Daytoy Kadi ti Kasayaatan a Karera nga Agpaay Kenka?

NO BAUTISADOKA a Kristiano, awan duadua a ti panagayat iti Dios ti mangtignay kenka nga agaramid iti pagayatanna. Mainayon pay, sigurado la ketdi a ti ministerio ti ipangpangrunam. Ngamin, binilin ni Jesu-Kristo dagiti amin a pasurotna nga agaramidda iti adalan. (Mateo 28:19, 20) Wen, mabalin a mangmanggedka ita tapno masuportaram ta bagim. Ngem kas pasurot ni Jesus ken kas maysa a Saksi ni Jehova, umuna ken kangrunaan iti amin, maysaka a Kristiano a ministro​—nga ipangpangrunam iti biagmo ti trabaho a panangikasaba iti Pagarian.​—Mateo 24:14.

Nalabit addaka iti naladaw a kinatin-edyer wenno apagsagpat iti edad a 20. Nalabit nabayag a pinampanunotmo no ania a kurso ti ragpatem iti biag. Iti panangtingiting kadagiti pagpilian a silulukat kenka, agparang a napateg nga usigen no ania ti makaited iti pannakapnek kenka.

Ngarud, usigem ti kuna ni Jørgen a taga Denmark maipapan iti pinilina. Iladawan ni Jørgen ti pinilina a karera kas “maysa a matarigagayan a wagas ti panagbiag a mabalinmo nga ipamaysa dagiti mas napatpateg nga aramid.” Kuna ni Eva, 31 ti tawenna a taga Greece: “No idiligko ti biagko kadagiti kapatadak, kanayon a makunak a ti biagko ket ad-adda a makagunggona, makapnek, ken makapainteres.” Ania a karera ti makaipaay iti kasta a pannakapnek? Kasano a maragpatmo ti kasta a karera?

Ti Kadi Dios ti Mangibagnos Kenka?

Mabalin a narigat ti agpili iti karera. Kinapudnona, mabalin a kaykayat ti dadduma nga ibaga ti Dios no ania a talaga ti kayatna nga aramidenda.

Idi adda ni Moises idiay Madian, binilin ni Jehova nga agsubli idiay Egipto tapno aonenna dagiti Israelita manipud pannakaadipen. (Exodo 3:1-10) Nagparang ti anghel ti Dios ken ni Gideon, a nadutokan a mangisalakan iti Israel manipud pannakairurumen. (Uk-ukom 6:11-14) Agpapaarab idi ni David kadagiti karnero idi imbaga ti Dios ken ni Samuel a pulotanna ni David kas ti sumaruno nga ari ti Israel. (1 Samuel 16:1-13) Saantay itan a maibagbagnos iti kasta a pamay-an. Imbes ketdi, nasken a timbangentayo dagiti bambanag ket ikeddeng no kasanotayo nga usaren dagiti abilidad nga inted ti Dios.

Linuktan ni Jehova ti “maysa a dakkel a ruangan a mangiturong iti panagaramid” agpaay kadagiti Kristiano nga agtutubo itatta. (1 Corinto 16:9) Kasano a kasta? Iti napalabas a dekada, nasurok a 2,125,000 ti rimmang-ayan ti bilang dagiti agibumbunannag iti Pagarian ket nasurok itan nga 6,000,000 ti bilangda iti intero a daga. Siasino ti tumulong a mangipaay iti minilion a Biblia, libro, broshur, magasin, ken tract nga agserbi a naespirituan a taraon ken mausar iti sangalubongan a trabaho a panangikasaba iti naimbag a damag? Daytoy nagsayaat a pribilehio ket tagtagiragsaken dagiti kameng ti sangalubongan a pamilia ti Bethel.

Makagunggona a Panagbiag

“Balay ti Dios” ti kaipapanan ti Bethel, ket ti pagtaengan a Bethel ti pagnanaedan dagiti boluntario a Kristiano nga agserserbi idiay hedkuarter ken kadagiti sanga nga opisina ti Watch Tower Society. (Genesis 28:19, footnote iti New World Translation of the Holy Scriptures​—With References ) Mabalin a mayarig dagiti agdama a pamilia ti Bethel iti organisado a ‘sangakabbalayan a nabangon iti kinasirib’ ken nabangon gapu iti ayat ken Jehova.​—Proverbio 24:3.

Ania ti maikuna iti kasla pamilia a kasasaad ti Bethel? Kuna ti maysa a 25-anyos a kameng ti pamilia ti Bethel idiay Estonia: “Maragragsakanak a maitimpuyog kadagiti gagayyem ni Jehova iti amin a tiempo. Daytoy pay laeng ti kapatgan a banag kaniak ditoy Bethel.”​—Salmo 15:1, 2.

Iti sangalubongan, tagtagiragsaken ita ti agarup 19,500 a tattao ti pribilehio nga agserbi iti Bethel. (Salmo 110:3) Idiay Estados Unidos, 46 porsiento kadagidiay adda iti Bethel ti agedad iti 19 agingga iti 29. Kas ken Isaias, kinunada met: “Adtoyak! Ibaonnak.” (Isaias 6:8) Nupay dedikadon ken Jehova, nagboluntario idi ni Isaias iti kanayonan a pribilehio ti panagserbi. Nabatad a kaipapanan daytoy ti panangisakripisio iti dadduma a personal a pagimbagan. Panawan dagidiay agserserbi idiay Bethel ti pagtaenganda ken dagiti nakairuamanda a kasasaad, agraman dagiti nagannak, kakabsat, ken gagayyemda. Situtulok a naaramid dagitoy a panagsakripisio “maigapu iti naimbag a damag.”​—Marcos 10:29, 30.

Iti sabali a bangir, nagadu a naespirituan a bendision ti adda idiay Bethel! Inlawlawag ti maysa nga agkabannuag a kameng ti pamilia ti Bethel idiay Russia: “Iti panagbalin a managsakripisio, adu ti masursurotayo a tumulong kadatayo nga agbiag iti baro a lubong. No iti kasasaadko, maikunak nga ad-adu dagiti bendision ni Jehova ngem dagiti insakripisiok.”​—Malakias 3:10.

Biag Idiay Bethel

Ania ti kasasaad ti biag idiay Bethel? Umanamong dagiti kameng ti pamilia ti Bethel a makaay-ayo ken makapnek dayta, makapagagar pay ketdi. Magusgustuan ni Jens, agtawen iti 43, ti agserbi iti Bethel. Apay? Kunana: “Gapu iti pannakarikna a pasetnatayo ti naindaklan a panagregget a mangitungpal iti nakapatpateg a trabaho. Mabigbigko ti kalawa ken kapateg ti trabaho ni Jehova.”

Manipud Lunes agingga iti Sabado, mangrugi ti aldaw idiay Bethel babaen ti morning worship. Maysa daytoy a panangusig iti Biblia, nga idauluan ti maysa nga aduan kapadasan a panglakayen. Kadagiti rabii ti Lunes, adda maysa nga oras ti pamilia nga agadal iti Biblia babaen ti tulong Ti Pagwanawanan, a sarunuen no dadduma ti maysa a palawag a naibatay iti Nainkasuratan a tema a nangnangruna a maibagay iti pamilia ti Bethel.

Ania dagiti urnos agpaay iti kabbaro a miembro ti Bethel? Tapno maammuanna ti kasasaad ti biag iti Bethel, dagiti nataengan a kakabsat a lallaki a kameng ti pamilia ti mangipaay kadagiti lekteur a mangilawlawag kadagiti nagduduma a benneg ti panagserbi iti Bethel. Iti sumagmamano a lawas bayat ti umuna a tawen, linawas a tabunuan ti baro a kameng ti pamilia ti Bethel ti nagsayaat nga eskuelaan a nairanta a mangpalawa iti pannakatarusna kadagiti Kasuratan. Addaan met dagiti kabbaro iti naisangsangayan a programa a panagbasa iti Biblia. Bayat ti umuna a tawen ti panagserbida iti Bethel, basaen dagiti baro a kameng ti pamilia ti intero a Biblia.

Ania ti resulta amin daytoy a pannakasanay? Sumungbat ni Joshua, 33-anyos a kameng ti pamilia ti Bethel idiay Hong Kong: “Pudno a pinauneg ti Bethel ti apresasionko ken Jehova. Makalangenko ti adu a natenneb a kakabsat a nangbusbosen iti kaaduan a paset ti biagda nga agserserbi ken Jehova. Magustuak unay dagiti naespirituan a programa, kas ti morning worship ken ti Panagadal ti pamilia iti Pagwanawanan. Kanayonanna, magustuak ti naurnos ken simple a wagas ti panagbiag. Daytoy ti mangwayawaya kaniak kadagiti di nasken a pakadukotan. Masursurok met a tamingen dagiti bambanag iti Nakristianuan a pamay-an, ket kanayon a makagunggona daytoy.”

Usaren dagiti kameng ti pamilia ti Bethel ti kaaduan a tiempo ken pigsada a mangaramid iti nagboluntarioanda a trabaho. Kayatna a sawen, usarenda ti pigsa ken panunotda a mangtaming a nangnangruna iti trabaho a naited kadakuada idiay Bethel. Nadumaduma ti matrabaho. Dadduma ti mangpaandar kadagiti makina a pagimprenta wenno agtrabaho iti bindery, agaramid kadagiti libro a maipatulod kadagiti kongregasion. Dadduma ti agtrabaho iti kosina, iti panganan, wenno iti paglabaan. Karaman met ti panagdalus, panagtalon, panagibangon, ken dadduma pay. Dadduma ti addaan responsabilidad a mangaywan kadagiti alikamen kadagitoy a departamento. Adda met dagiti mangopisina wenno para aywan iti salun-at. Makakarit ti amin a trabaho iti Bethel ngem makaparagsak ken pudno a makagunggona. Nangnangruna a makapnek dagiti mairingpas a trabaho iti Bethel gapu ta itandudoda dagiti interes ti Pagarian ken maar-aramid dagita gapu iti ayat iti Dios.

Naituding dagiti kameng ti pamilia ti Bethel kadagiti kongregasion, a sadiay ti damo a pakapasaranda kadagiti pagimbagan ti nagapuananda. Pagragsakanda ti makigimong iti kongregasion ken makiraman iti trabaho a panangasaba. Kas resultana, napasinged dagiti kameng ti pamilia ti Bethel kadagiti kakongregasionda.​—Marcos 10:29, 30.

Kuna ni Rita a kameng ti pamilia ti Bethel idiay Britania: “Agyamanak unay iti kongregasion! No addaak kadagiti gimong ken iti pangasabaan, mapatibker unay ti pammatik a makakita kadagiti dungdunguen a kakabsat, ubbing, babbaket ken lallakay sadiay! Agpapan pay kadagiti kasasaad, addada sadiay. Dayta ti tumulong kaniak nga ad-adda nga agregta iti panagserbik iti Bethel.”

Saan a kanayon a trabaho, gimong, panangasaba, ken panagadal ti ar-aramiden dagiti adda iti Bethel. Adda met panawen ti pamilia nga agrelaks. Kadarato nga adda dagiti makalinglingay ken makagunggona a naespirituan a programa a “Family Night,” tapno mabuya ti talento dagiti adu ken makaadal kadagiti makaparegta a kapadasan dagiti dadduma nga agserserbi iti Bethel. Makaparagsak met ti makaay-ayo ken makapabileg nga ibibisita dagiti dadduma. Mabalin nga adda met sumagmamano a pasilidad a paglinglingayan, kasta met dagiti libraria a pagadalan ken pagsukimatan. Saan met a malipatan ti makapabang-ar a panagsasarita idiay panganan bayat ti pannangan.

Kuna ni Tom a kameng ti pamilia ti Bethel idiay Estonia: “Asideg ti Bethel iti baybay ken iti maysa a napintas a kabakiran a pagpalpallailanganmi nga agassawa. Sagpaminsan met nga agay-ayamak iti golf, hockey, ken tennis a kaduak dagiti gagayyem iti kongregasion ken iti Bethel. Ket no ipalubos ti paniempo, agbisikletakami.”

Ania ti Aramidem Tapno Makualipikarka?

Siempre, ti Bethel kangrunaanna ket lugar a pangipapaayan dagiti nataengan a Kristiano iti sagrado a panagserbi ken Jehova ken agtrabahoda maigapu kadagiti kapammatianda iti intero a lubong. Dagidiay agbalin a kameng ti pamilia ti Bethel masapul a maragpatda dagiti sumagmamano a kualipikasion. Ania ti aramidem tapno makualipikarka nga agserbi iti Bethel?

Dagidiay maawat nga agserbi iti Bethel masapul nga adda nasayaat a pakasarsaritaanda iti kongregasion, kas ken Timoteo a nakipagserbi ken apostol Pablo. (1 Timoteo 1:1)‘Naimbag ti damag [ni Timoteo] kadagiti kakabsat idiay Listra ken Iconio.’ (Aramid 16:2) Nupay ubing pay idi, ammo ni Timoteo ti Kasuratan ket nasayaat ti pannakairamutna iti kinapudno. (2 Timoteo 3:14, 15) Umasping iti dayta, manamnama kadagidiay maawat nga agserbi iti Bethel nga addaanda iti pannakaammo iti Biblia.

Nasken a managsakripisio dagiti kameng ti pamilia ti Bethel. Nabatad unay ti kinamanagsakripisio ni Timoteo ken ti kinatulokna a mangyun-una kadagiti interes ti Pagarian ngem iti pagayatanna, isu a maikuna ni Pablo maipapan kenkuana: “Ta awan kaniak ti sabali pay nga addaan iti kababalin a kas kenkuana a sipupudno a mangisakitto kadagiti bambanag maipapan kadakayo. Ta amin dagiti dadduma sapsapulenda dagiti bukodda a pagimbagan, saan a dagiti pagimbagan ni Kristo Jesus. Ngem ammoyo ti pammaneknek nga impaayna maipapan ti bagina, a kas iti maysa nga anak iti ama isu nagpaadipen a kaduak iti pannakaipalawa ti naimbag a damag.”​—Filipos 2:20-22.

Ti maawagan nga agserbi iti Bethel ket dagidiay nataengan iti naespirituan a lallaki ken babbai. Dagiti urnos a nairanta para kadagiti kameng ti pamilia ti Bethel ti tumulong kadakuada a rumang-ay iti naespirituan babaen ti panagadal iti Biblia, kinaregular kadagiti Nakristianuan a gimong ken iti panangasaba, ken ti pannakitimpuyog kadagiti nataengan a Kristiano. Iti kasta, matulongan dagidiay adda iti Bethel a mangipangag iti balakad ni Pablo: “Itultuloyyo ti magna a maikaykaysa ken [Kristo Jesus], a naparamut ken napadakkel kenkuana ken napatibker iti pammati, a kas iti pannakaisuroyo, nga agliplippias iti pammati iti panagyaman.”​—Colosas 2:6, 7.

Gapu iti kasasaad ti trabaho iti Bethel, masapul a napigsa ken nasalun-at dagidiay sumrek iti daytoy a pribilehio ti panagserbi. No adda kenka dagiti kualipikasion a nadakamatmi, agtawenka iti 19 wenno natataengan, ken bautisadoka iti saan a nakurkurang ngem makatawen, paregtaendaka a mangiraman iti planom ti panagserbi iti Bethel.

Adda Amin Pasettayo

Kas Kristiano, sigurado a kayattayo amin nga iyun-una dagiti interes ti Pagarian iti biagtayo ken agbalin nga amin-kararua ti panagserbitayo ken Jehova. (Mateo 6:33; Colosas 3:23) Mabalintayo met a paregtaen dagidiay agserserbin idiay Bethel nga itultuloyda ti sagrado a serbisioda sadiay. Ket nangnangruna a matignay koma a rumagpat iti daytoy naisangsangayan a pribilehio dagiti agtutubo a kakabsat a kualipikado nga agserbi iti Bethel.

Makapnek iti naespirituan a panagbiag ti panagserbi iti Bethel​—maysa a pudno a kasayaatan a karera nga agpaay kenka. Kasta ti narikna ni Nick a nangrugi a nagserbi iti Bethel idi agtawen iti 20. Kalpasan ti sangapulo a tawen a panagserbina iti Bethel, kunana: “Masansan nga agkararagak ken Jehova tapno agyaman iti di kaikarian a kinamanangngaasina. Ania pay koma ti birokek? Ditoy Bethel, nalikmuttayo kadagiti matalek a Kristiano, a mangipapaay iti amin a kabaelanda nga agserbi ken Jehova.”

[Kahon/Ladawaniti panid 22]

ANIA TI MAARAMIDAN DAGITI PANGLAKAYEN KEN NAGANNAK?

Dagiti agtutubo ti nangnangruna a paregtaen dagiti panglakayen ken agdaldaliasat a manangaywan nga agaplikar iti Bethel. Iti nabiit pay nga impormal a surbey kadagiti agkabannuag a kameng ti pamilia ti Bethel, 34 porsiento kadakuada ti nangnangruna a pinaregta dagiti Kristiano a manangaywan tapno pagbalinenda a kalatda ti panagserbi iti Bethel. Wen, mabalin a kailiwto ida dagiti kakongregasionda. Ngem nasayaat a laglagipen a nupay awan duadua a positibo ti impluensia ni Timoteo kadagiti agtutubo idiay Listra ken Iconio, isut’ saan nga inggawid dagiti panglakayen a makipagserbi ken Pablo. Saanda nga impapan a ti ikukuyog ni Timoteo iti apostol ket agbanag iti dakkel a pukaw iti kongregasionda.​—1 Timoteo 4:14.

Nangnangruna nga ikagumaan dagiti Kristiano a nagannak ti agbalin a positibo nga impluensia kadagiti annakda iti daytoy a banag. Iti kadakdakamat a surbey, 40 porsiento kadagidiay napagsaludsodan ti nangibaga a dagiti nagannakda ti kangrunaan a nangparegta kadakuada nga agserbi iti Bethel. Kuna ti maysa a kabsat a babai nga agserserbi iti Bethel iti sumagmamanon a tawen: “Ti biag dagiti nagannakko bayat nga agserserbida ken Jehova ti nabileg a nanggutugot kaniak a sumrek nga agserbi iti Bethel. Kombinsidoak a daytoy ti kasayaatan ken makapnek unay a wagas ti panagbiag gapu iti nakitak nga ulidanda iti amin-tiempo a ministerio.”

[Kahon iti panid 24]

IPATPATEGDA TI PANAGSERBI ITI BETHEL

“Ipatpategko ti panagserbik iti Bethel. Makapnek a maammuan a nakapagserbiak ken ni Jehova iti agmalem, a kasta met laeng ti aramidek iti kabigatanna, ken kadagiti sumaganad nga aldaw. Daytoy ti mangipaay kaniak iti nasayaat a konsiensia ken mangpunno iti isipko kadagiti positibo a kapanunotan.”

“Ti Bethel ket lugar a mabalinmo a pangipamaysaan iti amin a panawen ken pigsam nga agserbi ken Jehova nga awan makasinga. Mangipaay daytoy iti rag-o. Ngem makitam met ti organisasion ni Jehova iti sabali a panangmatmat. Mariknam nga as-asidegka iti sentro dayta nga organisasion, ket makapagagar unay dayta.”

“Ti panagserbi iti Bethel ti kasayaatan a banag a napagteng kaniak. Ditoy Bethel, awan sardayna ti panagadal. Ken saan a para iti bukodko a pagimbagan ti edukasion ditoy, no di ket maipaay dayta ken ni Jehova. Saan a pulos nga ubbaw ti trabahok ditoy.”

“Mariknak ti pannakapnek ken talna no usarek dagiti talentok ditoy Bethel agsipud ta maus-usarda a maipaay ken Jehova ken kadagiti kakabsat.”

“Diak makasarak iti pudpudno a pannakapnek ken kinaragsak iti dati a karerak. Nabayagen nga inar-arapaapko ti makipagtrabaho a kadua ken maipaay kadagiti kakabsatko. Dayta ti makagapu nga immayak ditoy Bethel. Mariknak ti pudno a pannakapnek no ammok nga amin a nagbannogak ket pakagunggonaan dagiti sabsabali iti naespirituan ken mangyeg dayaw ken Jehova.”