Mamatikayo Kadi iti Creationism?

Saan. Mamati dagiti Saksi ni Jehova a pinarsua ti Dios ti amin a banag. Ngem saankami nga umanamong iti creationism. Apay? Maikontra ngamin iti Biblia ti adu a kapanunotan dagiti creationist. Usigenyo ti sumaganad a dua a pagarigan:

1. Ti kapaut ti innem nga aldaw a panamarsua. Ikalintegan ti dadduma a creationist a ti innem nga aldaw a panamarsua ket literal a 24-oras nga al-aldaw. Ngem ti sao nga “aldaw” iti Biblia mabalin a tumukoy iti napaut a tiempo.​—Genesis 2:4; Salmo 90:4.

2. Ti kabayagen ti daga. Isursuro ti dadduma a creationist a ti daga ket sumagmamano a ribu laeng ti kabayagna. Ngem sigun iti Biblia, addan ti daga ken ti uniberso sakbay pay ti innem nga aldaw a panamarsua. (Genesis 1:1) Gapu iti dayta, saan a kontra dagiti Saksi ni Jehova iti mapagtalkan a nasirarak ti siensia a mangipakita a ti daga ket mabalin a binilion a tawenen ti kabayagna.

Nupay mamati dagiti Saksi ni Jehova iti panamarsua, saankami a kontra-siensia. Mamatikami nga agtunos ti pudno a siensia ken ti Biblia.