‘Idi Pay La Koma nga Inaramidko Dayta’

Naawaganen dayta iti pannakaadikto ket nainkalintegan dayta. Sigun iti maysa a surbey idiay Estados Unidos, dagiti babbarito iti maikawalo a grado (nga agtawen iti agarup 13) agay-ayamda kadagiti video game iti promedio a 23 nga oras iti kada lawas. Adu met a nataengan ti naadikto. Usigenyo ti Kristiano nga agnagan iti Charles.a Kastoy ti kinunana: “Para kaniak, dagiti video game ti pamay-an tapno maliklikak dagiti rebbengek, makapaglinglingayak ken mailiwliwagko dagiti problemak. Ngem naadiktoak iti video game a kas iti pannakaadikto dagiti tattao iti droga wenno iti arak.”

Imbaga ni Charles nga agay-ay-ayamen a “kanayon” sipud pay idi agtawen iti agarup 11. “Diak agay-ay-ayam kadagiti dinedemonio wenno naranggas a video game,” kinunana, “ngem napaut ti panagay-ayamko. Adda idi lawlawas nga uray addaak idiay eskuelaan, paggigimongan wenno pangasabaan, sangkapanunotko no kasanoak a mangabak iti video game.”

Ti serye iti akkub ti Disiembre 22, 2002, nga Agriingkayo! a “Dagiti Elektroniko nga Ay-ayam​—Adda Aya Pagdaksanda?” dakkel ti naitulongna ken Charles. “Kalpasan a binasak dayta, pinadasko a limitaran ti kapaut ti panagay-ayamko,” kinunana. “Ngem kalpasan ti sumagmamano a tiempo, nagay-ayamak manen a kas iti dati.”

Idi agar-arem ken kalpasan ti panagasawana, nabaelan ni Charles a limitaran ti panagay-ayamna. Kastoy ti kinunana: “Ngem pagammuan ta adda baro nga ay-ayam a rimmuar a nabayagen a sinegseggaak. Immutangak iti igatangko iti computer nga adda programana iti kasta nga ay-ayam. Daytoy pay laeng ti video game a nangibus iti adu unay a tiempok. Awanen ti tiempok para ken Jehova. Nabaybay-ak payen ni baketko.” Di nagbayag, naamiris ni Charles a rumbeng nga agbalbaliwen. Kinunana: “Inkeddengko a dadaelen ti amin a video game-ko. Inikkatko amin dagitoy iti computer-ko sa imbellengko iti basuraan ti siudad.”

Nagbabawyan ngata ni Charles ti desisionna? Saan a pulos! Kinunana: “Di mailadawan ti pannakabang-arko kalpasan nga inaramidko dayta. Kasla naikkat ti nakadagdagsen a bakbaklayek. Nasingsingedakon ken Jehova, ken regular metten nga agkararagak kenkuana. Ad-adu metten ti tiempok ken baketko. Agyamanak unay ta naisardengko ti pannakaadiktok. Ti laeng pagbabawyak ket idi pay la koma nga inaramidko dayta.”

[Footnote]