Panangmatmat iti “Balay ti Dios” a Buyogen ti Panangipateg
“MAYSA a banag ti dinawatko ken Jehova—isu a birokekto, ti panagtaengko koma iti balay ni Jehova iti dagup dagiti aldaw ti biagko, tapno buyaek ti sayaat ni Jehova ken matmatak a buyogen ti panangipateg ti templona.”—Salmo 27:4.
Naragsakan, wenno naay-ayo, ni manangipateg nga Ari David a nangmatmat iti templo ni Jehova. Kasta met kadi ti panagriknayo kadagiti sentro ti pudno a panagdaydayaw itatta? Dagiti nasurok a 95 a pagtaengan a Bethel kadagiti sanga ti Watch Tower Society ket karaman kadagiti pasilidad a nainaig iti panagdaydayaw ken Jehova iti tiempotayo.
“No taliawek dagiti adu a tawen a panagserbik iti Bethel, kasta unay ti panagyaman ken panangapresiarko, a tinawen a dumakdakkel,” kuna ni Helga, a nangrugi nga agserbi iti pagtaengan a Bethel idiay Alemania idi 1948. Maysa ni Helga kadagiti 13,828 a nararagsak a trabahador iti Bethel iti intero a lubong nga idi 1993 a tawen ti serbisio ‘nabuyada ti sayaat ni Jehova.’ Ania kadi a talaga ti kayat a sawen ti nagan a Bethel? Kasano a ti tunggal maysa kadagiti Saksi ni Jehova, agserserbi man iti Dios iti uneg wenno ruar ti Bethel, mamatmatanna a buyogen ti panangipateg daytoy nga urnos?
Maysa a Nagan a Mangkalikagum iti Debosion
Mayanatup la unay ti “Bethel,” ta ti Hebreo a sao a Behth-ʼElʹ kaipapananna, “Balay ti Dios.” (Genesis 28:19, footnote) Wen, mayarig ti Bethel iti maysa a balay a nasayaat ti pannakaurnosna, wenno ‘maysa a sangakabbalayan a napatakder iti kinasirib,’ a ti Dios ken ti pagayatanna ti nakaiturongan ti atension. (Proverbio 24:3) “Kaslakam maysa a pamilia. Addaankam iti organisado nga inaldaw a rutina,” kuna ni Herta a buyogen ti panangipateg. Agpadada ken Helga nga agserserbi iti isu met laeng a Bethel iti nasuroken a 45 a tawen. Addaan ti tunggal kameng daytoy dakkel a pamilia iti akem ken lugar, a pakariknaanna iti ragsak ken talged. Maitunos iti nagan a Bethel, nasayaat ti pannakaurnos ken pannakaorganisar ti tunggal departamento. Mangitandudo daytoy iti talna, a pagbalinenna a posible ti epektibo a panangikaskasaba iti naimbag a damag, ken mangipaay kadagiti kongregasion iti nasayaat a rason a mangipateg iti “Balay ti Dios.”—1 Corinto 14:33, 40.
Apay a kasapulan dagiti kasta a pasilidad? Daytoy a magasin, kas pagarigan, ket naaramid iti pagimprentaan ti Bethel. Ti panangikaskasaba iti mensahe ti Pagarian ken ti panangibunong iti naespirituan a taraon, nga impakauna ni Jesu-Kristo, pagbalinenna dagiti organisasional nga urnos a kas iti Bethel a napateg unay—a supsuportaran dagiti natallugod a trabahador ken ipatpateg dagiti amin nga agdaydayaw ken Jehova.—Mateo 24:14, 45.
Kayatyo kadi a maammuan ti ad-adu pay maipapan iti inaldaw a maar-aramid ditoy? Iti pagnanaedan da Helga ken Herta, aguni ti makaay-ayo nga alarma kadagiti amin a pasdek a pagtaengan iti 6:30 t.b., nupay adu kadagiti nasurok a 800 a regular a trabahador ti nasapsapa a bumangon tapno makapagsaganada. Iti 7:00 t.b., Lunes agingga iti Sabado, aguummong ti pamilia kadagiti panganan para iti pannakasalaysay ti inaldaw a teksto, wenno panagdaydayaw iti agsapa. Sa maidasar ti nasustansia a pammigat. Mangrugi ti trabaho iti 8:00 t.b. ken agpaut iti walo nga oras. Sada la aginana no pangngaldaw. (Iti Sabado, kadawyan a kaguduat’ aldaw laeng nga agtrabaho ti pamilia.) Iti man kusina, pagimprentaan, paglabaan, kadagiti opisina, talier, pagaramidan iti libro, wenno iti aniaman a departamento, adu ti rumbeng a trabahuen.
Kadagiti rabii ken ngudo ti lawas, makilangen dagiti kameng ti pamilia kadagiti lokal a kongregasion kadagiti gimong ken iti publiko a panangasaba. Adu kadagiti kakabsat a lallaki iti Bethel ti agserserbi a panglakayen wenno ministerial nga adipen kadagitoy a kongregasion. Pudno nga apresiaren dagiti lokal a Saksi ti kastoy a panagtinnulong, a sangsangkamaysa nga agtrabahoda a kas maysa a bagi, a buyogen ti panagraem ken pannakaawat. (Colosas 2:19) Ammo ti tunggal trabahador iti Bethel a ti annongenna iti “Balay ti Dios” ket rumbeng a mayun-una ngem dagiti dadduma pay nga aktibidad. Nupay kasta, ti kinaregta iti panangasaba ken pannakilangen iti kongregasion, a buyogen ti natimbeng a kababalin, patibkerenna ti espiritualidad ti trabahador iti Bethel, parayrayenna ti rag-ona, ken pagbalinenna a nabungbunga a kameng ti pamilia. Anian a nagpateg dagitoy a kababalin iti panagtrabaho iti maysa a “balay” a ti naganna ket nainaig iti amin-kararua a debosion!
Naballigi a Panagserbi iti Bethel
Ania ti nakatulong kadagiti nakaad-adu a Saksi ni Jehova nga agserbi a sibaballigi iti Bethel? Kastoy ti kuna dagiti kameng ti pamilia ti Bethel idiay Francia nga adu a tawenen nga agserserbi sadiay: “Ti panagayat ken Jehova. Ti determinasion nga agtalinaed iti sadinoman a pangisaadanna kadatayo; kinapakumbaba, panagpasakup, ken panagtulnog iti panangidalan ti Sosiedad kadatayo.” (Denise) “Nakitak no kasano kapateg ti panangbigbig iti prinsipio a dinakamat ni Pablo idiay Roma 12:10: ‘Iti panangipakita ti pammadayaw iti maysa ken maysa mangidaulokayo.’ Ipakita kadatayo daytoy a kasuratan ti kinapateg ti saan a panangipetteng iti bukodtayo a kapanunotan, no di ket, ti panangikabilangan iti kapanunotan dagiti dadduma. Iti sabali a pannao, saantay nga aginngangato.” (Jean-Jacques) “Madadael ti panagraemtayo iti panagserbi iti Bethel no kitaentayo dagiti bambanag manipud iti nailasagan, natauan a panangmatmat,” kuna ni Barbara, “ta mabalin a paglipatennatayo daytoy iti kinapudno a ni Jehova ti mangiturturong iti organisasionna. Mabalin a mapukaw ti kasta a panagraem no maitibkoltayo kadagiti pagkapuyan dagiti dadduma.”
Tunggal maysa iti Bethel ket imperpekto, isu a kasapulan ti kinaannad iti pannakilangen. Di rumbeng a dagiti laeng kapatadanda ti kanayon a kalangenlangen dagiti agtutubo wenno kabbaro. Saan a makapabileg a kakadua iti Bethel wenno iti kongregasion dagidiay managreklamo wenno negatibo ti panagpampanunotda. Iti sabali a bangir, mangyeg kadagiti bendision ti panangtulad iti “sirib manipud ngato,” a nadakamat idiay Santiago 3:17. Daytoy ket “umuna iti amin nadalus, sumaganad natalna, nainkalintegan, sisasagana nga agtulnog, napno iti asi ken naimbag a bungbunga, di mangpataud kadagiti panangidumduma, di managinsisingpet.” Nakakadkadlaw dagiti kasta a kababalin, agraman ti mabayag a panagitured ken kinaanus, iti “Balay ti Dios,” a mamagbalin iti panagyan ti maysa a makaay-ayo ken makaparegta. Uray dagiti di-Saksi a bisita masansan a dayawenda ti nasayaat a panagtigtignay, kinamannakigayyem, ken naragsak a kababalin dagiti trabahador.
Inlawlawag ni Anny, nga agtawen itan iti nasurok a 70 ken kameng ti pamilia ti Bethel idiay Alemania sipud pay idi 1956, no kasano ti panangtaginayonna iti kinatulokna nga agserbi: “Para iti pagimbagak iti naespirituan, ikagkagumaak a di paudi kadagiti publikasion ti Sosiedad, makigimong a regular, ken regular a makiraman iti panangasaba. Tagtaginayonek met ti bagik a nasalun-at babaen ti panagarsisio kada bigat, babaen ti di panaglugan a kanayon iti elevator, ken babaen ti masansan a pannagna, nangruna iti tay-ak ti serbisio.”
Adu kadagiti naruamen iti biag iti Bethel ti umanamong ken Anny. Pulos a saanda nga agsardeng nga agsursuro, agtrabaho. Ti pisikal a salun-at sapulenna ti umdas a pannaturog ken arsisio ken kinatimbeng iti pannangan ken panaginum. Kangrunaan iti amin, saanda a liwayan ti personal a panagkararag ken panagadal iti Biblia.
Dakkel a Panangipateg iti Sagrado a Panagserbi iti Bethel
“Sadino ti pagtartrabahuam?” ti masansan a maisaludsod kadagiti kameng iti Bethel. Nadumaduma ti trabaho, ngem maikari ti tunggal maysa nga ipateg ti amin. Apay? Agsipud ta tunggal annongen—panangpaandar man iti makina a pagimprentaan iti naespirituan a taraon, panaglaba, panagluto ken panagdalus para iti pamilia, wenno panagtrabaho iti opisina—ket maibilang a sagrado a serbisio. Kas nadakamaten, saan a mangidumduma dagiti Kristiano. Laglagipenyo nga amin dagiti nasken nga annongen dagiti papadi ken Levita iti templo, kadagiti paraangan ken panganan daytoy, ket naibilang amin a sagrado a panagserbi ken Jehova. Karaman iti dayta ti panangparti ken panangisagana kadagiti animal a maidaton, panangikarga ti lana kadagiti pagsilawan, uray ti panagdalus ken panagbantay. Kasta met, makapnek ken makagunggona nga aramid “iti trabaho ti Apo” ti tunggal annongen iti Bethel, gapuna maysa a naisangsangayan a pribilehio.—1 Corinto 15:58.
Usigenyo iti apagbiit ti maysa a kababalin a manglapped iti panangmatmattayo iti “Balay ti Dios” a buyogen ti panangipateg. Dagiti Kristiano agpadpada iti uneg ken ruar ti Bethel rumbeng nga idianda ti apal ken imon, a ‘mamagtumoy kadagiti tulang.’ (Proverbio 14:30) Awan ti panggapuan ti asinoman nga umapal iti pribilehio a tagtagiragsaken dagiti trabahador iti Bethel. Mainayon pay, awan lugar iti uneg ti pamilia ti Bethel ti imon, a maysa kadagiti aramid ti lasag. Aguraykayo a sipapakumbaba—maysa dayta a nasayaat a balakad para iti maysa a mabalin a nataliwaywayan idinto ta naikkan dagiti dadduma iti dakdakkel a pribilehio. Maysa pay, agaassideg idiay Bethel dagiti tattao a naggapu iti nadumaduma a kabibiag. Anian a makaupay no matmatan ti maysa ti kasasaadna a ‘maipadis iti sabali a tao’! Ti pannakapnek iti “pagtaraon ken pagkawes” ti nakatulong kadagiti adu nga agtalinaed a simamatalek iti pinulpullo a tawen iti “Balay ti Dios.”—Galacia 5:20, 26; 6:4; 1 Timoteo 6:8.
Dakkel a gunggona ti maaw-awat dagiti Saksi ni Jehova ken dagiti riniwriw a dadduma pay manipud kadagiti libre a serbisio iti Bethel—trabaho a sibubulos a maar-aramid gapu iti panagayat iti Dios ken iti kaarruba. Maibusbusbosan dagiti pagtaengan a Bethel ken pagimprentaan ti Watch Tower Society, kas kadagiti dadduma pay a teokratiko a pasilidad, babaen kadagiti boluntario a kontribusion. (2 Corinto 9:7) Kas ken Ari David ken dagiti prinsipe ken panguluen ti Israel, maipakitatayo ti panagraem ken panangipategtayo iti “Balay ti Dios” babaen ti pannangted iti moral ken pinansial a suporta iti Sosiedad. (1 Cronicas 29:3-7) Intay kitaen ita no kasanotay a ‘mabuya ti sayaat ni Jehova’ iti Bethel.
Dagiti Bendision iti “Balay ti Dios”
No tumabtabunokayo iti maysa nga asamblea, mariknayo aya ti nauneg a pannakapnek, gapu ta nalikmutkayo kadagiti naragsak a managdaydayaw ni Jehova? Panunotenyo laengen, addaan ti maysa a trabahador iti Bethel iti pribilehio nga agserbi ken Jehova iti tengnga ti maysa a grupo dagiti kakabsat iti inaldaw! (Salmo 26:12) Anian a nagsayaat a gundaway a rumang-ay iti naespirituan ti ipaay dayta! Kinuna ti maysa a kabsat a lalaki nga ad-adu ti nasursurona a nakatulong kenkuana a mangsukog iti personalidadna iti las-ud laeng ti makatawen iti Bethel ngem iti tallo a tawen iti sabali a disso. Apay? Agsipud ta sadiay laeng a naaddaan iti gundaway a makapaliiw ken mangtulad iti pammati dagiti nakaad-adu a nataengan a Kristiano.—Proverbio 13:20.
Idiay Bethel, nalikmut ti maysa a tao kadagiti aduan padasna a mammagbaga, no ar-arigen. Mainayon pay, mabenepisiaran iti pannakangngegna kadagiti nasayaat pannakaisaganana a komento iti panagdaydayaw iti agsapa ken iti Panagadal iti Pagwanawanan ti pamilia ti Bethel ken no dumdumngeg kadagiti palawag kadagiti rabii ti Lunes. Makaawat dagiti kabbaro iti instruksion iti Bethel Entrants’ School ken makalikagumanda a mangbasa iti intero a Biblia iti las-ud ti umuna a 12 a bulan.
Mangipaay iti kanayonan a pammaregta dagiti report ken kapadasan manipud kadagiti bisita a naggapu kadagiti sabali a pagilian. Mainayon pay, bumisita no kua dagiti kameng ti Bagi a Manarawidwid wenno dagiti pannakabagida kadagiti sanga nga opisina. “Nupay adu ti pakakumikomanda,” kuna ni Helga, “kanayon nga adda latta panawen dagiti kakabsat a kumablaaw ken umisem.” Anian a makaparegta a maimatangan a personal ti makapagin-awa ken nanumo a kababalin dagiti kasta a nasungdo a lallaki!
Idiay Bethel, ad-adda a mapaliiw ti maysa no kasano ti panagandar ti organisasion ti Dios ken no kasano a tignayen ti nasantuan nga espirituna dagiti natulok a puso ken ima. “Idiay Bethel, mariknam nga as-asidegka iti ‘tengnga ti dalig,’” kuna ti maysa a kabsat, nga agserserbi iti Bethel idiay Francia sipud pay idi 1949. Intuloyna a kinuna: “Pudpudno a maikunak a no kaniak a maysa, ti Bethel ket isu ti porma ti amin-tiempo a serbisio a mangipalubos kaniak a mangusar a naan-anay iti panawen ken pigsak iti panagserbi ken Jehova ken kadagiti adu a kakabsat.” Ken di met aya dayta ti talaga a panggeptayo iti biag—ti panangaramid iti pagayatan ti Dios? Idiay Bethel, ‘makapagdaydayaw [ti maysa] iti agmalmalem.’ Anian a bendision!—Salmo 44:8.
Kas naammuantayon, ti maysa nga agtartrabaho iti pagtaengan a Bethel ket mabuyana ti sayaat ni Jehova ken agsagsagrap iti naruay a bendision. (Hebreo 6:10) Makagunggona met ngata kadakayo ti panagserbi iti “Balay ti Dios”? Dagiti mabalin nga agaplikar nga agserbi idiay Bethel isu dagidiay Saksi ni Jehova nga agtawen iti saan a nababbaba ngem 19, nasalun-at iti naespirituan ken pisikal, ken kas ken Timoteo, “naimbag ti damag[da] kadagiti kakabsat.” (Aramid 16:2) Adu ti namagbalin iti panagserbi idiay Bethel kas tungpal biag a trabahoda, kas dagidiay naadaw iti ngato. Mapaspasaranda ti nasged a tarigagay ti salmista—nga ‘agtaeng koma iti balay ni Jehova iti dagup dagiti aldaw ti biagna.’
Dayawen unay dagiti Saksi ni Jehova ti panagsakripisio dagiti kakabsat a lallaki ken babbai idiay Bethel, a mangan-annong kadagiti pagrebbenganda a situtulok ken siraragsak. Agserserbitay man ken Jehova idiay Bethel wenno iti uray sadinoman, addaan ti tunggal maysa kadatayo iti rason a makarikna iti kas narikna ni Ari David—a matmatan a buyogen ti panangipateg, wenno pannakaay-ayo, iti “Balay ti Dios.”
[Ladawan iti panid 31]
Maragsakan dagitoy a Kristiano iti sagrado a panagserbida iti Bethel idiay Alemania iti pinulpullo a tawen