Sidadaankayo Kadi a Pausar?

¹ Adda naisalsalumina a pasamak idi tawen 778 K.K.P. Ni propeta Isaias nasirmatana “ni Jehova, a situtugaw iti trono a nangato ken naitan-ok.” Kalpasanna, nangngeg ni Isaias dagiti serapin a mangipukpukkaw iti dayag ni Jehova, a kunkunada: “Santo, santo, santo ni Jehova ti buybuyot.” Ania ketdin a nakaskasdaaw daydi! Iti dayta nga eksena, nangibangon ni Jehova iti makakarit a saludsod: “Siasinonto ti ibaonko, ket siasinonto ti mapan a maipaay kadakami?” Saan a nailawlawag no ania a talaga dayta nga annongen wenno no adda magunggona ti tao nga agboluntario. Ngem awan panagkedkedna nga insungbat ni Isaias: “Adtoyak! Ibaonnak.”​—Isa. 6:1, 3, 8.

² Daytoy nga espiritu ti kinatulok a mangaramid iti aniaman a kiddawen ni Jehova ket kadawyan iti ilina. (Sal. 110:3) Iti kaaldawantayo, adda mayaw-awis kadagidiay mayat a pausar. Situtulokkayo met laeng kadi a pausar, kas ken Isaias?

³ Adda ita ti panagkasapulan kadagiti kakabsat nga agserbi iti Bethel. Nasken nga addaanda iti nasged a tarigagay a mangyun-una kadagiti interes ti Pagarian ken sitatallugod a mangaramid iti aniaman a makalikaguman a pangsuporta iti sangalubongan a panangasaba. (Mat. 6:33) Kinapudnona, ti panagserbi kas kameng ti pamilia ti Bethel ket mangipaay iti naisangsangayan a gundaway iti amin-kararua a panagserbi ken Jehova. Kasano a kasta?

⁴ Ti Trabaho iti Bethel: Panunotenyo ti amin a regular a magapgapuanan iti tallo a Bethel complex iti Estados Unidos, idiay Brooklyn, Patterson, ken Wallkill, New York. Ti 5,730 a kakabsat a lallaki ken babbai a mangbukel iti pamilia ti Bethel kadagitoy tallo a lugar ket addaan iti pribilehio a makiraman iti pannakaaramid dagiti Biblia ken literatura iti Biblia a mausar iti sangalubongan a tay-ak ken iti personal a panagadal. (Mat. 24:45) Kas pagarigan, iti kallabes a tawen serbisio, 24,364,670 a libro, 39,813,464 a bokleta ken broshur, 270,528,000 a magasin, ken 1,271,041 nga audiocassette ti napataud ken naipatulod kas resulta ti sangsangkamaysa a panagregget ti pamilia ti Bethel idiay Estados Unidos. Ditoy Pilipinas, ti 360 a kameng ti Pamilia ti Bethel idiay Quezon City ket saan laeng a nakiraman iti panangpataud iti nasurok a 10,000,000 a magasin itay kallabes a tawen serbisio. Ti nasurok nga 60 a kameng ti departamento ti translation ket nakaipatarus kadagiti libro ken broshur iti pito a pagsasao tapno ma-compose dagitoy ken maipatulod idiay sanga nga opisina ti Japan a pakayimprentaanda. Iti sangalubongan, adda nasurok a 1,900 a managipatarus ket maipabpablaak dagiti literatura iti nasurok a 300 a pagsasao. Adu a situtulok a boluntario ti naikkan iti annongen nga agimprenta ken agipatulod kadagiti literatura, agdalus, agtarimaan, agisagana iti taraon, aggatang, agtaripato iti salun-at, ken adu pay a trabaho iti Bethel.

⁵ Ti panangiringpas kadagitoy a trabaho kaipapananna ti nagdakkelan ngem makapnek iti naespirituan nga annongen. Agresulta iti dakkel a rag-o ti pannakaammo a ti amin a pigsa ken kiredtayo ket maus-usar a pangsuporta iti trabaho a panangasaba ken panangisuro. Ti panagserbi iti Bethel tulongannatayo a mangammo nga ad-adda pay iti organisasion ni Jehova. Mapalagipantayo a pinaregta ti salmista dagiti Israelita a mangammo nga ad-adda iti naindagaan a sentro ti teokratiko a turay idi kaaldawanda.—Sal. 48:12, 13.

⁶ Dagiti Bendision iti Panagserbi iti Bethel: Ania ti makuna dagidiay agserserbi iti Bethel maipapan iti pribilehioda? Imutektekanyo dagiti sumaganad a komento agpadpada manipud kadagiti ubbing pay ken nataenganen a kameng ti pamilia ti Bethel. Maysa a babai a kameng ti pamilia ti Bethel a tallo a tawenen nga agserserbi sadiay ti nagkomento: “Ti kaaddak ditoy Bethel pinatibkerna ti relasionko ken Jehova. Bayat a bumaybayag ti panagserbik ditoy ken umad-adu ti maad-adalko maipapan iti panagandar ti Bethel, umad-adu met ti masursurok maipapan iti personalidad ni Jehova. Ti panagserbi met iti Bethel ti nanglawlawag kaniak no kasano nga us-usaren ni Jehova dagiti tattao​—amin a kita ti tattao. Ket saan a masapul a perpektoka tapno awatennaka.”

⁷ Kinuna ti maysa nga agtutubo a kabsat a lalaki: “Malagipko a kunkunak iti bagik, ‘Anian a nagsayaat ti makadanon idiay baro a lubong ken mangibaga kadagiti matalek a tattao idi ugma nga adu a tawen ti binusbosko a nagserbi iti Bethel, imbes a nagpabaknangak iti lubong.’”

⁸ Maysa nga agtutubo a kabsat a lalaki ti nangmennamenna iti pannakasanayna: “Dakkel a bendision idi inusigko ti bagik ken dagiti kualidad a masapul a parang-ayek, kalpasanna pinatanorko dagita a kualidad. Mariknak itan nga ad-adda a kabaelak ti agserbi ken Jehova. Naan-anusakon, nanayonan ti panagteppelko, ken ad-addan a nasged ti panagayatko.”

⁹ Maysa a kabsat a babai ti mangpampanunot kadagiti naawatnan a bendision: “Gapu kadagiti naespirituan a programa ditoy, ad-adda a naam-ammok ni Jehova ken no kasano nga ad-adda a matuladko ti pampanunot, rikna, ken tignayna. Ket yantangay agtultuloy ti pannakasanay, agtultuloy met ti bendision.”

¹⁰ Kastoy ti kuna ti maysa a kabsat a lalaki a nangipamaysa iti 59 a tawen iti amin-tiempo a ministerio, a binusbosna ti nasurok nga 43 a tawen kadagita iti Bethel: “Ti Bethel ket saan a kasla monasterio, a kas iti pagarupen ti dadduma. Adu ti magapuananmi gapu ta nakaeskediul amin nga aramidenmi. . . . Awan pay ti aldaw a nagtrabahoak a diak nagragsakan ti inaramidko. Apay? Agsipud ta no agserbitayo ken Jehova iti amin a kararuatayo, mapnektayo a makaammo a ‘naaramidantayo ti rebbeng nga aramidentayo.’”—Luc. 17:10.

¹¹ Sabali pay a kabsat a lalaki, nga 62 a tawenen nga agserserbi iti Bethel, ti nagkuna: “Talaga a patiek a ti Bethel ti kasasayaatan a lugar ditoy daga sakbay ti iyaay ti Paraiso a daga. Diak pulos nagbabawyan ti panangaramidko iti amin-tiempo a serbisio kas ti tungpal-biag a karerak. Anian a rag-o ti pannakaimatang ken pannakiraman iti dakkel a panagrang-ay ti organisasion ni Jehova ditoy daga! Iti tulong ni Jehova, determinadoak nga agtalinaed iti Bethel ken amin-kararua nga usarek ti biagko a mangidur-as kadagiti interes ti Pagarian.”

¹² Dagitoy a kameng ti pamilia ti Bethel ti nangdakamat iti sumagmamano kadagiti adu a bendision a mabalinyo a tagiragsaken no sidadaankayo a pausar iti serbisio iti Bethel. Ngem kas iti aniaman a pribilehio iti panagserbi, masapul a maragpatyo nga umuna dagiti kualipikasion. Ania ti sumagmamano a makalikaguman tapno makapagserbikayo kas kameng ti pamilia ti Bethel?

¹³ Dagiti Makalikaguman Para iti Serbisio iti Bethel: Dagiti kangrunaan a makalikaguman kadagidiay mayat nga agserbi iti Bethel ket naipakita iti kahon. Kanayonanna, masapul a sitatallugod ken sipipinget nga agtrabahoda, saan ketdi a “managayat iti ragragsak.” (2 Tim. 3:4; 1 Cor. 13:11) Dagiti kameng ti pamilia ti Bethel ket masapul a naespirituanda a lallaki ken babbai a nakapatanor iti nasayaat nga ugali iti personal a panagadal ken nasanay dagiti pannakabalin ti pannakaawatda “a mangilasin agpadpada iti umiso ken di umiso.” (Heb. 5:14) Rumbeng nga iparparangarangda ti Nakristianuan a kinanataengan iti amin a paset ti panagbiagda, agraman ti panagkawkawes, panagbubuok, ken panagpili iti musika ken paglinglingayanda. Dagiti situtulok ti panagpuspusoda a kameng ti pamilia ti Bethel agserbida iti sadinoman a pakausaran kadakuada. Masansan a maited kadagiti ub-ubing a miembro dagiti nadagsen a trabaho, a pakairamanan ti panagimprenta, panagisagana ken panagitulod kadagiti literatura, panagtarimaan, panagtagibalay, panagdalus, panaglaba, ken panagisagana iti taraon. (Prov. 20:29) Ngem saan a kas iti sekular a panggedan, tunggal annongen ket mangyeg iti dakkel a pannakapnek agsipud ta sagrado a panagserbi dayta a mangidayaw ken Jehova.—Col. 3:23.

¹⁴ Makatawen ti kaababaan a panawen ti panagyan dagidiay maawis nga agserbi iti Bethel. Daytoy ti pakasanayanda nga agbalin a nabunga a trabahador. Mainanama a pagbalinenda ti Bethel kas pagtaenganda. Ti ayat ken Jehova ti mangtigtignay kadagiti kameng ti pamilia ti Bethel a mangyun-una iti trabaho iti Pagarian imbes a dagiti personal nga interesda. Dayta ket makaay-ayo ken Jehova.—Mat. 16:24.

¹⁵ Dagiti Agdama a Pakasapulan: Gapu iti kita ti trabaho a maar-aramid iti Bethel ditoy Pilipinas, dagiti agsolsolo a kakabsat a lallaki ti kangrunaan a kasapulan iti agdama. Nasaysayaat no regular pioneer-da, ta addadan iti amin-tiempo a trabaho. No dadduma, mabalin nga adda gundaway para kadagiti agsolsolo a kakabsat a babbai ken agassawa nga agedad iti 19 agingga iti 35 nga addaan kadagiti paglaingan (skill) a kasapulan iti Bethel. Kanayonanna, maparegta nga agaplikar dagiti dadduma a kakabsat a nalabit nasursurok bassit ngem 35 ti tawenda ken addaan kadagiti espesial a paglaingan ken pannakasanay a mabalin a mausar iti Bethel. Kas pagarigan, ramanen dagitoy dagiti doktor, inheniero, rehistrado a nars, wenno mekaniko iti lugan, ken dadduma pay. Nupay kasta, saanmi nga iparparegta kadagiti indibidual a gumun-odda iti naisangsangayan nga edukasion wenno panagsanay tapno laeng dumakkel ti tsansada a maayaban iti Bethel. Dagidiay addaanen iti naisangsangayan a pannakasanay, nalabit sakbay pay a naammuanda ti kinapudno, ti mabalin a mangisurat iti detaliado nga impormasion maipapan kadakuada ket ipakuyogda iti Bethel Information Sheet no maipatulod daytoy.

¹⁶ No kayatyo ti agserbi iti Bethel, mabalinyo ti dumawat iti Bethel Information Sheet iti sanga nga opisina. Masuratan koma daytoy sa maited iti komite ti serbisio ti kongregasion tapno isuda ti mangipatulod iti sanga nga opisina. No adda masapul a tulong iti Bethel, mapagpilian dagiti naidulin nga Information Sheet sa mapatulodan iti Bethel Application dagidiay kualipikado iti pakasapulan. No saankay a naawis iti las-ud ti maysa wenno dua a tawen, nasayaat no agsuratkayo manen ket pabaruenyo ti aplikasionyo tapno maammuanmi no mabalinkayo pay nga umay iti Bethel. Saan nga amin ket maayaban iti Bethel, isu a no saankayo a naayaban, itultuloyyo ti agpayunir iti teritoriayo, nga agtalekkayo ken Jehova nga ammona ti kasayaatan a pakausaranyo.

¹⁷ Ti panagserbi ken Jehova a kadua dagiti nabayagen nga adipen ni Jehova ket maysa a naisangsangayan a pribilehio para kadagidiay agtartrabaho iti Bethel. Apresiaren ti Bagi a Manarawidwid ti managsakripisio nga espiritu dagiti amin a sidadaan a pausar kadagiti kasapulan ti sangalubongan a kakabsattayo.—Fil. 2:20-22; 2 Tim. 4:11.

¹⁸ Dakayo nga Agtutubo​—Agsaganakay Itan Para iti Serbisio iti Bethel: Ti panagsagana para iti serbisio iti Bethel ket mangrugi sakbay pay a madanon ti makalikaguman nga edad a 19. Kasano a makapagsagana dagiti agtutubo para iti serbisio iti Bethel? Kinuna ni Jesus: “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos?” (Luc. 14:28) Yantangay nasken ti panagsagana ken panagplano tapno agballigi ti aniaman a proyekto iti panagbangon, anian a nagpateg no siaannad nga imutektekan dagiti agtutubo no kasanoda nga agibangbangon para iti panagserbida ken Jehova iti masanguanan! Ti natibker a pundasion ket masapul a maisaad a nasapa iti biagda tapno magun-odda dagiti naespirituan a kalat. Kas maysa nga agtutubo, kasano kasayaat ti panangisaadyo iti pamuonyo? No kayatyo ti agserbi iti Bethel, magunggonaankayo no siaannad nga amirisenyo dagiti sumaganad.

¹⁹ ‘Iwayaanyo’ Daytoy Naisangsangayan a Pribilehio iti Panagserbi: Kas nailanad iti Mateo 19:12, pinaregta ni Jesus dagiti adalanna nga ‘iwayaanda’ ti kurso ti panagsolsolo. Apay? Saan a gapu kadagiti personal nga interes, no di ket “maigapu iti pagarian ti langlangit.” Kasta met laeng ti imparegta ni Pablo a kurso, ti “naynay a panagserbi iti Apo nga awan ti makasinga.” (1 Cor. 7:32-35) Makapaladingit, adu ti naikapis iti pribilehio nga agserbi iti Bethel kas maysa a baro gapu ta nasapada a nagasawa. Kayatmi a paregtaen dagiti agtutubo a kakabsat a lallaki nga usarenda dagiti pigsada a mangragpat iti amin-tiempo a ministerio bayat a nawayada pay kadagiti responsabilidad iti pamilia. Iti kasta, no ikeddengdan ti mangasawa kalpasan ti sumagmamano a tiempo, nasaysayaatdanto nga assawa a lallaki gapu ta ad-adun ti kapadasanda iti biag ken iti Nakristianuan a ministerio. Kalpasan ti panagserbida iti adu a tawen iti Bethel, dadduma ti nangasawa ken nakapagtultuloyda nga agserbi iti Bethel kas agassawa. No maaddaandanto pay kadagiti sabali a pribilehio, a kas iti agdaldaliasat a manangaywan wenno misionero, sigurado a saanda a pagbabawyan ti tiempo nga inusarda a nagserbi iti Bethel.

²⁰ Dikay Koma Pasinga Kadagiti Namaterialan a Kalat: Nasayaat nga isaludsod ti tunggal maysa nga agtutubo: ‘Kalpasan a makagraduarak iti haiskul, kalatko kadi ti panangragpat iti amin-tiempo a sekular a karera wenno ti amin-tiempo a panagserbi ken Jehova?’ Ibagatayon a no pilienyo ti kurso a naud-udi a nadakamat, kasapulan daytoy iti adu a panagsakripisio. Ngem kasta met laeng ti makalikaguman kadakayo no ti sekular a karera ti ragpatenyo! Iti kamaudiananna, anianto a kurso ti pudpudno nga addaan iti manayon ken makagunggona a resulta? Nabatad ti sungbat ni Jesus. Sigun iti Mateo 6:19-21, kinunana: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw. Ta no sadino ti ayan ti gamengmo, addanto met sadiay ti pusom.” Dinatay koma pulos ituggod ti pusotayo a mangragpat kadagiti nailubongan a karera wenno material a bambanag imbes nga iti amin-kararua a panagserbi ken Jehova. Masapul a bigbigentay amin a ti kakaisuna a gameng a maikari a ragpaten isu ti nasayaat a relasion ken Jehova, tapno maparagsaktayo ti pusona. (Prov. 27:11) Babaen ti panangyun-una ken Jehova iti biagtayo bayat ti kinaagtutubo, maipakitatayo no sadino ti ayan dagiti gamengtayo ken no kasano kapateg ti Pagarian kadatayo. Laglagipenyo, “ti bendision ni Jehova​—isu dayta ti mangpabaknang, ket awan rigat nga inayonna iti dayta.” (Prov. 10:22) Adda ekselente a gundaway dagiti agtutubo a mangipakita no sadino ti ayan dagiti pusoda babaen ti panangipaay ken Jehova iti banag a naimbag gapu iti amin nga intedna kadakuada. Ti panagserbi iti Bethel ipaayna ti kasta a nakaskasdaaw a gundaway kadagidiay makaragpat kadagiti kualipikasion. Ti panagpayunir ti umuna nga addang maipaay iti daytoy.

²¹ Dagidiay Agserserbi iti Bethel Masapul a Nadalusda iti Moral: Insaludsod ti salmista: “Kasanonto ti panangdalus ti maysa nga agtutubo a lalaki iti danana?” Insungbatna: “Babaen ti panagaluadna maitunos iti sao [ni Jehova].” (Sal. 119:9) Ramanen dayta ti panangliklik iti aniaman nga adda pakainaiganna iti rinuker a moralidad ti sistema ti bambanag ni Satanas. Ti pornograpia iti Internet, di maitutop a kondukta iti kasungani a sekso, naalas a musika, makapadakes a paglinglingayan, panaginum iti arak bayat a menor de edad pay ket sumagmamano laeng kadagiti silo nga us-usaren ni Satanas tapno malapdanna dagiti agtutubotayo a mangragpat kadagiti naespirituan a kalat. Kasapulan ti natibker a determinasion tapno masaranget dagitoy a taktika. Kas maysa nga agtutubo, no makitam a maigamgamerkan iti aniaman kadagitoy a banag, makisaritaka kadagiti panglakayen iti kongregasionmo ket risutem dagitoy nga isyu sakbay nga agaplikarka iti serbisio iti Bethel. Napateg ti nadalus a konsiensia tapno naan-anay a makapagserbi ken Jehova.—1 Tim. 1:5.

²² Sursuruenyo ti Makibagay Kadagiti Sabali: Ti maysa a napateg a makalikaguman tapno naballigi ti panagserbi iti Bethel isu ti pannakasursuro a makibagay kadagiti sabali. Ti pamilia ti Bethel iti Pilipinas ket buklen ti ginasut a kakabsat a lallaki ken babbai a nagduduma ti kasasaadda iti biag. Nupay daytoy a panagduduma iti personalidad paimnasenna ti Bethel, no dadduma mangidatag met dayta kadagiti karit. No pampanunotem ti agserbi iti Bethel, nasayaat a saludsodam ti bagim: ‘Nalakaak kadi a masair no saan nga umanamong ti dadduma iti opinionko? Nalakadak kadi a pakibagayan dagiti sabali?’ No dagita ti pagkapuyam, rugiamon a tamingen dayta. No kasta ti aramidem, nalaklakakanto a makibagay iti pannakipagnaed ken pannakipagtrabaho kadagiti kameng ti pamilia ti Bethel.

²³ Ikagumaananyo ti agbalin a naespirituan a tao babaen ti panangsukay iti nasinged a relasion ken Jehova. Patanorenyo ti nasayaat a programa ti personal a panagadal, a pakairamanan ti panagbasa iti Biblia iti inaldaw. Aktibokay koma a mangiranud iti naimbag a damag kadagiti sabali. No iyugaliyo dagitoy a banag, maiparangarangyo ti naespirituan a panagrang-ayyo. (1 Tim. 4:15) Anian a nakaay-ayat a masakbayan ti agur-uray kadagidiay agsagsagana itan para iti karera nga amin-tiempo a panagserbi!

²⁴ Nagannak, Sanayenyo Dagiti Annakyo: Ania ti maaramidan dagiti nagannak tapno maparegtada dagiti agtutubo a sumrek iti amin-tiempo a ministerio? Kinuna ni Jesus: “Tunggal maysa a naan-anay a nasursuruan agbalinto a kas iti mannursurona.” (Luc. 6:40) Ti estudiante a naan-anay a nasursuruan gagangay a mangiparangarang kadagiti nasayaat a kualidad ti nasaet a mannursurona. Pagpanunotan koma dagiti Kristiano a nagannak daytoy a prinsipio bayat nga ikagumaananda a sanayen dagiti annakda “buyogen ti nadiosan a debosion kas kalat[da].” (1 Tim. 4:7) Yantangay pagannayasan dagiti ubbing nga iyanninaw ti kababalin dagiti nagannakda maipapan iti naespirituan a bambanag, nasayaat nga isaludsod dagiti nagannak iti bagbagida: ‘Personal kadi a tagipatgenmi ti trabaho iti Bethel a mangitandudo kadagiti interes ti pudno a panagdayaw ken Jehova? Bigbigenmi kadi a bembendisionan ni Jehova ti urnos iti Bethel? Patienmi kadi a ti biag a naisentro iti panagserbi ken Jehova isu ti kasayaatan a karera a mabalin a pilien dagiti annakmi? Iparparegtami kadi ti amin-tiempo a panagserbi babaen ti sao ken ulidan?’ Ti mismo a naimpusuan nga apresasiontayo iti panagserbi iti Bethel ken iti trabaho sadiay tulongannatayo a mangitukit iti kasta met laeng nga apresasion kadagiti annaktayo.

²⁵ Da Elcana ken Anna ket addaan iti nauneg nga apresasion iti pudno a panagdayaw. Nangipasdekda iti nagsayaat nga ulidan kadagiti Kristiano a nagannak itatta. Idiay kadaanan nga Israel, dagiti laeng lallaki nga Israelita ti makalikaguman nga ‘agparang iti sanguanan ti pudno nga Apo, ni Jehova’ mamitlo iti makatawen idiay tabernakulo. Nupay kasta, nagdaliasat ni Elcana iti agarup 30 a kilometro, mabalin a nagnagna, a kaduana ti intero a pamiliana iti “tinawentawen” tapno agdaton iti daytoy sentro ti panagdayaw ken Jehova. (Ex. 23:17; 1 Sam. 1:3, 4, 9, 19; 2:19) Nalawag a kayat daytoy nga ama a maaddaan met ti intero a pamiliana iti pannakaseknan iti naespirituan a bambanag.

²⁶ Kasta met laeng ti panangipateg ni Anna iti pudno a panagdayaw. Sipapasnek a nariknana nga obligasionna ti sumuporta iti pudno a panagdayaw idiay tabernakulo. Inkari ni Anna a no ikkan ni Jehova iti anak a lalaki, sidadaanto a mangipaay kenkuana tapno agserbi iti tabernakulo. (1 Sam. 1:11) Iti Mosaiko a Linteg, adda kalintegan ti asawa a lalaki a mangwaswas iti di maikanatad a kari ti asawana. (Num. 30:6-8) Nupay kasta, nalawag nga inanamongan ni Elcana ti kari ni Anna, a mangipakita a sinuportaranna met dayta nga ebkas ti pudno a panagdayaw!​—1 Sam. 1:22, 23.

²⁷ Naapektaran kadi iti positibo a wagas ni Samuel nga anakda babaen ti apresasion ken nasayaat nga espiritu nga impakita dagiti nagannakna? Wen. Kas maysa nga ubing, sitatallugod ken simamatalek nga intungpal ni Samuel dagiti annongenna ket nasanay para iti ad-adu pay a napateg a pribilehio iti panagserbi iti Dios. Di nagpatingga ti interes nga impakita da Elcana ken Anna iti panagserbi ni Samuel idiay tabernakulo idi nangrugin ti ubing kadagiti rebbengenna sadiay. Intultuloyda a regular a sinarungkaran tapno mangipaayda iti pammaregta ken suporta bayat nga intultuloyna ti amin-tiempo a panagserbi.—1 Sam. 2:18, 19.

²⁸ Anian a naisangsangayan nga ulidan ti impasdek da Elcana ken Anna kadagiti Kristiano a nagannak itatta! No mangngeg dagiti annaktayo dagiti naimpusuan nga ebkas ti apresasiontayo iti pribilehio a panagserbi iti Bethel ken makitada ti espiritu ti panagsakripisio nga iparparangarangtayo a mangpalawa kadagiti interes ti Pagarian, mapatanordanto met ti puso nga agannayas nga agserbi kadagiti sabali. Adu a nagannak ti sibaballigi a mangituktukit iti daytoy nasayaat a pagannayasan kadagiti annakda. Maysa a pito ti tawenna ti nagsurat: “Inton dumakkelak, kayatko ti umay dita Bethel, ket adda sumagmamano a banag a kayatko nga aramiden dita. (1) Panagimakinilia kadagiti magasin a Pagwanawanan ken Agriingkayo!, (2) panagtrabaho iti departamentoyo iti art, (3) panagkupin kadagiti nalabaan. Aniaman a trabaho. Kayatko latta.” Anian a nakaay-ayat a makita ti kasta a situtulok nga espiritu a tumanor iti puso dagiti annaktayo!

²⁹ Dakayo nga agtutubo, laglagipenyo a “ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Itultuloyyo a ragpaten dagiti naespirituan a kalat, agraman ti naisangsangayan a pribilehio a panagserbi iti Bethel. Dakayo a nagannak, tuladenyo ti ulidan dagiti matalek a tattao idi ugma a nangparegta kadagiti annakda a mangsukay iti nadiosan a debosion. (2 Ped. 3:11) Sapay koma ta aramidentay amin ti pasettayo a mangtulong kadagiti agtutubo a kakabsattayo tapno makapagserbida iti Naindaklan a Namarsua kadatayo iti inggat’ kabaelanda, yantangay daytoy ket “addaan kari a biag itan ken daydiay nga umay.”​—1 Tim. 4:8; Ecl. 12:1.

[Kahon iti panid 4]

Dagiti Kangrunaan a Makalikaguman Para iti Serbisio iti Bethel

● Di nakurkurang ngem makatawen a nabautisaranen

● Naespirituan a tao nga addaan nauneg nga ayat ken Jehova ken iti organisasionna

● Nasalun-at iti naespirituan, mental, emosional, ken pisikal

● Nasaysayaat no agserserbi kas payunir

● Umili wenno legal a permanente nga agnanaed ditoy Pilipinas

● Agtawen iti 19-35