Dagiti Relihion—Pagturturonganda?

ANIA ti mapaspasamaken kadagiti relihion nga agkunkuna a Kristiano? Iti lugaryo, bumasbassit kadin dagiti miembroda wenno umad-aduda? Nalabit nadamdamagyon nga umad-adu manen dagiti agbalbalin a relihioso, ken pasaray maipadamag nga umad-adu dagiti mannakimisa kadagiti lugar kas idiay Africa, Makindaya a Europa, ken Estados Unidos. Nupay kasta, maipadpadamag manipud iti dadduma a paset ti lubong, nangruna iti Makinlaud a Europa, nga agserserran dagiti simbaan, bumasbassit ti bilang dagiti mannakimisa, ken umad-adu dagiti saanen nga interesado iti relihion.

Gapu ta bumasbassiten ti bilang dagiti kamengda, binalbaliwan ti adu a relihion ti estiloda. Dadduma ti mangibaga a “saanda a manangukom,” tapno ipasimudaagda nga awaten ti Dios ti aniaman a kita ti aramid. Umad-adu ti pananglinglingay, panangabbukay, ken sekular a panangguyugoy nga ar-aramiden dagiti relihion imbes nga isuroda ti Sao ti Dios. Nupay ipagarup ti dadduma a makimismisa a napateg dagita a panagbalbaliw tapno maibagay kadagiti aktual a kasasaad daytoy moderno a lubong, mapanunot ti adu a napasnek a tattao a saanen a maar-aramid dagiti relihion ti mision nga impaannong ni Jesus. Usigentayo no ania ti mapaspasamaken kadagiti relihion kadagiti nabiit pay a dekada.