Kinasaliwanwan—Para iti Siasino?
AGBIBIAGTAYO iti nasaliwanwan a lubong. Nakappapati kadi daytoy? Kinapudnona, saan a mabusbos ti dadduma a nasion ti amin a kuartada. Napattapatta nga agdagup iti nasurok nga 60 trilion a doliar ti gatad ti amin a produkto ken serbisio a napataud idi 2005 iti intero a lubong. No dayta a nagadu a napataud ket naiwaras iti amin a tao iti daga, agarup 9,000 a doliar ti bingay ti kada sibibiag a tao ita. Ket umad-adu pay dayta.
Ngem saan nga amin a tao ditoy lubong ket nasaliwanwan ti biagna. Sigun iti nabiit pay a publikasion ti United Nations, ad-adu pay ti kinabaknang ti tallo a kabaknangan a tao iti lubong ngem ti agtitipon a produkto ti 48 a kapanglawan a nasion. Ket sigun iti UN Development Programme, awan pay 2 a doliar iti inaldaw ti iyan-anay a gastuen ti 2.5 bilion a tattao tapno agbiagda laeng. Nagadu ti mabisbisinan ken di makagun-od iti nadalus a danum nga inumen.
Idiay Estados Unidos, ad-adalen dagiti sosiologo ti grupo a kunaenda nga “agngangabit nga agbalin a napanglaw.” Dakkel ti posibilidad nga agbalin a napanglaw dagita. Nasurok a 50 milion kadakuada ti kasta ti kasasaadda nupay nabaknang ti pagilianda.
Apay a nakaad-adu ti kuarta a mapan kadagiti tresoreria ken kadagiti banko ngem agrigrigat ti nagadu a napanglaw? Apay a nagadu ti awanan gundaway a magunggonaan iti umad-adu a kinabaknang ti lubong?
[Blurb iti panid 3]
Ti tallo a kabaknangan a tao iti lubong ket nabakbaknangda pay ngem iti nagtitipon nga 48 a kapanglawan a nasion
[Ladawan iti panid 2, 3]
Dagiti trabahador nga ubbing iti daytoy a paktoria ti ladrilio makateggedda ti agarup 50 cent iti maysa nga aldaw
[Credit Line]
© Fernando Moleres/ Panos Pictures
[Picture Credit Line iti panid 3]
© Giacomo Pirozzi/Panos Pictures