Dagiti Agtutubo nga Agus-usar iti Internet!
Iladawanmo ti anakmo nga agmaymaysa nga agpaspasiar iti lansangan bayat ti rabii.
Panunotem ti tin-edyer nga anakmo a mangor-organisar iti padaya iti pagtaenganyo ngem dimo pulos ammo dayta.
Ipapanmo nga agpapaaramid ti baro wenno balasangmo kadagiti tulbek ti balayyo sa ibumbunongna kadagiti estranghero.
NO agus-usar ti anakmo iti Internet, saan nga adayo a mapasamak dagiti kasasaad a nadakamat. “Mangipapaay ti Internet iti adu ken nadumaduma a pamay-an ti pannakiam-ammo ken pannakisarita kadagiti tattao,” kuna ti magasin a Science News.
Dagiti agtutubo nagbiitda a nakasursuro nga agusar iti Internet. Kinapudnona, iti Estados Unidos idi 2004, dandani 9 iti kada 10 a tattao nga agtawen iti 12 agingga iti 17 ti agus-usar iti Internet, a mabalinen nga usaren iti dandani amin a paset ti lubong.
Bigbigen ti kaaduan a dakkel ti usar ti Internet. Ngem rumbeng nga ammo koma ti isuamin dagiti peggad nga itden daytoy. Kas pagarigan, adu nga agtutubo ti agus-usar iti Internet nga is-isuda, ket dadduma ti makikomunikar kadagiti tattao a dakayo ken uray ti anakyo diyo pulos awisen iti pagtaenganyo.
Dadduma nga inosente nga agtutubo mabalin a sibibiddut nga ipalgakda pay ti pakasaritaanda, ti kapanunotanda, wenno mangikabilda iti ladawanda iti Internet. Sigun ken Propesor Zheng Yan iti State University of New York, dagiti agtutubo “masansan a dida mapanunot no kasano kaadu dagiti makabasa iti dayta nga impormasion, agraman dagiti mananggundaway a tattao a mabalin a mangallukoy kadagiti agtutubo kadagiti seksual nga ar-aramid.”
Usigentayo a naimbag no ania ti ar-aramiden ti adu nga agtutubo iti Internet. Iti kasta, mabigbigtayo dagiti posible a tumaud a parikut, maammuantayo no ania ti sapsapulen dagiti annaktayo, ken matulongantayo ida a mangpennek kadagiti talaga a kasapulanda. Matulongantayo met dagiti Kristiano nga agtutubo a mangdaer kadagiti pakarigatan tapno makapagtalinaedda a matalek iti Dios kadagitoy a narigat a panawen.—2 Timoteo 3:1-5.