Ti Katan-okan a Tao
SIASINO ti ibilangyo a katan-okan a tao? Ni kadi Noe a nakalasat iti Layus ken nagbalin a kapuonan ti amin a sibibiag ita? (Genesis 7:1, 21, 22; 9:18, 19) Ni kadi Nabucodonosor, daydiay nagkauna nga agturay iti lubong ken nangibangon iti nakangayngayed a siudad a pinanagananna iti Babilonia a Dakkel? (Daniel 4:28-30) Wenno nalabit ni Alejandro a Dakkel, a nadakamat uray iti padto ti Biblia gapu kadagiti nagapuananna? (Daniel 8:5-8, 21-22) Wenno ni ngata Julius Caesar, daydi nalatak nga agturay iti Roma?
Iti kurang nga 45 a tawen kalpasan ti ipapatay ni Julius Caesar, naipasngay idiay Betlehem ti maysa nga ubing a napanaganan iti Jesus. Isu kadi ti nagbalin a katan-okan a tao? Agarup sangagasut a tawen ti napalabasen, kinuna ti libro a The Historians’ History of the World: “No idilig kadagiti gapuanan ti siasinoman a tao iti pakasaritaan ti sangatauan, napatpateg ti nagbalin nga impluensia dagiti naaramidan [ni Jesus], uray iti di narelihiosuan a panangmatmat. Bigbigen dagiti kangrunaan a sibilisasion iti lubong a nangrugi ti baro a panawen idi naipasngay ni Jesus.”
Agingga ita, nagadu pay laeng ti interesado maipapan ken Jesu-Kristo. Iti napalabas a sumagmamano a tawen, ti Time, Newsweek, ken U.S.News and World Report naggigiddan nga insalaysayda ti artikulo maipapan kenkuana a naitampok iti parupa dagita a nalatak a magasin. Kinapudnona, agminar nga immadu ti interesado maipapan ken Jesus. Kastoy ti kinuna ti periodiko a Toronto Star idi 2004: “Agtultuloy ti impluensiana kadagiti pelikula, musika ken kadagiti uso nga estilo ti kawes. Nagbalin isuna a maysa kadagiti kalatakan a bannuartayo.”
Nupay kasta, iti di pay unay nabayag, nakaskasdaaw ta adda dadduma a nangikalintegan nga awan ti nagbiag idi a Jesus. Kasta ti kapanunotan ti prominente a mannursuro a ni Bruno Bauer (1809-82). Ni Karl Marx ti maysa kadagiti estudiantena. Di pay nabayag, kastoy ti insurat ni Robert E. Van Voorst, iti librona a Jesus Outside the New Testament: “Idi agangay, innayon ni Marx iti ideolohiana dagiti kapanunotan ni Bauer a nainaig kadagiti sarsarita maipapan iti nagtaudan ni Jesus, ket naiwaras dayta idi agangay babaen ti opisial a literatura ti Soviet ken dadduma pay a propaganda dagiti Komunista.”
Ngem ita, manmanon ti mangilibak a talaga a nagbiag idi ni Jesus ditoy daga. Kinapudnona, sidadaan nga umanamong ti kaaduan a tattao a ni Jesus ket agpayso ken nakapatpateg a tao. Kastoy ti paulo ti maysa nga artikulo ti Wall Street Journal idi Disiembre 2002: “Ti Siensia Dina Mailibak ti Kinaagpayso ni Jesus.” Ti mannurat iti dayta nga artikulo inngudona: “Kaaduan nga eskolar, malaksid kadagiti di napeklan nga ateista, inakseptardan ni Jesus iti Nazaret kas maysa a tao a nagbiag idi.”
Ngem ni Jesus ket saan a basta maysa a nalatak a tao idi un-unana. Impadamag ti magasin a Time a “saan a pulos a nainkalintegan ti panangilibak a ni Jesus iti Nazaret ket maysa a persona nga addaan iti kabilgan nga impluensia—saan laeng nga iti daytoy dua a milenio no di ket iti intero a pakasaritaan ti sangatauan.” Innayonna: “Nagbileg ti argumento nga awan ti siasinoman a kas ken ni Jesus, a ti biagna ket nagdakkel ken manayon ti impluensiana.”
Ngem nasken latta a masungbatan dagitoy a saludsod: Siasino a talaga ni Jesus? Nagtaudanna? Ania ti panggepna idi immay ditoy daga? Ken apay a nakapatpateg nga ikagumaantayo nga ammuen ti amin maipapan kenkuana?