladawan iti panid 7]

Ti panangtuladmo iti moda a kawes ket mabalin a mangipabigbig a miembroka ti maysa a grupo

[Ladawan iti panid 7]

Dadduma ti naisagmak iti anorexia