Agimtuod Dagiti Agtutubo . . .

Ania ti Rumbeng nga Aramidek iti Biagko?

“Idi damo, diak madanagan maipapan iti masakbayak. Ngem bayat nga umas-asideg ti panagturposko, naamirisko a mapasarakton dagiti pakaseknan iti inaldaw. Agtrabahoakton, ken adunto metten ti babayadak.”—Alex, 17.

IDI ubingka pay, inar-arapaapmo kadi ti kayatmo a pagbalinan inton dumakkelka? Ania ngay ti makunam itan kadagita nga arapaapmo? Mariribukanka kadi no kasano a masustentuam ti bagim inton nataengankan? No kasta, saanka nga agmaymaysa. “Ti panagdesision maipapan iti propesion ti maysa kadagiti kangrunaan a karit a sarsarangten dagiti agtutubo,” kuna ti libro a Career Coaching Your Kids.

Iti kasumbangirna, nalabit awan pay la ita panunotmo ti agbalinto a propesionmo. Nalabit ti panagragragsak ti ad-adda a pampanunotem. Awan met ketdi ti pagdaksan ti panagragragsak, ta ibagbaga ti Biblia kenka nga ‘agragsakka bayat ti kinaubingmo!’ (Eclesiastes 11:9, Ti Baro a Naimbag a Damag Biblia) Nupay kasta, itan ti maitutop a tiempo tapno panunotem no ania ti aramidem iti biagmo. “Daydiay nasaldet utobenna dagiti addangna,” kuna ti Proverbio 14:15. Kasano a mautobmo dagiti addangmo?

“Ammuem No Sadino ti Pagturongam”

Ipapantayon nga agpalplanoka nga agbiahe iti adayo manipud iti pagtaengam. Nalabit kitaem nga umuna ti mapa tapno mapilim ti kasayaatan a ruta. Umasping iti dayta ti panagplanom iti masakbayam. “Nagadu ti pagpiliam,” kinuna ni Michael, maysa nga agtutubo a lalaki nga agserserbi itan iti maysa kadagiti sanga nga opisina dagiti Saksi ni Jehova. Kasanoka a makapili manipud iti nagadu a pagpilian? “Nairaman iti dayta dagiti kalatmo,” kinuna ni Michael.

Panunotem ti maysa a kalatmo ket iyarigmo dayta kas ti kangrunaan a destinasionmo. Nalabit saanmo a madanon dayta no agpalpallailangka. Iti piguratibo a wagas, nasaysayaat nga amang no mangalaka iti mapa ken iplanom ti papanam. Iti kasta, matungpalmo ti balakad ti Proverbio 4:26: “Palanasem ti turongen ta sakam.” Kastoy ti patarus ti Contemporary English Version kadagita a sasao: “Ammuem no sadino ti pagturongam.”

Kadagiti sumarsaruno a tawen, adunto dagiti napateg nga ikeddengmo maipapan iti panagdayaw, panagtrabaho, panagasawa, pamilia, ken dadduma pay a napateg a banag. Nalaklaka ti agaramid kadagiti nainsiriban a desision no ammuem pay nga umuna no sadino ti pagturongam. Bayat nga ipalplanom ti pagturongan ti biagmo, adda nasken a dimo liplipatan.

“Laglagipem ti Namarsua Kenka”

No kayatmo ti agbalin a pudno a naragsak, masapul nga ipapusom ti imbaga ni masirib nga Ari Solomon: “Laglagipem ti Namarsua kenka ita ta agtutuboka pay.” (Eclesiastes 12:1, Today’s English Version) Ti tarigagaymo a mangay-ayo iti Dios ti mangimpluensia koma iti ikeddengmo a wagas ti panagbiagmo.

Apay a napateg dayta? Kuna ti Biblia iti Apocalipsis 4:11: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” Wen, amin a parsua idiay langit ken ditoy daga rumbeng nga agyamanda iti Namarsua kadakuada. Agyamyamanka met laeng kadi iti nangted kenka iti “biag ken anges ken amin a bambanag”? (Aramid 17:25) Dika kadi matignay a mangsubad ken Jehova a Dios kas panangapresiar iti amin nga inaramidna kenka?

Tapno silalagipda a kanayon iti Namarsua kadakuada, inkeddeng ti adu nga agtutubo kadagiti Saksi ni Jehova ti sumrek iti amin-tiempo a ministerio. Kinapudnona, nadayaw a kalat ti amin-tiempo a ministerio, ken mangyeg iti nagadu a bendision. (Malakias 3:10) Ngem kasapulam ti panagsakbay. Kas pagarigan, iyimtuodmo iti bagim, ‘Ania dagiti abilidadko ken paglaingak a mabalin nga usarek tapno masustentuak ti bagik iti amin-tiempo a ministerio?’

Ni Kelly, nga agtawen itan iti 27, nasapa a rinugianna ti agplano iti biag. Kalatna ti sumrek iti amin-tiempo a ministerio. Idi addan iti maudi a tawen ti kinatin-edyerna, rinugian ni Kelly nga ‘iplano ti aramidenna,’ no maipapan iti panggedan. “Masapul idi nga agpiliak iti panggedan a makatulong kaniak iti ministeriok,” kinunana.

Inadal ni Kelly ti kina-dental assistant babaen iti programa a bokasional iti haiskul. Nangabak pay ketdi iti maysa a salip iti probinsiana. Ngem nupay naragpatna ti balligi, dina nalipatan ti kangrunaan a kalatna. “Kayatko ti sumrek iti amin-tiempo a ministerio,” kinuna ni Kelly. “Maikadua laengen ti amin a banag.” Tagtagiragsaken pay laeng ni Kelly ti amin-tiempo a ministerio. “Patiek a ti desisionko ti kasayaatan pay laeng a naaramidak,” kinunana.

Agpaiwanwanka

No agbibiaheka iti lugar a dimo kabesado, adda kanito a kayatmo ti agdamag—uray no adda intugotmo a mapa. Mabalin met nga aramidem ti kasta no ipalplanom ti masakbayam. Agkiddawka iti balakad ti sabsabali. Kuna ti Proverbio 20:18: “Babaen iti pammatigmaan maipasdek a sititibker dagiti mismo a gakat.” Siempre, ti dadakkelmo ti maysa kadagiti napateg unay a pagpaiwanwanam. Mabalinmo met ti agpabalakad kadagiti nataengan a Kristiano nga agbibiag buyogen ti nadiosan a sirib. “Tuladem dagidiay mapagwadan a nataengan a kakongregasionmo wenno dagiti adda iti kabangibang a lugar,” insingasing ni Roberto. “Adda mairanudda kenka a nalabit dimo pay napanunot.”

Kangrunaan iti amin, kayatnaka a tulongan ni Jehova a Dios a mangaramid kadagiti desision iti biag a mangparagsak unay kenka. Isu a kiddawem a tulongannaka tapno ‘maitultuloymo a mailasin ti pagayatanna’ maipanggep iti masanguanam. (Efeso 5:17) No agtalekka ken Jehova iti amin a pusom, “palintegennanto dagiti danam.”—Proverbio 3:5, 6.

Ti ad-adu pay nga artikulo manipud iti serye nga “Agimtuod Dagiti Agtutubo . . .” ket masarakan iti Web site a www.watchtower.org/ypa

PANUNOTEM

◼ Ania dagiti abilidadmo ken paglaingam?

◼ Adda kadi dagiti mapanunotmo a pamay-an tapno mausarmo dagita nga abilidad nga agpaay a pakaidayawan ni Jehova?

◼ Ania ti magustuam a partikular a wagas ti panagserbi iti amin-tiempo ti nadakamat iti daytoy nga artikulo?

[Kahon iti panid 23]

TUNGED A KALSADA

Kuna ti Biblia: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” Lasonglasong ti dalan nga agturong iti kinabaknang! Kamaudiananna, mabalin a tunged a kalsada dayta nga agturong iti utang, danag, ken naespirituan a pannakadadael.—1 Timoteo 6:9, 10.

[Kahon/Dagiti Ladawan iti panid 24]

PANAGPAYUNIR

Ti agibumbunannag a payunir ket maysa a mapagulidanan a bautisado a Kristiano a nangyurnos a mangbusbos iti kalkalainganna a 70 nga oras iti kada bulan a mangikasaba iti naimbag a damag ti Pagarian ti Dios. Babaen iti panagsanay ken kapadasanda, maparang-ay dagiti payunir ti kinalaingda kas mannursuro iti Biblia.

PANAGSERBI ITI BETHEL

Dagiti miembro iti pamilia ti Bethel ket agserserbi kadagiti sanga nga opisina dagiti Saksi ni Jehova. Sadiay a tumultulongda iti panagisagana, panagaramid, ken panagipatulod kadagiti literatura a naibasar iti Biblia. Maysa a sagrado a pribilehio ti panagserbi iti tunggal annongen idiay Bethel.

PANAGSERBI ITI LUGAR A DAKDAKKEL TI KASAPULAN

Kabaelan ti dadduma a payunir ti umakar iti dadduma a lugar a dakdakkel ti pakasapulan kadagiti agibumbunannag iti Pagarian. Dadduma ti nagadal iti sabali a pagsasao ken agserserbida iti sabali a pagilian wenno iti kongregasion nga agus-usar iti dayta a pagsasao.

PANAGSERBI ITI SABALI A PAGILIAN

Dagiti international servant ket mapan iti dadduma a pagilian tapno tumulongda a mangibangon kadagiti Kingdom Hall ken pasilidad ti sanga nga opisina. Maysa daytoy a kita ti sagrado a serbisio a kaasping ti trabaho dagidiay nangibangon iti templo ni Solomon.—1 Ar-ari 8:13-18.

MINISTERIAL TRAINING SCHOOL

Ti walo a lawas a kurso ti mangsanay kadagiti kualipikado ken awanan asawa a panglakayen ken ministerial nga adipen kadagiti banag a nainaig iti organisasion ken panagpalawag iti publiko. Dadduma kadagiti nagturpos ti natudingan nga agserbi kadagiti nakayanakanda a pagilian; ti sabsabali ket immannugot nga agserbida kadagiti sabali a pagilian.

PANAGMISIONERO

Dagiti kualipikado a payunir a nasalun-at ken nakaradkad ket masanay nga agserbi kadagiti ganggannaet a pagilian. Makaparagsak ken makapnek ti panagbiag dagiti misionero.

[Kahon/​Ladawan iti panid 24]

WHAT WILL I DO WITH MY LIFE?

Daytoy a programa, nga inaramid dagiti Saksi ni Jehova, itampokna dagiti aktual a pannakiuman kadagiti agtutubo a taga-Brazil, Britania, Alemania, ken Estados Unidos. Asidegen a magun-odan dayta iti adu a pagsasao.

[Ladawan iti panid 23]

“Nairaman iti dayta dagiti kalatmo.”—Michael, miembro ti pamilia ti Bethel

[Ladawan iti panid 24]

“Daydi ti kasayaatan nga inkeddengko.”—Kelly, payunir iti innem a tawenen

[Ladawan iti panid 25]

“Tuladem dagidiay mapagwadan.”—Roberto, miembro ti pamilia ti Bethel