Asino ti Rumbeng a Patiem?

“Siempre, tunggal balay adda nangibangon, ngem ti nangibangon iti amin a bambanag isu ti Dios.”​—HEBREO 3:4.

UMANAMONGKA kadi iti panagrasrason dayta a mannurat iti Biblia? Sipud idi naisurat dayta a bersikulo, napasaranen ti sangatauan ti agarup 2,000 a tawen a nasientipikuan nga irarang-ay. Adda pay laeng kadi sumagmamano a mamati a ti disenio a nalawag a makita iti nakaparsuaan ti mangipapati nga adda la ketdi Nangdisenio a Namarsua nga isu ti Dios?

Uray kadagiti nabaknang a pagilian, adu ti mamati nga adda Dios. Iti Estados Unidos kas pagarigan, idi nagaramid iti surbey ti magasin a Newsweek idi 2005, natakuatan a 80 a porsiento kadagiti umili ti “mamati a ti Dios pinarsuana ti uniberso.” Nababa kadi ti adal dagita a tattao? Bueno, addada kadi sientista a mamati iti Dios? Idi 1997, impadamag ti Nature a pagiwarnak maipapan iti siensia a dandani 40 a porsiento kadagiti napagsaludsodan a biologo, pisiko, ken matematiko ti mamati a saan laeng nga adda Dios no di ket dumdumngeg ken mangipangpangag pay kadagiti kararag.

Nupay kasta, daytat’ supiaten unay ti dadduma a sientista. Iti nasientipikuan a komperensia, nabiit pay nga imbaga ni Dr. Herbert A. Hauptman, maysa a premiado iti Nobel Prize, a maikontra iti pudno a siensia ti panamati nga adda persona a nabilbileg ngem iti tao, nangruna ti panamati nga adda Dios. Kastoy ti kinunana: “Makadangran iti nasayaat a pagtungpalan ti puli ti tao daytoy a kita ti pammati.” Uray dagiti sientista a mamati iti Dios, bumdengda a mangisuro nga adda la ketdi Diseniador gapu iti disenio a nabatad kadagiti mula ken animal. Apay? Sigun ken Douglas H. Erwin, maysa a paleobiologist (eksperto iti panangadal kadagiti timmangkenen a tedda dagiti sibibiag idi a banag) idiay Smithsonian Institute, kastoy ti maysa a makagapu: “Ti maysa kadagiti pagannurotan ti siensia ket, saanna a patien a mapasamak wenno adda epekto dagiti milagro.”

Kayatmo kadi ti madiktaran no ania ti rumbeng a panunotem ken patiem? Wenno kayatmo kadi nga usigen ti dadduma nga ebidensia tapno makabukelka iti bukodmo a konklusion? Bayat a basbasaem dagiti nabiit pay a natakuatan ti siensia a naisalaysay kadagiti sumaganad a panid, saludsodam ti bagim, ‘Nainkalintegan kadi a patiek nga adda Namarsua?’

[Blurb iti panid 3]

Usigem a mismo ti ebidensia

[Kahon iti panid 3]

“CREATIONIST” KADI DAGITI SAKSI NI JEHOVA?

Dagiti Saksi ni Jehova patienda ti panamarsua a naisalaysay iti Genesis a libro ti Biblia. Nupay kasta, saanda a “creationist” kas iti nalabit ipagarupmo. Apay a saan? Umuna, patien ti adu a “creationist” a naparsua ti uniberso, ti daga, ken ti amin a sibibiag iti dayta iti innem nga aldaw a sagduduapulo ket uppat nga oras agarup 10,000 a tawen ti napalabasen. Ngem saan a kasta ti isursuro ti Biblia.a Patien met dagiti “creationist” ti adu a doktrina a saan a patalgedan ti Biblia. Iti laeng Sao ti Dios ti pagibasaran dagiti Saksi ni Jehova kadagiti narelihiosuan a pannursuroda.

Kanayonanna, iti dadduma a pagilian, ti termino a “creationist” tukoyenna met dagiti Pundamentalista a grupo nga aktibo a makipaspaset iti politika. Ikagkagumaan dagitoy a grupo a guyugoyen dagiti politiko, hues, ken edukador a mangipatungpal kadagiti linteg ken pannursuro a maitunos iti narelihiosuan a pagalagadan dagiti “creationist.”

Dagiti Saksi ni Jehova ket neutral iti politika. Raraemenda ti kalintegan dagiti gobierno a mangpanday ken mangipatungpal kadagiti linteg. (Roma 13:1-7) Nupay kasta, iyap-aplikarda ti imbaga ni Jesus a “saanda a paset ti lubong.” (Juan 17:14-16) Iti ministerioda iti publiko, ik-ikkanda dagiti tattao iti gundaway a mangammo kadagiti pagimbagan ti panangyaplikar kadagiti pagalagadan ti Dios. Ngem dida labsingen ti Nakristianuan a neutralidadda babaen ti panangsuportar kadagiti panagregget dagiti Pundamentalista a grupo a mangikagkagumaan a mangipatalged kadagiti linteg a nainaig kadagiti kalintegan dagiti sibilian ken mangpilit iti sabsabali a mangakseptar kadagiti pagalagadan ti Biblia.—Juan 18:36.

[Footnote]