Natured Ngem Mannakikappia
1 Adu dagiti makaskasabaantayo a mangyebkas kadagiti patpatienda a naiduma iti kinapudno iti Biblia. Nupay nasken a mangasabatayo a situtured, kayattayo met ti agbalin a ‘mannakikappia iti amin a tattao’ ken liklikantayo nga adda masairtayo. (Roma 12:18; Ara. 4:29) Kasanotayo nga agbalin a natured ngem mannakikappia bayat nga idatagtayo ti mensahe ti Pagarian?
2 Sumapulkayo iti Banag a Pagtunosanyo: Ti mannakikappia a tao liklikanna ti makisupiat. No balusingsingentayo ti natibker a pammati ti bumalay mabalin a saanna nga ipangag ti mensahetayo. No di umiso ti naibagana, mabalintayo nga iruangan a sitataktika ti maysa a punto a pagtunosantayo. Babaen ti panangipaganetget kadagiti banag a pagtunosantayo, maikkat ti negatibo a rikrikna ti bumalay ket matukay ti pusona.
3 No palabsentayo ti di umiso a panangmatmat ti bumalay, kayatna kadi a sawen nga ikomkompromiso wenno pakpakapuyentayo ti kinapudno? Saan. Ti annongentayo kas Kristiano a ministro ket saan a ti mangbalusingsing iti tunggal di umiso a kapanunotan a maipasango kadatayo, no di ket ti panangikasaba iti naimbag a damag ti Pagarian ti Dios. (Mat. 24:14) Imbes nga agpudottayo no di umiso ti inyebkas ti bumalay, mabalin a matmatantayo dayta kas gundaway tapno matarusantayo ti pampanunoten ti maysa a tao.—Prov. 16:23.
4 Taginayonenyo ti Dignidad ti Bumalay: Adda panawen a masapul a naturedtayo a mangbalusingsing kadagiti di umiso a sursuro. Ngem kas mannakikappia a tattao, saantayo a manglais ken agusar kadagiti makainsulto a sasao no tukoyentayo dagidiay mamati ken mangisursuro iti di umiso. Umikay dagiti tattao gapu iti natangsit a kababalin, ngem ti napakumbaba ken naasi nga iyaasideg lawlawaganna ti panunot dagiti managayat iti kinapudno. No raementayo dagiti bumalay ken dagiti patpatienda mataginayon ti dignidadda, ket nalaklakada nga awaten ti mensahetayo.
5 Inkabilangan ni apostol Pablo dagiti patpatien dagidiay nakasabaanna ket inkagumaanna nga indatag ti naimbag a damag iti pamay-an a makagutugot iti pusoda. (Ara. 17:22-31) Situtulok a nagbalin nga “amin a bambanag iti amin a kita ti tattao,” tapno ‘iti amin a pamay-an maisalakanna ti sumagmamano.’ (1 Cor. 9:22) Maaramidtayo met dayta no agbalintayo a mannakikappia bayat a situtured nga ikasabatayo ti naimbag a damag.