Agimtuod Dagiti Agtutubo . . .
Isu Kadi ti Maibagay Kaniak?
Sungbatan ti sumaganad a pannubok:
Aniada a galad ti birbirokem iti pakiasawaam? Iti listaan iti baba, markaam iti ✔ ti abay dagiti uppat a galad nga ibilangmo a kapatgan.
․․․․․․․․ nataer/napintas
․․․․․․․․ nasayaat ti espiritualidadna
․․․․․․․․ mannakigayyem
․․․․․․․․ mapagpiaran
․․․․․․․․ nalatak
․․․․․․․․ mapagwadan ti kababalinna
․․․․․․․․ naangaw
․․․․․․․․ kanayon nga adda kalatna
Idi ub-ubingka pay, adda kadi kursonadam a kasungani a sekso? Iti listaan iti ngato, markaam iti X ti abay ti maysa a galad a pakaay-ayuam unay idi iti dayta tao.
Awan dakesna ti aniaman kadagiti kababalin a nadakamat iti ngato. Adda pagimbagan ti tunggal maysa kadagita. Ngem saanka kadi nga umanamong a no ubingka pay nga agrayo, adda pagannayasam a mangipamaysa iti atensionmo kadagiti saan a napateg a galad, kas kadagiti adda iti makannigid a benneg?
Ngem bayat nga agmatmataenganka, mangrugi nga usarem ti abilidadmo nga agpanunot tapno sukimatem dagiti napatpateg a galad, kas kadagiti adda iti makannawan a benneg. Kas pagarigan, mabalin a maamirismo a saan met gayam a mapagpiaran ti kapintasan a balasitang iti lugaryo, wenno saan met gayam a nasayaat ti moralidad ti kalatakan a barito iti klaseyo. No addakan iti “labes ti kinalasbang ti kinaagtutubo”―ti tiempo a damo a rumasuk dagiti seksual a tarigagay―nalabit nga ad-adda a kitaemton dagiti napatpateg a galad tapno masungbatam ti saludsod nga, Isu kadi ti maibagay kaniak?―1 Corinto 7:36.
Uray Asino Kadi Lattan?
Adda panawen a maatrakarka iti sumagmamano a kasungani a sekso. Ngem saan a mabalin nga uray asino lattan kadakuada ti piliem. Kayatmo ngamin a ti tungpal biag a kasimpungalam ket daydiay mangparayray kadagiti nasayaat a kababalinmo ken daydiay mabalinmo met a pangaramidan iti kasta. (Mateo 19:4-6) Asino ngata dayta? Sakbay a sungbatam dayta a saludsod, masapul a ‘kumitaka iti sarming’ ket sipupudno a sukimatem ti bagim.―Santiago 1:23-25.
Tapno ad-adda a maam-ammom ti bagim, sungbatam dagiti sumaganad a saludsod:
Ania dagiti nasayaat a kababalinko?
․․․․․
Ania dagiti pagkapuyak?
․․․․․
Ania dagiti emosional ken naespirituan a kasapulak?
․․․․․
Saan a nalaka ti panangam-ammo iti bagi, ngem mabalinmo a pangrugian dagita a saludsod.a Bayat nga ad-adda a maam-ammom ti bagim, ad-adda a nakasaganaka a mangbirok iti daydiay mangparayray kadagiti nasayaat a kababalinmo imbes a kadagiti pagkapuyam. Ngem komusta ngay no iti panagkunam ket nabirokamon ti tao a maibagay kenka?
Agpaut Ngata Daytoy a Relasion?
Tapno masungbatam dayta a saludsod, sukimatem ti katatao ti pakaatrakaram. Agannadka di la ket ta ti laeng kitkitaem ket dagiti kayatmo a makita. Sukimatem a naimbag ti katataona.
Adu a makiin-innarem ti kumitkita laeng kadagiti makinruar a galad. Dagiti laeng pagpadaanda ti ammoda: ‘Agpada ti musika a kayatmi.’ ‘Agpada dagiti kayatmi nga aramiden.’ ‘Agkatunosankami!’ Ngem kas nadakamat itay, saan laeng a dagiti makinruar a galad ti kitaem no addakan iti labes ti kinalasbang ti kinaagtutubo. Masapul a sukimatem ti “nalimed a kinatao ti puso.”―1 Pedro 3:4; Efeso 3:16.
Kas pagarigan, imbes a kitaem no ania dagiti pagpadaanyo, nalabit a nasaysayaat no kitaem ti reaksionna kadagiti gundaway a dikay agtunos. Manangipapilit kadi, nalabit a nalaka a ‘rumasuk ti ungetna’ wenno mangusar kadagiti “nabassawang a sasao”? (Galacia 5:19, 20; Colosas 3:8) Wenno isu ket nainkalintegan, a sidadaan nga agpabus-oy tapno adda kappia no la ket ta awan ti prinsipio a masalungasing?―Santiago 3:17.
Masapul met a kitaem no daytoy a tao ket naturay wenno managimon: Kalikagumanna kadi nga ammuen ti aniaman nga aramidem? “Adda dakkel a parikut no isu ket managimbubukodan ken managimon,” kuna ti agkabannuag a babai nga agnagan iti Nicole. “Adda dagiti madamdamagko nga agnobio nga agrikkiar gapu laeng ta saan a nagtelepono daydiay maysa―panagkunak, saan a nasayaat a pagilasinan dayta.”
Ania ti panangmatmat dagiti tattao iti nobio wenno nobiam? Nasayaat a kasaritam dagidiay pudno a makaam-ammo kenkuana, kas kadagiti nataengan a kakabsat iti kongregasionda. Maibagada kenka no “naimbag ti damagna.”―Aramid 16:1, 2.b
Maiparbeng Kadi nga Agsinakayon?
Kasano no maamirismo a saan a maibagay kenka ti nobio wenno nobiam? Iti dayta a kaso, nasaysayaat laengen nga agsinakayo. Kuna ti Biblia: “Nasaldet daydiay nakakita iti didigra ket rugianna ti aglemmeng.”—Proverbio 22:3.c
Inton agangay, makabirokkanto iti baro a nobio wenno nobia. Natimtimbengton ti panangmatmatmo―maysa a sinukog ti kapadasan. Nalabit a ti sungbatmonto iti saludsod nga “Isu kadi ti maibagay kaniak?” ket wen!
Ad-adu pay nga artikulo manipud iti serye nga “Agimtuod Dagiti Agtutubo . . .” ti masarakan iti Web site a www.watchtower.org/ype
[Footnotes]
a Kitaem iti panid 30 ti Enero 2007 a ruar ti Agriingkayo! dagiti kanayonan a saludsod nga iyimtuodmo iti bagim.
b Kitaenyo met dagiti saludsod iti kahon iti panid 19-20.
c Para iti kanayonan nga impormasion maipapan iti panagsina, kitaenyo ti Agriingkayo! a Marso 22, 2001, panid 12-14.
PAGPAMPANUNOTAN
◼ Ania dagiti nasayaat a galadmo a mamagbalin kenka a nasayaat nga asawa?
◼ Ania ti sumagmamano a galad a sapsapulem iti maysa nga agbalin nga asawa?
◼ Kadagiti ania a pamay-an nga ad-adda a maam-ammom ti katatao, kondukta, ken reputasion ti nobio wenno nobiam?
[Kahon iti panid 19]
Nasayaatto ngata nga asawa a lalaki?
DAGITI IKABILANGAN
❑ Kasano ti panangusarna iti autoridadna?—Mateo 20:25, 26.
❑ Ania dagiti kalatna?—1 Timoteo 4:15.
❑ Ikagkagumaanna kadi a ragpaten dagita a kalatna?—1 Corinto 9:26, 27.
❑ Asino dagiti gagayyemna?—Proverbio 13:20.
❑ Ania ti panangmatmatna iti kuarta?—Hebreo 13:5, 6.
❑ Ania dagiti magustuanna a paglinglingayan?—Salmo 97:10.
❑ Ania ti ipamatmat ti panagkawkawesna?—2 Corinto 6:3.
❑ Kasanona nga iparparangarang ti panagayatna ken ni Jehova?—1 Juan 5:3.
DAGITI PAGLAINGANNA
❑ Nagaget kadi?—Proverbio 6:9-11.
❑ Ammona kadi ti mangusar a naimbag iti kuarta?—Lucas 14:28.
❑ Nasayaat kadi ti pakasarsaritaanna?—Aramid 16:1, 2.
❑ Nadayaw kadi kadagiti dadakkelna?—Exodo 20:12.
❑ Nakonsiderar kadi kadagiti sabsabali?—Filipos 2:4.
DAGITI PAGILASINAN NGA ADDA SERIOSO A PARIKUT
❑ Nalaka kadi nga agpungtot?―Proverbio 22:24.
❑ Allukoyennaka kadi a makipaset iti seksual nga imoralidad?—Galacia 5:19.
❑ Manangdangran kadi wenno nasakit ti panagsasaona?—Efeso 4:31.
❑ Masapul kadi nga uminom pay iti arak tapno makapagragragsak?—Proverbio 20:1.
❑ Managimon kadi ken bagina la ti pampanunotenna?—1 Corinto 13:4, 5.
[Kahon iti panid 20]
Nasayaatto ngata nga asawa a babai?
DAGITI IKABILANGAN
❑ Kasanona nga ipakpakita ti panagpasakup iti pamilia ken iti kongregasion?—Efeso 5:21, 22.
❑ Ania ti ipamatmat ti panagkawkawesna?—1 Pedro 3:3, 4.
❑ Asino dagiti gagayyemna?—Proverbio 13:20.
❑ Ania ti panangmatmatna iti kuarta?—1 Juan 2:15-17.
❑ Ania dagiti kalatna?—1 Timoteo 4:15.
❑ Ikagkagumaanna kadi a ragpaten dagita a kalatna?—1 Corinto 9:26, 27.
❑ Ania dagiti magustuanna a paglinglingayan?—Salmo 97:10.
❑ Kasanona nga iparparangarang ti panagayatna ken ni Jehova?—1 Juan 5:3.
DAGITI PAGLAINGANNA
❑ Nagaget kadi?—Proverbio 31:17, 19, 21, 22, 27.
❑ Nalaing kadi nga agbadyet?—Proverbio 31:16, 18.
❑ Nasayaat kadi ti pakasarsaritaanna?—Ruth 4:11.
❑ Nadayaw kadi kadagiti dadakkelna?—Exodo 20:12.
❑ Nakonsiderar kadi kadagiti sabsabali?—Proverbio 31:20.
DAGITI PAGILASINAN NGA ADDA SERIOSO A PARIKUT
❑ Mannakiriri kadi?―Proverbio 21:19.
❑ Allukoyennaka kadi a makipaset iti seksual nga imoralidad?—Galacia 5:19.
❑ Manangdangran kadi wenno nasakit ti panagsasaona?—Efeso 4:31.
❑ Masapul kadi nga uminom pay iti arak tapno makapagragragsak?—Proverbio 20:1.
❑ Managimon kadi ken bagina la ti pampanunotenna?—1 Corinto 13:4, 5.