Ti Panangmatmat ti Biblia

Praktikal Aya ti Agbalin a Mannakikappia?

ITI nalatak a sermonna, kastoy ti imbaga ni Jesu-Kristo: “Naragsak dagiti mannakikappia.” Kinunana pay: “Naragsak dagiti naalumamay ti kababalinda, yantangay tawidendanto ti daga.” (Mateo 5:5, 9) Ti panagbalin a mannakikappia saanna laeng a kaipapanan ti pannakarikna iti talna ken kinatalged. Ti mannakikappia isu ti umun-una a mangipakita iti naimbag a nakem ken itantandudona ti talna.

Praktikal aya iti kaaldawantayo dagiti dinakamat ni Jesus iti ngato? Para iti dadduma, pagarupenda a tapno agballigika iti daytoy moderno a lubong, masapul a naturay, agresibo, ken naranggaska pay ketdi. Ad-adda aya a nainsiriban ti bumales, a balsem iti dakes ti dakes nga inaramidda kenka? Wenno praktikal ti agbalin a mannakikappia? Usigentayo ti tallo a makagapu no apay a rumbeng a panunotentayo ti imbaga ni Jesus a: “Naragsak dagiti mannakikappia.”

◼ KINATALINAAY TI PUSO “Ti natalinaay a puso isu ti biag ti nainlasagan a bagi,” kuna ti Proverbio 14:30. Sigun iti adu a report ti medisina, ti pungtot ken gura ket mabalin a pakaigapuan ti pannakaistrok ken pannakaatake ti puso. Itay nabiit pay, idi nagkomento ti maysa a medikal a pagiwarnak maipapan kadagiti tattao nga addaan iti sakit ti puso, ti nakaro a panagpungtot ket inyaspingna iti sabidong. Kinuna pay ti pagiwarnak a “talaga a pagsakitennaka ti panagpungtot.” Ngem dagidiay mangikagkagumaan nga agbalin a natalna, mapatanorda ti “natalinaay a puso” ket adu ti masagrapda a pagimbagan.

Ni Jim, nga agtawen iti 61, ti maysa a pagarigan. Maysa itan a mannursuro iti Biblia iti maysa a komunidad dagiti Vietnamese. Kastoy ti inlawlawagna: “Kalpasan ti innem a tawen a panagsoldadok ken tallo a tawen a pannakirangetko idiay Vietnam, ammokon ti kaipapanan ti kinaranggas, pungtot, ken pannakaupay. Nakonsiensiaak gapu kadagiti napalabas a kapadasak, isu a diak unay idi makaturturog. Di nagbayag, mariribukanakon ken agsakit payen ti tianko ken maam-amakak.” Ania ti nangbang-ar kenkuana? Kastoy ti insungbatna: “Ti pannakiadal iti Biblia kadagiti Saksi ni Jehova ti nangsalbar iti biagko. Idi naammuak a panggep ti Dios a paaddaen ti natalna a baro a lubong ken no kasano nga isuotko ‘ti baro a personalidad,’ naaddaanak iti natalinaay a puso. Nagbanaganna, ad-adda a simmalun-atak.” (Efeso 4:22-24; Isaias 65:17; Mikias 4:1-4) Adun ti nakasursuro manipud iti mismo a kapadasanda a ti panangpatanor iti mannakikappia a kababalin ti mangpasalun-at kadakuada iti emosional, pisikal, ken naespirituan.—Proverbio 15:13.

◼ NARAGRAGSAK A RELASION Sumayaat ti relasiontayo iti sabsabali no ipakitatayo ti mannakikappia a kababalin. Dinakamat ti Biblia a ti “unget ken pungtot ken panagririaw ken nabassawang a panagsasao” rumbeng a “maikkat . . . , agraman ti isuamin a kinadakes.” (Efeso 4:31) Dagidiay mangipakpakita iti agresibo a kababalin masansan a mapaadayoda ti sabsabali isu a maamirisda nga agmaymaysadanton nga awanan kadagiti mapangnamnamaan a gagayyem. Kinuna ti Proverbio 15:18: “Ti managpungtot a tao gutugotenna ti rinnupir, ngem daydiay nabannayat nga agunget pagulimekenna ti panagririri.”

Ni Andy nga agtawen iti 42 ken Kristiano a panglakayen idiay New York City, ket dimmakkel idi iti nauyong nga aglawlaw. Kastoy ti inlawlawagna: “Walo pay la ti tawenko idi sinanaydakon a makiboksing. Diak imbilang a tattao dagiti kabusorko. Imbes ketdi, pinanunotko a no saanak a dumanog, siak ti danogenda. Idi agangay, siakon ti ulo-ulo ti maysa a barkada. Namin-adu a nakilaban ken nakirangetkami kadagiti kalsada. Napadasakon ti natutokan iti paltog ken kutsilio. Adu kadagiti pannakigayyemko ket napeggad ken nakabutbuteng.”

Ania ti nangtignay ken Andy a mangbirok iti talna? Kinunana: “Maysa nga aldaw, timmabunoak iti Nakristianuan a gimong iti Kingdom Hall dagiti Saksi ni Jehova, ket dagus a nariknak ti kinamanagayat ti tattao sadiay. Sipud idin, ti pannakilangenko kadagitoy managayat iti talna ti nakatulong kaniak a mangpatanor iti natalinaay a puso, ket idi agangay, dayta ti nakatulong tapno maikkatko ti daan a panagpampanunotko. Naaddaanak iti adu a manayon a pannakipagayam.”

◼ NAMNAMA ITI MASANGUANAN Daytoy laeng ti kapatgan a rason nga agbalintayo a mannakikappia: Dayta ti mangipakita nga ikabkabilangan ken raraementayo ti pagayatan ti Namarsua kadatayo. Kastoy ti idagadag a mismo ti Sao ti Dios a ti Biblia: “Ikagumaam a saraken ti talna, ket surotem dayta.” (Salmo 34:14) No bigbigentayo ti kaadda ni Jehova sa ammuen ken agtulnog iti makaipaay biag a pannursurona, maaddaantayo iti gundaway a makigayyem a mismo kenkuana. Babaen iti dayta a nabileg a relasion, magun-odantayo “ti talna ti Dios.” Awan kaasping daytoy a talna aniaman dagiti parikut a mabalin a dumteng iti biagtayo.—Filipos 4:6, 7.

Kanayonanna, no mannakikappiatayo, ipakpakitatayo ken Jehova no ania a kita ti kinatao ti kayattayo a pagbalinan. Mabalintay nga ipaneknek itan iti Dios a maikaritayo iti inkarina a natalna a baro a lubong. Inton ikkatenna dagiti nadangkes ken palubosanna a dagiti naemma “tagikuaendanto ti daga,” kas iti imbaga ni Jesus, mabalin a maysatayto kadakuada. Anian a bendision!—Salmo 37:10, 11; Proverbio 2:20-22.

Wen, nalawag a praktikal ti kinapateg ti imbaga ni Jesus a “naragsak dagiti mannakikappia.” Maaddaantayo iti natalinaay a puso, nasayaat a relasion, ken natalged a namnama iti masanguanan. Magun-odantayo dagitoy a bendision no ikagumaantayo ti ‘makikappia iti amin a tattao.’—Roma 12:18.

[Dagiti Ladawan iti panid 28]

“Ad-adda a simmalun-atak.”—Jim

[Dagiti Ladawan iti panid 29]

“Naaddaanak iti adu a manayon a pannakigayyem.”—Andy