Umiso ti Napilik a Kurso

Kas insalaysay ni Sonia Acuña Quevedo

Naitukon kaniak ti maysa a nangatngato a saad iti banko. Mangyeg dayta iti dayaw ken dakdakkel a sueldo. Nupay kasta, nabiit pay a naawisak nga agserbi kas maysa nga amin-tiempo a ministro iti adayo a kongregasion. No panunotek ti pinilik 32 a tawenen ti napalabas, ammok a dayta ti umiso.

DIMMAKKEL ni Nanang kas maysa a Katoliko ngem pinagduaduaanna dagiti doktrina ti simbaan. Dina maawatan no apay a pagdayawanda dagiti imahen, idinto ta inaramid laeng dagita ti tao. Napateg kenkuana no ania ti pudno a relihion, isu a nagduduma ti sinerrekna a relihion tapno masungbatan dagiti saludsodna ngem kaskasdi a napaay.

Naminsan nga agparpariir iti ruar ti balaymi idiay Tuxtla, Mexico, nakasaritana ti maysa a Saksi ni Jehova. Gapu ta nagustuanna dagiti Nainkasuratan a sungbat ti Saksi kadagiti saludsodna, immanamong a masarungkaran. Idi nagsubli ti Saksi, agur-uray ni Nanang a kaduana ti maysa a ministro ti Adbentista, maysa a padi ti Katoliko, ken maysa a ministro ti Nazarene. Nagsaludsod ni Nanang maipapan iti Sabbath, ket ti laeng Saksi ti nakaipaay iti makapnek a Nainkasuratan a sungbat. Kinapudnona, isu laeng ti addaan iti Biblia! Idi 1956, kalpasan ti innem laeng a bulan a panagadal iti Biblia, nabautisaran ni Nanang kas maysa a Saksi ni Jehova. Walo idi ti tawenko.

Dagiti Napasnek a Pakaseknan ni Tatang

Saan a binusor ni Tatang ti panagadal ni Nanang iti Biblia. Ngem idi rinugiannakami nga isuro nga uppat nga annakna―dua a lallaki ken dua a babbai―ken ikuyog kadagiti Nakristianuan a gimong, dinadael ni Tatang dagiti literatura ni Nanang. Gapu ta patienna a maal-allilawkami, inusarna ti Katoliko a Biblia tapno padasenna a paneknekan a dagiti Saksi ti sisisikap a nanginayon kadagiti bersion ti Bibliada ti nagan ti Dios a Jehova. Naklaat ni Tatang idi impakita kenkuana ni Nanang nga adda dayta a nagan iti mismo a Bibliana, ket nangrugi a nagbaliw ti panangmatmatna kadagiti Saksi.―Salmo 83:18.

Idiay Mexico, naisangsangayan nga okasion ti maika-15 a kasangay ti maysa a balasitang. Gapu ta saan a nainkasuratan ti panagkasangay, insardengkon a rinambakan dayta.a Ngem impilit ni Tatang nga adda koma naisangsangayan a banag a maipaayna kaniak. Nagpanunotak ket kinunak, “Dakayo ti kayatko a regalo babaen ti panangkuyogyo kaniak iti sumaruno nga asamblea dagiti Saksi ni Jehova.” Immanamong, ket rimmayray ti interesna iti Biblia.

Maysa a rabii kalpasan ti napigsa a bagyo, nakoriente ni Tatang ket nakaro ti sugatna. Bayat nga agpapaimbag iti ospital, 24 nga oras nga inasikaso dagiti Saksi. Dina pulos nalipatan dayta nga ebkas ti Nakristianuan nga ayat. Idi agangay, nakiraman iti tay-ak ti ministerio ket indedikarna ti biagna ken ni Jehova. Ngem makapaladingit ta pimmusay idi Setiembre 30, 1975, makabulan laeng sakbay ti panagpabautisarna koma. Magagarankami unay a mangabrasa kenkuana inton panagungar!―Aramid 24:15.

Nasayaat nga Impluensia ti Pamilia

Talaga a nakapatpateg ken ni manangko a Carmen ti amin-tiempo a ministerio. Gapuna, nagbalin a regular pioneer di nagbayag kalpasan a nagpabautisar idi 1967, ket binulan a nangbusbos iti agarup 100 nga oras iti ministerio. Idi agangay, immakar iti siudad ti Toluca, iti sentro ti Mexico. Nakapagtrabahoak iti maysa a banko ket nagpabautisarak idi Hulio 18, 1970.

Napalalo ti ragsak ni Manang Carmen iti amin-tiempo a ministerio isu a pinaregtanak a makikadua kenkuana idiay Toluca. Maysa nga aldaw, pampanunotek dayta bayat nga umim-imdengak iti maysa a palawag nga agkuna a masapul nga usaren dagiti pasurot ni Jesus dagiti agkakapateg a naespirituan a sagudayda a mangidaydayaw iti Dios. (Mateo 25:14-30) Inyimtuodko iti bagik, ‘Ikagkagumaak kadi nga usaren dagiti naespirituan a saguday a naitalek kaniak?’ Bayat a pampanunotek dayta, dumakdakkel ti tarigagayko a mangipaay iti ad-adu a panagserbi ken ni Jehova.

Dua a Kalat a Pagpilian

Idi 1974, nagpasalistaak kas payunir iti sabali a teritoria. Di nagbayag kalpasanna, nagtelepono kaniak ti maysa a Kristiano a panglakayen idiay Toluca. “Ur-urayendaka ditoy. Umayka koman,” kinunana. Diak ninamnama a madutokanak nga agserbi idiay Toluca kas special pioneer, ngem naitawtaw sa ti surat a mangipakaammo iti pannakadutokko! (Sidadaan dagiti special pioneer nga agserbi iti amin-tiempo iti sadinoman a pangibaonan kadakuada ti organisasion ni Jehova.)

Dagus nga impakaammok iti banko ti desisionko nga agikkat. “Agurayka, Sonia,” kinuna ti boss-ko, bayat nga impakitana kaniak ti maysa a papeles. “Nabiit pay a naipakaammo kadakami a maysaka kadagiti pito a babbai a napili nga agbalin nga assistant manager. Itatta laeng nga adda babbai iti daytoy a kompania a nadutokan iti dayta a saad. Awatem kadi?” Kas nadakamat iti rugrugi, ngumato ti sueldok ken pakaidayawak no awatek dayta a saad. Nagyamanak iti boss-ko ngem imbagak a desididoakon a naan-anay nga agserbi iti Dios. “Makaammoka ngarud,” kinunana. “Ngem laglagipem a kanayon a sidadaan ti banko a mangawat kenka no bilang ta kasapulamto ti trabaho.” Dua nga aldaw kalpasanna, addaakon idiay Toluca.

Panagserbi Kas Special Pioneer Idiay Mexico

Dua a tawenen nga special pioneer ni Manang Carmen idiay Toluca idi inkeddengko ti makikadua kenkuana. Anian a ragsakmi ta agkaduakami manen! Ngem tallo laeng a bulan kalpasanna, naaksidente ni Nanang isu a masapul nga adda mangaywan kenkuana. Kalpasan ti pannakisaritami iti sanga nga opisina dagiti Saksi ni Jehova, napagnumuanmi ken ni Manang Carmen nga isu ti agawid. Iti las-ud ti 17 tawen, inaywananna ni Nanang. Kabayatan dayta a tiempo, nagserbi ni manangko kas regular pioneer. Idiay balaymi nga iyadalanna dagiti estudiantena iti Biblia tapno maaywananna latta ni Nanang.

Idi 1976, naibaonak idiay Tecamachalco, maysa a siudad a nabatad ti nagdumaan dagiti napanglaw ken nabaknang. Inyadalak iti Biblia ti maysa a nabaketan a balasang ken makipagnanaed iti nabaknang a kabsatna. Idi imbagana iti kabsatna a kayatnan ti agbalin a Saksi, pinangtaan ti kabsatna a papanawenna iti balayna. Nupay kasta, saan a napabutngan daytoy a napakumbaba a baket. Kalpasan a nabautisaran, impaypayso ti kabsatna ti pangtana. Nupay 86 ti tawenna idin, naan-anay a nagtalek ken ni Jehova. Inaywanan ti kongregasion ket nagtalinaed a matalek agingga a pimmusay.

Eskuelaan ti Gilead, Sa Idiay Bolivia

Tinagiragsakko ti lima a nagsayaat a tawen idiay Tecamachalco. Kalpasanna, naawisak nga ageskuela iti umuna a Gilead Extension School a maangay idiay Mexico. Kas iparipirip dayta a nagan, ekstension dayta ti eskuelaan a maang-angay idiay New York. Kayat da Nanang ken Manang Carmen a patgak dayta nga awis. Kas resultana, napanak iti sanga nga opisina idiay Mexico City tapno ageskuelaak iti sangapulo a lawas, maysa a nagpateg a pagteng iti naespirituan nga aspeto ti biagko. Nagturpos ti klasemi idi Pebrero 1, 1981, ket naibaonak idiay La Paz, Bolivia, a kaduak ni Enriqueta Ayala (Fernández itan).

Idi dimtengkami idiay La Paz, awan pay dagiti kakabsat a lallaki a mangsabat kadakami. “Apay koma a sayangenta ti orasta?” kinunami. Gapuna, rinugianmi ti nangasaba kadagiti tattao nga adda iti eropuerto. Kalpasan ti tallo a naragsak nga oras, simmangpet dagiti kakabsat a naggapu iti sanga nga opisina. Kalpasan a nagpadispensarda, kinunada a natrapikda gapu iti piesta.

Panangasaba iti Ngatuen Dagiti Ulep

Agarup 3,625 a metro a nangatngato ti La Paz ngem iti patas ti baybay isu nga iti kaaduan nga aldaw, addakami iti ngatuen dagiti ulep. Gapu ta bassit ti angin, narigat ti aganges. Gapuna, nabambannogakon kalpasan laeng ti apagbiit a panangasaba. Nupay makatawen sakbay a nairuamko ti agnaed iti nangato a lugar, awan kaimudinganna dagiti napasarak a pisikal a rigat no idiligko kadagiti bendision ni Jehova. Kas pagarigan, iti maysa a bigat idi 1984, sinang-atko ti nabato a bakras ti bantay tapno mangasabaak iti pagtaengan nga adda iti tapaw. Nupay nabannogak, nagtuktokak iti ridaw, ket rimmuar ti maysa a babai. Naragsak ti panagpatangmi, isu nga inkarik nga agsubliak kalpasan ti sumagmamano nga aldaw.

“Diak la ammo,” kinunana. Kaskasdi, nagsubliak ket kiniddaw ti babai nga iyadalak iti Biblia ti anakna. “Obligasion dayta dagiti nagannak,” kinunak. “Ngem no kayatmo, mabalinka a tulongan.” Immanamong ket nagpayadal met iti Biblia. Gapu ta di nakapageskuela, nangrugikami babaen ti bokleta a Learn to Read and Write, nga impablaak dagiti Saksi ni Jehova para kadagidiay adda iti kasta a kasasaad.

Idi agangay, walon ti annakna. No sumarungkarak, agiinniggem ti dadduma kadagiti annakna tapno tulongandak a sumang-at iti bakras. Nagbalin nga adipen ni Jehova ti intero a pamiliada―ti ama, ina, ken ti walo nga annakda. Payunir ti tallo kadagiti babbai, ken panglakayen ti maysa kadagiti lallaki. Ministerial nga adipen ti amada agingga a pimmusay idi 2000. Anian a makaliwliwa iti puso no mapanunotko daytoy a nagsayaat a pamilia ken ti kinamatalekda! Agyamanak ken ni Jehova ta inikkannak iti gundaway a tumulong kadakuada.

Nagkaduakami Manen ken ni Manang Carmen

Idi natay ni Nanang idi 1997, naawis manen ni Manang Carmen nga agserbi kas special pioneer. Idi 1998, naibaon nga agserbi idiay Cochabamba, Bolivia, ti lugar a pagserserbiak. Wen, kalpasan ti 18 a tawen, agkaduakami manen. Naikkan ni Manang Carmen iti pribilehio kas maysa a misionera. Naragsak ti panagkaduami idiay Cochabamba ken makaay-ayo ti klima sadiay, isu nga adda pagsasao dagiti lumugar a, ‘Dagiti sallapingaw dida kayat a panawan ti Cochabamba’! Iti agdama, addakami iti Sucre, Bolivia, maysa a napintas a siudad nga addaan iti 220,000 nga umili, ken masarakan iti nangato a tanap. Nupay naawagan idi ti siudad kas Bassit a Vatican gapu ta addaan daytoy iti adu a simbaan dagiti Katoliko, ita addaanen daytoy iti lima a kongregasion dagiti Saksi ni Jehova.

No pagtiponen, nabusbosmi ken ni Manang Carmen ti nasurok nga 60 a tawen a panagpayunir, ken tinagiragsakmi ti awan kaaspingna a pribilehio a panangtulong kadagiti nasurok a sangagasut a tattao a nagpabautisar. Wen, awan duadua a ti amin-kararua a panagserbi ken ni Jehova isu ti kasayaatan ken makapnek unay a wagas ti panagbiag!―Marcos 12:30.

[Footnote]

[Ladawan iti panid 15]

Sang-atek ti nabato a bakras ti bantay tapno mayadalak daytoy a pamilia

[Ladawan iti panid 15]

Bayat ti panangasabami ken ni manangko a Carmen (kannawan)