Ni Jesus—No Ania ti Kuna Dagiti Tattao Maipapan Kenkuana
“Ni Jesus iti Nazaret . . . ti awan duadua a kalatakan iti intero a historia.”—H. G. Wells, Ingles a historiador.
“Ni Kristo ti . . . naisangsangayan kadagiti amin a bannuar iti pakasaritaan ti tao.”—Philip Schaff, maysa a teologo ken historiador a nayanak idiay Switzerland.
ASINO ti kualipikado a maawagan kas katan-okan a tao a nagbiag? Kasano a marukod ti kinatan-ok ti maysa? Babaen ti kinalaingna iti tay-ak ti militar? Ti kinapigsana? Ti kinasiribna? Wenno marukod dayta babaen ti kasaknap ti impluensia dagiti sasao ken aramidna ken babaen ti ulidan nga impasdekna?
No maipapan ken Jesu-Kristo a taga-Nazaret, kastoy ti komento dagiti naglabas ken agdama a historiador, sientista, eskolar, mannurat, politiko, ken dadduma pay:
“Agkalikagum iti dakkel a panangballikug kadagiti impormasion tapno mapaneknekan a saan a talaga a ni Jesus a taga-Nazaret ti kaimpluensiaan a tao, saan laeng nga iti napalabas a dua a milenio, no di ket iti intero a pakasaritaan ti tao.”—Reynolds Price, Americano a mannurat ken eskolar ti Biblia.
“Nupay naan-anay nga awan basolna, indatonna ti bagina nga agpaay a pagimbagan ti sabsabali, agraman dagiti kabusorna, ket sinubbotna ti lubong. Naisangsangayan dayta nga inaramidna.”—Mohandas K. Gandhi, lider ti politika ken relihion idiay India.
“Idi ubingak, naisuro kaniak agpadpada ti Biblia ken ti Talmud. Maysaak a Judio, ngem pagsidsiddaawak ti naisangsangayan a kinatao ti Nazareno.”—Albert Einstein, sientista a nayanak idiay Alemania.
“Para kaniak, ni Jesu-Kristo ti katan-okan a tao iti intero a historia, agpadpada kas Anak ti Dios ken kas Anak ti Tao. Makagunggona kadatayo ita ti amin nga imbaga wenno inaramidna, banag a di naaramidan ti asinoman, iti naglabas ken iti agdama.”—Sholem Asch, autor a nayanak idiay Poland, kas naadaw iti Christian Herald; isuda ti nangitaliko.
“Agingga idi agtawenak iti 35, awan ti patpatiek. Ngem lima a tawen ti napalabas, nangrugiak a mamati ken Jesu-Kristo ket kellaat a nagbalbaliw ti panagbiagko.”—Konde Leo Tolstoy, nobelista ken pilosopo a Ruso.
“[Ni Jesus] ti addaan iti kadakkelan nga impluensia a nagbiag ditoy daga ken agtultuloy nga umad-adu ti maim-impluensiaanna.”—Kenneth Scott Latourette, Americano a historiador ken autor.
“Sarsarita laeng kadi dagiti salaysay maipapan iti Ebanghelio? Para kaniak, awan a pulos ti pakakitaan a sarsarita dagita. No idilig ken Jesu-Kristo, manmano laeng ti pammaneknek iti pakasaritaan ni Socrates ngem kaskasdi a saan a napagduaduaan dayta.”—Jean-Jacques Rousseau, pilosopo a Pranses.
Nalawag a no adda rumbeng a pagtuladantayo, ni Jesu-Kristo dayta. Ni Pablo, maysa a de adal idi umuna a siglo a pinili ni Jesus nga agbalin a pasurotna ken mangisarita iti maipapan Kenkuana kadagiti nasion, idagadagna kadatayo a “kumitatayo a sipapasnek” ken Jesus. (Hebreo 12:2; Aramid 9:3) No maipapan iti panagbiag, ania ti masursurotayo ken Jesus? Kasano a magunggonaankayo iti panagbiagna?